A’NPHUTNA 30 - LEKHARABU INTHENG (BSI)

¹ Rachel in Jacob sa inkhatbek um leinei pek mak, khava jâra a-unu chunga athang leikase, khana Jacob hneng, “Sa amannei roh, achangmak inchu kathi sik eng,” ati.

² Jacob in Rachel hneng kahrânga, “Pathen kha kei chang tor mak eng. Sa anikape mak kha ama kae,” ati.

³ Amanu’n, “Hinahin kasōknu Bilhah ka-om, ama’n kei sik sa anineipek theina sik jepui jo roh,” ati.

⁴ Khang’khan asōknu Bilhah kha Jacob hneng apek jo, khana Jacob in amanu a’nchunpui jo.

⁵ Bilhah achung kahrik a Jacob sapa inkhat aneipek jo.

⁶ Rachel in, “Pathen in kei ka-ôa ṭong atanpek jo eng. Kaderna athei pek enga sapa inkhat apek jo eng,” ati; khava jâra asapa rahming Dan tia aphō.

⁷ Rachel sōknu Bilhah kha achung kahrik nôk a Jacob sapa inkhat amatet pek nôk.

⁸ Rachel in, “Ke’n inhnaktak a ka-unu ka’nrepui, tâk ke’n kator jo,” ati; khava jâra asapa rahming Naphtali tia aphō jo.

⁹ Leah khan avonchoi kabâng jo ti amanhret pha asōknu Zilpah kha Jacob nuhmei sik a apek jo.

¹⁰ Khana Zilpah’n Jacob sapa inkhat aneipek jo.

¹¹ Leah’n, “Kamahâm kaṭha jo,” ati; khava jâra ama rahming “Gad” tia aphō jo.

¹² Zilpah’n Jacob kha 2 tlukna sapa inkhat amatet pek nôk,

¹³ khana Leah’n, “Kei heituk a a’npâk jo eng mo! Tûnchu nuhmei he’n akahōinu anti sik jo eng,” ati; khava jâra ama rahming Asher tia aphō jo.

¹⁴ Gehu lōk pha Reuben in hleipuk a leikase; ama’n hleia jôrdei-âi avahmu. Ama’n anu Leah hneng jôrdei-âi kha apek. Khava kha ahmu pha Rachel in Leah hneng, “Nasapa tahei choi jôrdei-âi kha kei um ajing apek roh,” ati.

¹⁵ Leah’n Rachel hneng, “Nang in kapuise nakasut eng kha’m latluk mak mo? Tûnhin kasapa jôrdei-âi kapha inlo rong nalati mo,” ati. Rachel in, “Nasapa jôrdei-âi napek sik eng inchu Jacob leh tuning kajesap thei sik chei,” atipek.

¹⁶ Khōhlei ting Jacob hleia inphut ahong inle pha Leah’n Jacob inhmupui sik a kasea, “Nang leh kei tuning chu akajesap sik me kae; ajârchu kasapa tahei choi jôrdei-âi kha Rachel hneng kapek jo kae,” ati. Khang’khan Jacob in Leah kha khava ning jân ale’nchunpui jo.

¹⁷ Pathen in Leah derna athei pek a achung kahrik a Jacob sapa 5 tlukna aneipek jo.

¹⁸ Leah’n, “Pathen in tloman apek jo eng, ajârchu kasōknu kha kapuise hneng kaleipek a kae,” ati; khava jâra asapa rahming kha Issachar tia aphō.

¹⁹ Leah avea sa avon nôk a Jacob sapa 6 tlukna aleinei nôk.

²⁰ Amanu’n, “Pathen in kei kutchoi kaṭhatak apek jo eng. Tûnchu kapuise’n arahlâng sik jo eng, ajârchu ke’n sapa 6 kanei pek jo,” ati; khava jâra asapa rahming Zebulun tia aphō.

²¹ Ahnung kakhôrpena sanu inkhat anei, arahming Dinah tia aphō.

²² Khava sōa Pathen in Rachel ahong mandonsōt; aderna Pathen in athei pek a sa neitheina sik amantluk pek.

²³ Ama achung hong kahrik a sapa inkhat anei jo. Ama’n, “Pathen in sapa inkhat apek enga ka’nzakna kha alosōt pek jo eng.

