A’NPHUTNA 7 - LEKHARABU INTHENG (BSI)

Tuishânglen

¹ Rōngpu’n Noah hneng, “Rakōng shunga na-innkō akhenga hlut jo ruh; raleichung pumpuia nang rōk hi akadik katlo che kae ti hi ke’n kahmu sōt jo.

² Beklanga a’ntheng ranhring apui ache kop 7 ṭim khana a’nthengmak ranhringhei chu apui ache kop khat ṭim mantluk roh.

³ Khavahei leh inṭhōia vate apui ache ajât kop 7 sâm inkhat um mantluksa roh. Khahei khan raleichunga sa leh te antamajōr sik kae.

⁴ Sûn leh jân kani 40 katlung bit a tuninga inphut ni 7 sō leh raleichung pumpuia khō kamansûr sik jo kae. Raleichunga ke’n kasyem rathla kanei akahring rakip kaman rampet sik jo hei kae,” ati.

⁵ Khana Rōngpu ṭongpek dungjuia Noah’n heirakip aleitlosōt jo.

⁶ Raleichunga tuishâng alen pha khan Noah akum 600 katluk jo.

⁷ Tuishâng lena inphut inhuksōtna sik ama leh anuhmei, asahei leh annuhmeihei rakōng shunga kahlut jo hei.

⁸ Sha leh va rakip, apui ache, beklanga a’ntheng ranhring khana a’ntheng leh a’nthengmak,

⁹ Pathen ṭongpek dungjuia Noah leh inṭhōia rakōng shunga khan kahlut jo hei.

¹⁰ Ni 7 sōa raleichung pumpuia tuishâng kalen in akachûm jo.

¹¹ Noah’n kum 600 ahong tlukna kum a thla 2 tlukna ni 17 ning tak a ralei thōia tuipui tuihnâr hong inhlâng jo, chungvân tinga tuipui kot hong inhlâng jo,

¹² sûn leh jân ni 40 katlunga khō kasûr jo.

¹³ Hiva ning tak hin Noah leh anuhmei khana asapa 3 hei, Shem, Hem, Japheth leh annuhmeihei rakōnga kahlut jo hei.

¹⁴ Ram a shahei, inna shahei akasin akalen jât rakip manvât loa, khana va jât rakip kakip hima Noah leh inṭhōia rakōnga kahlut jo hei.

¹⁵ Ranhring rakip apui leh ache atō-atōa Pathen ṭongpek dungjuia

¹⁶ rakōnga kahlut jo hei. Khava sōa Rōngpu’n kot kha Noah ahluttak leh akhâr jo.

¹⁷ Tuishâng kha ni 40 leikalen, tui hong inthûk joa rakōng kha tui in akalâng thei jo.

¹⁸ Tui kha hong inthûk chet-chet a rakōng kha tui chunga inlânga ka-om jo.

¹⁹ Inthûk hêr joa tlâng inshângpen he’m akachûm jo hei;

²⁰ tui kha inshângchet a tlâng chunga inphut metre 7 kakhea inshânga leika-om.

²¹ Raleichunga akahring inti rakip tui in athatpet jo hei; vahei, ranhringhei leh mihringhei.

²² Raleichunga kaphuk kasân rakip kathipet jo hei.

²³ Raleichunga vahei, ranhringhei, mihringhei rakip Rōngpu’n aman-rampet jo hei. Akahring hei khachu Noah leh inṭhōia rakōng shunga aka-om hei rōk kha kae.

²⁴ Kani 150 atluk mak kârseng tuilen kha leitlâksuk mak a kae.