A’NPHUTNA 31 - LEKHARABU INTHENG (BSI)

Jacob Labana Inphut Atlânsōt

¹ Jacob in Laban sahei ṭonghri kha athei jo: “Nipa ran kaṭha rakip Jacob in alosō jo. Anei leh ahao rakip so nipa ta rōk hei kae,” anti.

² Khan chu Laban kha hma kapōa inthloppui yamak jo ti hi’m amanhret jo.

³ Khava pha Rōngpu’n ahnenga, “Naram na-innkōhei omna inle jo roh. Ke’n ka’nṭhōipui sik che,” ati.

⁴ Khava jâra Jacob in Rachel leh Leah hneng akemōng khemna hleipuk a anva’nhmu puina sik ṭong aleimanrôn hei.

⁵ Ama’n anhnenga, “Nanpa hi hma kapōa inthloppui yamak jo ti hi kamanhret jo; tâk kapa Pathen in kei a’nṭhōipui enga kae

⁶ Ke’n kator chenna nanpa ṭōn kaleitlo kha nangni’n nanmanhret.

⁷ Kha’num, kei ahōn enga karatha man vōisôm athleng lelea kae. Tâk-kha Pathen in kei amansuset mak a kae.

⁸ Laban in, ‘Aje kaṭe rik-rak ke seng naṭōn tloman sik kae,’ atina rakip a ranrup rakip in aje kaṭe rōk anhong matet a kae. Khana ama’n, ‘Aje karâng dit-dut kehei naṭōn tloman sik hei kae,’ ati pha ranrup rakip in aje karâng dit-dut anhong matet a kae.

⁹ Pathen in nanpa ran rup-hei kha alosōt a kei apek jo eng.

¹⁰ “Ranhei jejonglai ke’n rahmang inkhat kaleinei, kechehei kha anje akaṭe rik-rak, akarâng dit-dut leh akaṭe rōk kahmu hei.

¹¹ Pathen ngeva khan kahnenga, ‘Jacob!’ tia abek eng. ‘Hôi’ tia kamasôn.

¹² Ahrisa a, ‘Enroh, keche apui kaje rakip heiso, anje kaṭe rik-rak, karâng dit-dut, kaṭe hrek-hrok hei. Laban in nachunga atlo rakip ke’n kahmu jo, khava jâra hivahi ke’n kamasō kae.

¹³ Kei hi nang in olive thai nasun thlōna mandonsōtna hlung inkhat naleitōkna, khana kahnenga nalei intepna Bethel a nahnenga ale’nlâr Pathen eng kha kae. Tûn nang na’ntetna ram a khan inlena sik a intluk jo roh,’ atipek enga kae.”

¹⁴ Rachel leh Leah in Jacob an-masôn, “Kanpa a inphut chen sik karōi heite om mak.

¹⁵ Ama’n khōhme kapōa arazen ung. Ajōrsōt ung, kanman alei inpek kha’m ahmangsō jo.

¹⁶ Pathen in kanpa nei alosōt rakip hei hi eini leh nisahei chen jo kae. Pathen in heimo amanthei che kha tlo jo roh.”

^17-18 Khava jâra Jacob, apa omna Canaan ramting sena sik a intluk jo. Ama’n anuhmei asahei sharîngsei chunga amanchōng heia, Mesopotamia ram a lamsōt heirakip leh aranrup seng ahmating ahe jo hei.

¹⁹ Laban kha kemōng sam kavo leikase, avōi kathi Rachel in apa innshung pathenhei kha aleimarûk heia kae.

²⁰ Jacob in Laban hneng ahōna adahlon sik ṭong leiman theimak.

²¹ Jacob in anei rakip arôna inrangtak a aleidahlon jo. Ama’n Euphrates tuidung re ake leh Gilead tlâng ajōn inphut jo.

Laban in Jacob Ahnong

²² Ni 3 sōa Jacob katlân jo ti ṭong hi Laban hneng mi’n anhri pek jo.

²³ Ama’n amihei leh inṭhōia Jacob kahnung anthlura, ni 7 ning Gilead tlânga anvaphâk.

²⁴ Khava ning jân Laban rahmanga Pathen kajōnga, “Nang in Jacob kha heijalai a-enum maṭhit makna sik tlo roh,” atipek.

²⁵ Jacob in tlâng chunga khan arephōr amatung, khana Laban in Gilead ram tlânga a-innkōhei leh arephōr amatung.

²⁶ Laban in Jacob hneng, “Heisik a mo nang in nahōn enga kasanuhei kha rehring sur kapōa naṭhōisōt hei?

²⁷ Heisa mo amantheilo chea marûk a a’nlepsōt che? Nalei manthei eng inchu, nang mathlâna inpâktak a khōng leh serângdâr thōa kalei mathlâ thei chea kae.

²⁸ Katu hei kabeng amanjôp mak che, kasanuhei chibei aman pek mak hei che. Khava khachu mikamo ṭōn kae!

²⁹ Ke’n nang sukset torna ratha kanei, tâk jâning jân khan napa-Pathen khan karahmanga heijalai a-enum maṭhit makna sik chea ṭong apek eng.

³⁰ Na-innting na’nle hnōmhêr jâra akatlân che kae ti kamanhret, tâk heisa mo ka-inn pathenhei namarûk?” ati.

³¹ Jacob in amasôn, “Akinchu nasanuhei hi nakasut sik eng tia kamandon jâra kae.

³² Tâk-kha na-pathen hei kha hinna inkhat hneng nahmu’nchu ama kha that sik kae. Hivahin, kamihei hmit-hmua, nahei rakip kha injong jo roh khana nata kha inlo roh,” ati. Rachel in anpa Laban pathenhei aleimarûk kha Jacob in leimanhret mak.

