A’NPHUTNA 46 - LEKHARABU INTHENG (BSI)

Jacob leh A-innshunghei Egypt a Ansena

¹ Jacob in anei rakip amantluk a Beersheba a kasea, khana khan ama’n apa Isaac Pathen hneng inthoina inkhat aleitōk.

² Pathen in jân a hmangtalâra, “Jacob, Jacob,” tia abek. Ama’n, “Hin ka-om eng,” tia ama sôn.

³ “Kei napa-Pathen, Pathen eng kha kae,” ati. “Egypt a nase sik kha ṭimak roh; khana khan ke’n nang sōn leh pârhei kha jât kalentak a kasyem sik hei.

⁴ Egypt a ke’n ka’nṭhōipui sik che, khana ke’n hiva ram a hin nasōn-napâr hei kaheiṭhōi male nôk sik hei. Nang nathi sik pha leh Joseph in a-ompui sik che,” ati.

⁵ Jacob Beersheba inphut heikasōk jo. Asa he’n, ama leh annuhmei ansahei kha Egypt rengpa’n ahei tir pek gâria khan anmanchōng jo hei.

⁶ Anmani’n Canaan ram a anta hongchen ranhei, annei rakip leh Egypt ram kajōna kase jo hei. Jacob in atu asahei seng aṭhōi pet hei:

⁷ asapahei, atupahei, asanuhei leh atunuhei.

⁸ Jacob innshung mihei Egypt kajōna ama leh inṭhōia akase hei khachu asa upapen Reuben,

⁹ leh Reuben sahei: Hanoch, Pallu, Hezron, leh Carmi hei kae.

¹⁰ Simeon leh asahei: Jemuel, Jamin, Ohad, Jachin, Zohar, leh Shaul, Canaan jōrnu sapahei kae.

¹¹ Levi leh asahei: Gershon, Kohath, leh Merari hei kae.

¹² Judah leh asahei: Shelah, Perez leh Zerah (Judah sa alak-hei Er leh Onan hei hi Canaan ram a kathi jo hei.) Perez sahei kha Hezron leh Hamul hei kae.

¹³ Issachar leh asahei: Tola, Pua, Jashub, leh Shimron hei kae.

¹⁴ Zebulun leh asahei: Sered, Elon, leh Jahleel hei kae.

¹⁵ Hihei seng hi Mesopotamia ram a Leah tamatet Jacob sahei kae, asanu Dinah inteisa loa. Leah tamatet seng ankhenga 33 hei kae.

¹⁶ Gad leh asahei: Zephon, Haggi, Shuni, Ezbon, Eri, Arod leh Areli hei kae.

¹⁷ Asher leh asahei: Imna, Ishvah, Ishvi, Beriah leh ansernu Serah hei hi kae. Beriah sahei Heber leh Malchiel hei hi kae.

¹⁸ Hiva Jacob tu leh sa sôm leh karuk hei hi Laban in asanu Leah inzen sik a apeknu Zilpah tamatet hei kae.

¹⁹ Jacob nuhmei Rachel in sapa 2 amatet hei: Joseph leh Benjaminhei hi kae.

²⁰ Egypt ram a Joseph in sapa 2 anei hei: Manasseh leh Ephraimhei kae. Heliopolis ram thempu Potiphera sanu Asenath tamatet hei kae.

²¹ Benjamin sahei khachu: Bela, Bekher, Ashbel, Gera, Naaman, Ehi, Rosh, Muppim, Huppim, leh Ard hei hi kae.

²² Hiva 14 hei hi Rachel leh Jacob tamatet tu leh sahei kae.

²³ Dan leh asapa Hushim

²⁴ Naph-tali leh asahei: Jahzeel, Guni; Jezer leh Shillem hei hi kae.

²⁵ Hiva Jacob tu leh sa 7 hei hi Laban in asanu Rachel inzen sik a aleipek Bilhah tamatet hei kae.

²⁶ Jacob tu leh sahei Egypt ram kajōna aleikase seng, hmōihei in-veiloa 66 hei kae.

²⁷ Joseph in Egypt ram sapa 2 anei hei, sona aleikase Jacob innshung ankhenga 70 leikatluk hei.

Egypt a Jacob leh A-innshung

²⁸ Goshen ram a Joseph in anmani ahong ratōna sik hei Jacob in anhma Judah kha aleitir. Anmani anhongtlung jo pha,

²⁹ Joseph in ashakor gâri achōnga apa intōpui sik a Goshena kase jo. Anmani an-intō pha, Joseph in apa hrak akutbân vâng akakō tlit a kasôttak kaṭap joa kae.

³⁰ Jacob in Joseph hneng, “Kei kathi’num kaṭha jo, tûn ke’n nang kahmu jo che khana tûn katlung lakahring che ti kamanhret jo,” ati.

³¹ Khava sōa Joseph in asōpuihei leh apa innshung mihei hneng, “Ke’n rengpa hneng, Canaan ram a ka-om kasōpuihei, kapa innshung seng kahnenga kahong jo hei tia kava manthei sik.

³² Nangni se kakhem chei kae, ran kaching chei kae, kemōng rup leh serup khana nannei rakip nanheiṭhōi hei ti hi kavahri pek sik.

³³ Rengpa’n ahei bek cheia heimo nanhringna sik nanṭōnhlam tia ader chei inchu,

³⁴ masôn thei ruh, nanpa-nanpuhei taleitlo kapōa, nanhringkhō katlung bit a ran kaching nanhong changna kha hripek ruh. Khang’khan ama’n Goshen ramting aman om sik chei,” atipek hei. Joseph in hi aleitina ajârchu Egypt mihe’n ran kadôn hei hi heitea sakmak heia kae.