A’NPHUTNA 27 - LEKHARABU INTHENG (BSI)

Isaac in Jacob Vâng Apek

¹ Isaac tûnchu hong kater joa ahmit in khō heihmu mak jo. Asapa upapa ahnenga abek a, “Kasapa!” ati. Esau in amasôn, “Hôi, apa” ati.

² Isaac in, “Kei kater jo eng khana inranga kathi bei sik jo eng ti hi nang in nahmu.

³ Nasâi leh nathe choi inna kei sik a ramsha vathat roh.

⁴ Khava kei tamadu akatui an kha asōng pek inna kahnenga heichoi roh. Kathi mak hma ke’n achaina vâng peche rong,” ati.

⁵ Isaac in asapa Esau hneng thuhming aleihri kha anuhmei Rebecca’n aleithei jo. Esau in ramsha kahnong ase kathi,

⁶ Rebecca’n asapa Jacob hneng, “Napa’n na-upa Esau hneng,

⁷ ‘Sha heichoi inna kei sik asōng pek roh. Kathi mak hma Rōngpu hmaikunga vâng peche rong,’ ati kha ke’n kathei jo.

⁸ Tûnchu kasapa, rangei roh khana heimo kahri kha tlosōt roh.

⁹ Vase’na ke rup kâra akathai ke 2 sur ina heichoi roh. Khana inphut napa tasâk hnōmhêr an kha ke’n sōng pek rong.

¹⁰ Ama’n athimak hma nang kha vângṭhat apekna sik che khavakha nachoia namansâk thei sik,” ati.

¹¹ Tâk-kha Jacob in anu Rebecca hneng, “Ka-upa chu ataksa ahme katam kei chu kahme tam mak ti hi namanhret.

¹² Kapa’n akachia a-en eng inchu ke’n ama kahōnna hi ahong manhret sik; khang’khan vâng pek kahlanga kei sik hâksêr chenna jôk kachang sik,” ati.

¹³ Anu’n amasôn, “Kasapa, nachunga hâksêrna hei-achang inum kei chunga tla rasoh; kati rōk hi tlo roh, se ina kehei kha ahei choi pek roh.”

¹⁴ Ama ke kasur kasea anu hneng ahei choi hei khana anu’n apa tasâk hnōm an kha asōng pek jo.

¹⁵ Hivasōa ama’n Esau pōn leh der kaṭhapen hei kha alosōt a asapa Jacob amansi amankei jo hei.

¹⁶ Ke vun vâng akut khana ahme omakna ahrak hei kha akatōm tlit pek hei.

¹⁷ Rebecca’n asōng an katui kha leh abuhlom syem kha asapa kut a apek jo.

¹⁸ Khava sōa Jacob kha apa hneng kasea, “Apa” tia abek. “Hôi, kasapa tu che kha mo?” tia amasôn.

¹⁹ Jacob in apa hneng, “Kei nasa upa Esau eng kae; nang in namanthei eng kapōa katlo jo. In-ong jo roh vângṭhat napek theina sik eng kahei choi pek che hme hi sâk jo roh,” ati.

²⁰ Isaac in, “Kasapa, heikhonga mo hingtuk inranga sha chu nahei jongsōt?” tia amasôn. Jacob in, “Na-Rōngpu na-Pathen in khava jongsōtna khan a’nthōpui eng,” ati.

²¹ Isaac in Jacob hneng, “Nang kakachia ka-en theina sik che, kahneng ahong hnai roh. Nang Isau khet che mo?” ati.

²² Jacob khan apa hneng hong intet det a apa’n akachia, “Nakare chu Jacob rasa ka-ang, tâk nakutbân chu Esau bân kae,” ati.

²³ Esau kutbân kapōa ahme ahmông jâra apa’n Jacob kha leimanhret tor mak jo. Ama’n vângṭhat kha pek sik a intluk jo,

²⁴ tâk avea adersa, “Kadiktak a nang Esau che mo?” Ama’n, “Ôk, kei eng kae,” tia amasôn.

²⁵ Isaac in, “Nahme sōng an kha ajing hin heichoi roh. Khavakha kasâk sō leh vâng kha kapek sik che kae,” ati. Jacob in an kha leh in sik a ju ahnenga ahei choi pek a kae.

²⁶ Khava sōa apa’n ahnenga, “Kasapa, ahong hnai inna avamajôp roh,” ati.