²⁴ Rōngpu’n sapa ather apek nôk rasoh,” ati; khava jâra anaite rahming kha Joseph tia aphō.

Jacob leh Laban Manṭong Inbek

²⁵ Rachel in Joseph aneisōa Jacob in Laban hneng, “Ka-inna ka’nle theina sik se jo rong.

²⁶ Kanuhmei hei leh kasahei naṭōn kaleitloa kahlō hei seng kha apek jo roh, khana kei se jo rong. Heituk kaṭha karazen jo che mo nang in namanhret,” ati.

²⁷ Laban in ahnenga, “Ke’n hivahi kahri hnōm: rathla mantheina eng, Rōngpu’n nang jâra kei um mahâmṭhat apek eng kae ti hi kamanhret jo.

²⁸ Naṭōn tloman kha hri roh. Khahei kha kapek sik che,” ati.

²⁹ Jacob in ahnenga, “Heituk-hrep a naṭōn kahei tlo khana heikhonga mo kei ensuina thōia naranhei ahong kapung hei nang in namanhret.

³⁰ Kahong mak hma ajingte naleinei hei kha kapung hêr jo hei, khana kavasena rakip a Rōngpu’n mahâmṭhat apek jo che. Tûnchu kei sik a hnemna en pha jo kha kae,” ati.

³¹ Laban in, “Ke’n heimo kapek sik che,” tia ader. Jacob in amasôn, “Tloman heite madu mak eng. Kei ṭōn mantlukna hi nahnōm pek eng inchu ke’n nakemōnghei kalakhem sik hei:

³² Tuning nakemōnghei kâra hlut a akaṭe rik-rak kemōnghei, akadum hei leh akaṭe ke rakip hei kha ka’nlo sik hei. Kharōk kae kaṭōn tloman kamadu khachu.

³³ Kei kamalung intheng kha hnunga kabeitak a nahong manhret sik. Kei tloman hei kha nahong-en manchên pha akaṭe mak kehei leh akadum mak kemōnghei kaserōnga navahmu’n chu kamarûk hei kae tia namanhret sik eng.”

³⁴ Laban in amasôn, “Kahnōm jo eng, nang tahri kapōa nitlo sik jo.”

³⁵ Tâk-kha khava ning tak khan Laban in akaṭe leh akachek rik-rak keche leh kepui, akaṭe seng khana kemōng kadum rakip aṭhensōt jo hei. Khahei ka-ensui kha asahei amanṭang jo hei,

³⁶ khana ama’n akemōnghei leh Jacob hnenga inphut hmun kahlatak a ni 3 hlam a leikase jo. Jacob in a’nhleibanghei kha aleikhem jo hei.

³⁷ Jacob in theichang, theipōng, khana khōngma thing kahring bâk atuktana ahok hei ajijing akhok a amanṭe rik-rak hei.

³⁸ Khava thing akaṭe rik-rak hei kha ke leh kemōng rup-hei tui inna thlengkông hma adapek hei. Ama’n khana khan ada hei, ajârchu tui in anhong pha leh ke leh kemōnghei kha je anjong ria kae.

³⁹ Kehei khan te anrôn pha leh, akaṭe, akarâng anheinei ria kae.

⁴⁰ Jacob in kemōnghei kha ke heia inphut ahlop a aṭhen hei khana Laban serup akaṭe dit-dit hei leh akadum hei langting anhmai kha alei man-en hei. Khang’khan aserup hei kha ahlop a ada heia Laban se heia inphut aṭhen hei.

⁴¹ Taksa kaṭha ke leh kemōng he’n tui ka-in anhong pha leh je anjong pha thing bâk-hei kha anhmating tui dônna thlengkông hnenga adapek ri hei, hivahi thing bâk kaṭe kâra sa anvonna sik a kae.

⁴² Tâk-kha taksa kaṭhamak ke leh kemōnghei hma khan chu dapek mak hei. Sôt lo jen a Laban khan ran taksa kaṭhamak rōk achen jo hei, khana Jacob inchu akaṭha seng achen jo hei.

⁴³ Hing’hin Jacob kha mikahaotak hongkachang jo. Ranrup, sōk, sharîngsei leh sha-kōrtung hingja ahongnei jo.