A’NPHUTNA 35 - LEKHARABU INTHENG (BSI)

Bethel a Pathen in Jacob Vâng Apek

¹ Pathen in Jacob hneng, “Bethel a se roh, sona son va-om roh. Nang in na-u Esaua inphut natlânsōt lai nahnenga ale’nlâr Pathen, kei sik a maichâm inkhat syem roh,” ati.

² Khava jâra Jacob in a-innshung leh ahong inṭhōipui hei hneng, “Miram pathen nantanei hei kha hlonsōt ruh khana nantaksa insi intheng una pōn intheng si ruh.

³ Hiva hmun hi nidahlona Bethel ting akase sik jo me kae, khana khan kamalung châmlai leh kasena rakip a ani’nthōpui Pathen sik a maichâm kasyem sik kae,” ati.

⁴ Khava jâra anmani’n Jacob hneng miram Pathen antanei seng leh ankōrton hei kha’m Jacob hneng anpek sōt jo. Shechema sasōkung inkhat thōia khahei kha avûm jo hei.

⁵ Jacob leh asa he’n ansesōt pha, khava hnenga khōpuihei hneng Pathen in ṭitna kalentak aleimannei hei, khava jâra anmani’n leihnong mak hei.

⁶ Jacob in Canaana ka-om Luz, tûnchu Bethel tia a’nhret jo hmun a khan amihei seng leh kahong hei.

⁷ Khava hmun a maichâm inkhat asyema, khavakha Bethel Pathen rahming amanrôn, ajârchu ama’n a-upa hnenga inphut atlânsōt lai khan Pathen in hiva hmuntak a hin ahnenga le’nlâra kae.

⁸ Rebecca inzennu Deborah kha khana khan leikathi khana Bethel thlang tinga sasōkung thōia anleivûma kae. Khava jâra khavakha “Ṭapna Sasōkung” tia anleiphō.

⁹ Mesopotamia inphut Jacob ahong inle pha Pathen in ahnenga vōi khat inlâr nôk a mahâmṭhat aleipek.

¹⁰ Pathen in ahnenga, “Narahming hi Jacob inti, tâk tuna inphut chu Israel a’nti sik jo che kae,” ati. Hing’hin Pathen in Israel tia aleiphō jo.

¹¹ Khana Pathen in ahnenga, “Kei Akahratpen Pathen eng kae. Sa leh nai katamtak nei roh. Jât katamtak nanga inphut hong inthok sik hei khana nang hi renghei pusōn akachang sik che kae.

¹² Abraham leh Isaac hnenga kaleipek ram kha nang kapek sik che. Khana nang kahnunga nasōn-napâr hei hneng um kapek sik hei,” ati.

¹³ Hivasōa Pathen in adahlon jo.

¹⁴ Pathen in ṭong aleihri pekna hmuntak a khan Jacob in mandonsōtna sik hlung aleiphun, khana khava chunga olive thaitui leh ju asunthlōna mantheng sōtna aleitloa kae.

¹⁵ Khava hmun kha Jacob in Bethel tia aphō jo.

Rachel Thina

¹⁶ Jacob leh a-innshung he’n Bethel andahlona kase jo hei, anmani Ephrath tlungna sik ala’nkârjap lai Rachel kha asanei pha hong katlung jo, naiha inhnaktak a kaphu jo.

¹⁷ Naiha nat a’nhnakpen lai khan, nai inneinu’n ahnenga, “Ṭitmak roh, Rachel; hivahi sapa inkhat nôk kae,” atipek.

¹⁸ Tâk-kha ama thi rong ati jo, achaina kaphuk masa leh inṭhōia anai rahming Benoni tia aleiphō, tâk apa’nchu Benjamin tia aleiphō.

¹⁹ Rachel kha athi pha Ephrath hlampanga anleivûm jo, tûnchu Bethlehem tia inhret jo.

²⁰ Khana khan Jacob in mandonsōtna sik hlung inkhat aleiphun, khavakha tuning katlung Rachel thlân kae ti manhretna sik a laka-om.

²¹ Jacob in khanga kasea Eder innber inshâng rekhat langting rephōr asyem jo.

Jacob Sahei

²² Jacob in khava ram a a-omlai Reuben in apa nuhmei manbohei kâra Bilhah kha ale’nchunpui jo; Jacob in atheia ahnuk leikana hêr. Jacob in sapa 12 aleinei hei.

²³ Leah tanei hei: Reuben (Jacob sapa upapen), Simeon, Levi, Judah, Issachar, leh Zebulun hei hi kae.

²⁴ Rachel tanei hei: Joseph leh Benjaminhei hi kae.

²⁵ Rachel sōknu Bilhah tanei hei: Dan leh Naphtali.

²⁶ Leah sōknu Zilpah tanei hei: Gad leh Asher hei hi kae. Hiva sapahei hi Mesopotamia ram a a’nte hei kae.

Isaac Thina

²⁷ Abraham leh Isaac leiomna Hebron sira Mamre inti hmun a khan Jacob kha apa Isaac inhmupui sik leikase.

²⁸ Isaac kha kum 180 leikahring,

²⁹ khana kater hêra leikathi jo; asapa Esau leh Jacob in anleivûma kae.