²⁷ Khang’khan apa hneng majôp sik a ahei hnai pha asapa pōn marim kha aleimahnam pek a kae, khana apa’n vâng aleipek joa kae. Ama’n, “Kasapa marim kahōi hichu, Pathen vângpek jo hleipuk inkhat marim kapō kae.

²⁸ Pathen in chungvânna inphut nang sik a radaitui pek che rasoh khana nahlei hei kha athai man om pek che rasoh. Sâng leh be khana vomhrui tui katamtak pek che rasoh!

²⁹ Jât-hlop he’n nasōk chang hei rasoh khana mihlop he’n nahmai kunga inkun hei rasoh. Nang pare-patung hei kâra nang in vai rôn roh, nanu sōn leh pâr he’n nang kamuk hei che rasoh. Nakahâksêr hei kha hâksêr chen hei rasoh, khana vâng nakapek hei kha vâng chen hei rasoh,” ati.

Esau in Isaac Vâng Ader

³⁰ Isaac in mahâmṭhat apeksō joa Jacob in apa Isaac a inphut asesōt lim leh a-upa Esau sha kahnong asea inphut hong inle jo.

³¹ Ama’num bu leh an katui asōnga apa hneng ahei choi. Ama’n, “Apa, lungsettak a a’n-ong pek roh, vâng napekna sik eng tia nang sik a kahei choi hme an hi asâk pek jo roh,” ati.

³² Isaac in ader, “Nang tu che mo?” Esau in amasôn, “Nasapa upa Esau eng kae.”

³³ Isaac kha atak leh aratha innok jo khana ader, “Khan-e sha ahong that a kahnenga ahei kachoi mi kha tutâk mo? Nahong mak hma det a khan kaleisâk jo kae. Ke’n achaina vâng kha kaleipek jo kae, khava jâra khahei kha ahei tik a ama ta jo hei kae.”

³⁴ Esau in hivahi athei pha inhnaktak a leikaṭap khana ati, “Apa, kei um vâng apek roh.”

³⁵ Isaac in amasôn, “Nanaipa kahonga ahōn jo eng. Nang vâng chen sik kha alosōt jo,” ati.

³⁶ Esau in, “Hivahi ama’n vōi 2 tlukna ahōnna jo eng kae. Arahming Jacob tia anphō hi intōk hrep. Ama’n kei upa changna ratha neina leh kavâng chen sik alopek jo eng. Kei sik a mahâmṭhat inkhatbek um adapek mak jo che mo?” ati.

³⁷ Isaac in, “Ke’n ama hi nang kapu kamanchang dek jo, khana apare-apatung rakip ama sōk kamanchang jo hei. Sâng leh be khana ju ama kapek jo. Kasapa, tûnchu nang sik a katlo tor sik heite om mak jo!” ati.

³⁸ Esau in apa hneng aheider, “Apa, vâng inkhat rōk um kei sik om mak jo mo? Apa, ke’m vâng apek roh.” Ama kaṭap inphut jo!

³⁹ Isaac in ahnenga, “Nang sik a vânchunga radaitui om mak jo ning, Nang sik hlei thai kanei om mak jo ning.

⁴⁰ Chemjâm namatua nang akahring sik che kae. Tâk-kha nanaipa sōk akachang sik che kae. Kha’num nang in ama na’nrepui pha ama matuna chea inphut kasōk tor sik che,” ati.

⁴¹ Esau in Jacob kha amater, ajârchu apa’n Jacob hneng vâng kha aleipek joa kae. Ama’n amandon, “Kapa athia aralum dena sik kahnai jo; khava sō leh ke’n Jacob hi kathat sik.”

⁴² Esau ṭōnmantluk hi Rebecca’n aleithei pha, Jacob ava manbek heia, “Rangei roh, na-upa Esau in nang hi sura thatna sik chea intluk jo.

⁴³ Khava jâra kahri hi tlo roh. Harana ka-om kaṭapa Laban inna inranga vase roh,

⁴⁴ na-upa hnuknat hi adai mak kârseng khana khan ama leh pha chomkhat om roh,

⁴⁵ nang in ama hnenga natlo hei kha amahngi mak hma seng va-om roh. Khava sō leh nakaṭhōi inle sik ke’n mi kahei tir sik. Heijâra mo kasapa inhnitak ni khat rōk a kamanhmang sik chei?” ati.

Isaac in Jacob Laban hneng Atir

⁴⁶ Rebecca’n Isaac hneng, “Esau in a-ompui ram hlop nuhmeihei jâra kana jo eng, kachim jo eng. Jacob inum Hit jōrhei ahong ompui inchu akathi bei sik jo eng kae,” ati.