A’NPHUTNA 47 - LEKHARABU INTHENG (BSI)

¹ Joseph in a-u anai mi 5 rengpa hneng aṭhōi heia, “Kapa leh kasōpuihei, ankemōng rup, anserup, antanei rakip anheiṭhōia Canaan ram a inphut kahong jo hei. Tûn anmani Goshen ramkeia ka-om hei,” ati.

² Khava sōa a-u anaihei kha rengpa hneng amalâr hei.

³ Rengpa’n anhnenga, “Nangnihei inveina ṭōnhlam kha heimo kae?” tia ader hei. Anmani’n, “Kanpa-kanpu hei ka-pōa kemōng kaching ung kae,” tia anmasôn.

⁴ Anmani’n, “Keini hiva ram kabera omna sik akahong ung kae. Ajârchu Canaan ram a sâk tâng inhnakreia se leh kemōnghei phi sâk sik kapha om mak jo. Lungsettak a Goshen ram a omtheina sik a ahnōmpek roh,” anti.

⁵ Rengpa’n Joseph hneng, “Tûnchu napa leh na-u nanaihei hong katlung jo hei,

⁶ Egypt ram hi anmani ta kae. Hiva ram a akaṭhapen ramṭhen, Goshena khō tla hei rasoh. Ankâra ṭōn katlo tor an-om inchu kei ranhei katinta sik a manṭang heiroh,” ati.

⁷ Hivasōa Joseph in apa kha rengpa hmaikunga aheiṭhōia, amalâra kae. Jacob in rengpa kha mahâmṭhat aleipek,

⁸ khana Rengpa’n, “Nakum heija jo che mo?” tia ader.

⁹ Jacob in, “Kei khōhme hringkhō hi kum 130 katluk jo. Khava kumhei kha kapa-kapuhei khōhme hringkhō kaseihei kha leh in-ang loa, katôi khana kei hringkhō hi intak eng,” ati.

¹⁰ Jacob in rengpa kha mathlâna vângṭhat apek a kase jo.

¹¹ Khana Rengpa ṭongpek dungjuia Joseph in apa leh a-u anaihei kha Egypt ram shunga hmun kaṭhapen Ramese khōpui hnenga aman om jo hei.

¹² Joseph in apa, a-u anaihei, an-innshung mi rakip akasinpen katlunga sik sâk leh in aleipek hei.

Ṭâmpui

¹³ Ṭâm katla kha khangtuk hrep inhnak khan chu hmun rakip a sâk leh in leiom mak jo. Egypt leh Canaan mihei vonṭâma hong katlâksam jo hei.

¹⁴ Mihe’n sâng kha anlei rachôk jâra Joseph in sêr aleikhôma reng-innpuia amanbuk jo.

¹⁵ Egypt leh Canaana sêr rakip atlang sō jo pha Egypt mihei kha Joseph hneng kahong heia, “Sâk sik apek roh! Amanthi mak roh! Heikhat atlopek roh! Kansêr um katlangsō jo,” anti.

¹⁶ Joseph in, “Nansêr hei atlang jo’nchu, nanranhei heiṭhōi hei ruh, khava kahlanga ke’n sâk sik kapek sik chei,” ati.

¹⁷ Khava jâra anranhei Joseph hneng anheikei hei, khana Joseph in anshakor, ankemōng, anke, ansehrat, anshakortung hei kahlânga sâk leh in aleipek hei. Khava kum a khan anranhei leh inthlengna sâk leh in aleisempek hei.

¹⁸ Anôk a kum a ahnenga kahong heia, “Nahnenga heite ip mak ning, apu, kansêr katlangsō jo khana kanranhei akhenga nakut a ka-omsō jo hei. Nang pek sik a heite neimak jo ung, kantaksa leh kanram hei tei loa.

¹⁹ Amanthi mak roh. Heikhat atlopek roh! Kanhleipuk hei hi hleichi amanchang pek mak roh. Kantaksa leh kanram hei hi rachôk jo roh, sâk leh in leh inthleng jo rih. Keini rengpa sōk kachang sik ung, kanram hei kha ama’n anei sik hei. Kanhringna sik a sâng apek roh, hleia vor sik a sachi apek roh,” anti.

²⁰ Joseph in Egypt ram rakip kha rengpa sik a arachôk jo. Egypt mi rakip in anram anta’n jōr sik kasōk jo, ajârchu sâk tâng kha khangtuk hrep le’nhnak; khana ram rakip kha rengpa ta kae pet jo.

²¹ Egypt ram arakir inkhat a inphut inkhat katlunga mihei kha Joseph in rengpa sōk amanchang jo hei.

²² Ama’n aleirachôk mak niti’nchu thempuhei ram rōk hei kha kae, ajârchu reng in an-omna sik a aleipek hei kae.

²³ Joseph in mihei hneng, “Nangni’n nanhmu, tûnchu ke’n nanram leh nantaksa rengpa sik a karachôk jo chei. Nanhleia vor sik sachi kha hin ka-om jo.

²⁴ Hlei nanlōk pha sem 5 shunga inkhat rengpa nantapek sik kae. A’nhleiseng kha sachia, nangni leh nan-innshunghei sâk sik a nanhmang thei sik,” ati.

²⁵ Anmani’n, “Nang in kanhringkhō nahukpek jo ung; kanchunga akaṭha nahong tlopek jo ung, apu, khana keini hi rengpa sōk kachang sik jo ung,” anti.

²⁶ Khang’khan hivahi Joseph in Egypt ram sik a dân inkhat a asyem jo ti chu sâng inkhôm kha sem 5 inkhat kha rengpa ta sik kae. Hiva dân hi tûn katlunga’m anlahmanga kae. Thempuhei ram rōk kha rengpa neishunga inveisa mak jo.

Jacob in Achaina Angek

²⁷ Israel he’n Egypt ram Goshen inti hmun a leika-om hei, mikahao kachang jo hei khana sa katamtak annei jo.

²⁸ Jacob in Egypt a kum 17 leika-om, akum 147 atluk mak hma seng.

²⁹ Athina sik ahong hnai jo pha, asapa Joseph abek a ahnenga, “Nakut kha karakō kâk a da roh. Egypt a kei hi avûm mak che ning tia kaṭhatak a intep roh.

³⁰ Kapa-kapuhei hrena hmun a nantavûm sik enga kamadu; Egypt a inphut akadom inna anmani vûmna khan avûm roh,” ati. Joseph in, “Nahri kapōa katlo sik,” ati.

³¹ Jacob in, “Nang in katlo sik tia intep roh,” ati. Joseph kha le’ntep jo, khana Jacob in rakhum chunga inphut manpâkna aleinei.