³³ Laban kasea Jacob rabuk-inna avajong jo; khava sōa Leah rabuk-inn, khan chu sōk nuhmei 2 hei rabuk-inn ajonga apathenhei kha hmumak jo hei. Khava sōa Rachel inna kahlut jo.

³⁴ Rachel in apa pathenhei kha aleiloa sharîngsei chunga in-ongna mârsha shunga athōn heia anchunga alei in-ongna jo hei. Laban in rabuk shung kha ajong tâk heite leihmu mak jo.

³⁵ Rachel in apa hnenga, “Apa, nahnuk anat pek mak roh, kei ka’n ongna inphut thōi tor mak ning, ajârchu thla pōn kahmua kae,” ati. Laban in a-inn pathenhei kha ajong hei tâk leihmu mak jo hei.

³⁶ Khava pha Jacob ahnuk kana reia ader, “Heipen mo katloṭhe aka-oma? Hei dân mo kasuk khōi joa, hingtuk hrep a rehnonga nahnong eng?

³⁷ Tûn kaneinâk rakip nakatlok a na-innhlō neinâk heimo nahmu sōt aka-om? Namihei leh kei mihei tahmu sik a heikeisōt roh, tujôk mo akadik me mandon hei rasoh.

³⁸ Tûn kum 20 katluk jo, kei nang leh nihong omsōm hi; nake achanga, nakemōng achanga akapung mak om mak, khana nakemōng rup a inphut ache inkhatbek um lasâk mak eng.

³⁹ Ramsha he’n kemōng inkhat antha kataia a’nhmang kha ke’n kamale che. Kei ṭhena changmak tia nahnenga hridek mak eng. Sûna a-emak leh jâna a’nhmang seng um kamalena sik nangek eng.

⁴⁰ Pha katamtak, sûn leh akalum, jân leh akadai kade-hla a khōdeng kathei. Kei kaje tor makna’m leikatam.

⁴¹ Kei leh nang nihong omsōmna kum sômhni katlung bit a khang’khan kalei thōk. Nasanuhei 2 hlōna sik a kum 14 kahlut, ṭōn katlo, kum 6 in ran hlōna kaleitlo. Kha achang pum a vōisôm tak kahlōman nathleng lelea kae.

⁴² Kapa Pathen, Abraham Pathen leh Isaac Pathen in aleiompui mak eng inchu kakarōk hêra nalei tirsōt sik eng kae. Tâk-kha Pathen khan kaṭōntlo leh kakhōdengthei ahmupek eng, khana jâning jân khan aṭong tanna kha jōng katlung jo.”

Jacob leh Laban Inhnōmna

⁴³ Laban in Jacob amasôn, “Hiva nuhmeihei hi kasanuhei kae; ansahei hi katu hei kae; khana ran rup-hei hi’m kata hei kae; hinna nahmu rakip hei hi kata hei rōk kae. Achang inum, kasanuhei leh katu hei hi kakhâm tor mak sik hei anchang jâra,

⁴⁴ kei leh nang inhnōmtōna inkhat ninei sik a intluk jo eng. Ni’nhnōmna mandonsōtna sik hlungbuk inkhat syem rih.”

⁴⁵ Khava jâra Jacob in mandonsōtna inkhat sik a hlung inkhat ahrut a amatung.

⁴⁶ Ama’n amihei hneng hlungpui ṭhahrep antabuk sik a amanse hei. Khava sōa an-hlungbuk panga khan bu anleisâk a kae.

⁴⁷ Khavakha Laban in ‘Jegar Sahadutha’ tia aphō, Jacob inchu ‘Galeed’ tia aphō.

⁴⁸ Laban in Jacob hneng, “Hiva hlungbuk hi eini 2 mandonsōtna inkhat sik a kae,” ati. Khava jâra khava hmun kha Galeed tia anphōa kae.

⁴⁹ Laban in ahri nôk a, “Eini khat leh khat ni’nṭhen pha hin Rōngpu’n nichunga a-entō ṭhak me chang rasoh,” ati. Khava jâra, khava hmun kha Mizpah ti’m anphō.

⁵⁰ Laban in ahri manjōm, “Nang in kasanuhei kahōi kaṭha tlo loa, nuhmei hlop na-ompui he’nchu, ke’n kamanhret phâkmak inum Pathen in nikâra a-en ṭhak me kae ti hi mandonsōt roh.

⁵¹ Nang leh kei kâra sik hlung kabuk hei kha hin ka-om hei, hinahin mandonsōtna hlungphun kha ka-om.

⁵² Hlung inbuk leh a’nphun hlunghei hi mandonsōtna sik heia kae. Ke’n hiva hlung inbuk hei khehlona nang buhlu mak che ning; nang inum hivahi a-emak leh mandonsōtna hlung khehlona kei abuhlu mak tin che.

⁵³ Abraham Pathen leh Nahor Pathen khan eini 2 kâra ṭong tan rasoh.” Khava sōa Jacob in apa Isaac takamuk Pathen rahminga intepna kha juina sik a ka-ôrtak a intepna anei jo.

⁵⁴ Ama’n ran inkhat athat a tlâng chunga inthoina inkhat atōk, khava sâkna khan amihei akasa sik abek hei. Anmani’n ansâksōa, khava jân kha tlâng chunga leikarek hei.

⁵⁵ Ajing jîngkâr hmatak Laban in atu hei leh asanuhei ankabeng amajôp heia, chibei apek heia, a-innlangting aheijōn jo.