A’NPHUTNA 26 - LEKHARABU INTHENG (BSI)

Isaac Gerara A-om

¹ Abraham phalaia aleikasōk hma-inkei kha changloa ṭâmpuitlâk atherbia khava ram a khan hong ka-om nôk jo. Khava jâra Gerar khōa Philisti reng Abimelech hneng Isaac leikase.

² Rōngpu kha Isaac hneng inlâra ati, “Egypt a sesuk mak roh; ke’n om roh katina che hiva ram a hin om roh.

³ Nang hinahin om roh, ke’n ka’nṭhōipui sik che, mahâmṭhat kapek sik che. Ke’n hiva ramkei seng hi nang leh natu-nasahei kapek sik chei. Ke’n napa Abraham hnenga kaṭong leitep kha kamathlung sik kae.

⁴ Ke’n marvâna ârsi ja, tu leh sa katamtak kapek sik che, khana anmani hiva ramṭhen tahōm seng hi kapek sik hei. Nang sōn leh pârhei mahâmṭhat kapek hei kapōa mahâmṭhat pekna sik a jât rakip inum anta hongder sik eng kae.

⁵ Ke’n nang mahâmṭhat kapek sik che, ajârchu, napa Abraham khan kaṭong aleijui, khan chu kaṭong pek seng leh kadân seng aleijui sōa kae.”

⁶ Khava jâra Isaac kha Gerara ka-om jo.

⁷ Khava hmun a mihe’n anuhmei chungchâng ṭong ander pha, ama’n asernu kae tia amasôn hei. Ama’n amanu kha anuhmei ti sik leihnōm mak, ajârchu hme kaṭhanu Rebecca kha chentheina sik a khava ram a mihe’n ama anthat khâk sik eng tia leikaṭi joa kae.

⁸ Isaac khava hmun a pha bongkhat a-om shunga khan, Reng Abimelech in thlikot a inphut Isaac leh Rebecca inlungset omchen kha aleihmua kae.

⁹ Abimelech in Isaac kha mi ava manbek a, “Amanu hi nanuhmei kae nu! Heisa mo kasernu kae, nati?” tia ader. Ama’n amasôn, “Kanuhmei kae kati’nchu ama jâra mi’n anthat sik eng ti ṭit jâra kalei ti jo kae.”

¹⁰ Abimelech in ahnenga, “Kanchunga heimo natlo jo? Nanuhmei hi kami inkhat in kabeitak a aleijepui theia kae, kanṭhena hei kha nang mô rônna aleikachang sik kae,” ati.

¹¹ Khana Abimelech in mi rakip hneng, “Tu achang inum, hiva mipa leh anuhmei chunga ṭhatmak omchen katlo mi kha that sik kae,” tia gîkna aleinei jo heia kae.

¹² Khana Isaac in khava ram a khan sachi hmuchi aleivor, khava kum a khan aleivor kanek a aja 100 kapunga aleilōk a kae, ajârchu Rōngpu’n ama vâng apek a kae.

¹³ Ama hong kahao chet-chet a mi kaneitak hongkachang jo.

¹⁴ Ama’n kemōng rup katamtak, se katamtak leh sōk hingja anei jâra achunga Philisti he’n anthang leikase jo.

¹⁵ Khava jâra apa Abraham hringlaia asōk-hei aleimancho tuikhurhei kha Philisti he’n ralei anleivûm mansip pek joa kae.

¹⁶ Khava pha Abimelech in Isaac hneng, “Kanram dahlon jo roh. Nang keini nek a naratha kangar chet jôk jo che,” ahong ti.

¹⁷ Khava jâra Isaac in adahlona Gerar phaichama arabuk inn amatunga pha chomkhat leika-om.

¹⁸ Ama’n, apa Abraham hringlaia anta leikhōr tuikhurhei khana apa athisōa Philistihei tavûm mansip kha akhor pet nôk a apa’n aleiphō rahming kha amanrôn et nôk heia kae.

¹⁹ Isaac sōk he’n phaichama khan tuikhur inkhat ankhora tui anleihmu.

²⁰ Gerara se kakhemhei leh Isaac se kakhemhei khava tuikhur chunga innâk heia anmani’n, “Kanta kae,” anti. Khava jâra Isaac in tuikhur kha, “Innâk,” tia aphō jo.

²¹ Isaac sōk he’n tuikhur hlop inkhat ankhor nôk, khava chunga kha’num innâkna kasōk nôk, khava jâra tuikhur rahming kha, “Enkada” tia aphō.

²² Ama khava hmun a inphut inthona tuikhur hlop inkhat akhor nôk. Khana khan chu innâkna sōk mak jo. Khava jâra ama’n tuikhur kha, “Ning leh hnōm” tia aphō. Ama’n ati, “Tûnchu Rōngpu’n hiva ram hi ning leh hnōma omna sik apek jo me, khana hinahin kahao sik jo me.”

²³ Isaac in khava hmun adahlona Beersheba a inthon jo.

²⁴ Khava jân a Rōngpu’n Isaac hneng inlâra, “Kei napa Abraham Pathen eng kae. Ṭimak roh; ke’n ka’nṭhōipui che. Ke’n nang vâng kapek sik che. Kasōk Abraham hnenga kaṭong leitep jâra nang sōn leh pâr katamtak kapek sik che,” ati.

²⁵ Isaac in khava hmun a khan maichâm inkhat asyema Rōngpu kha akamuk. Khava sōa ama’n rabuk-inn amatunga khana asōk he’n tuikhur alak inkhat anleikhōr.

Isaac leh Abimelech Inhnōmna

²⁶ Gerara inphut Abimelech leh Ahuzza inti aṭong insepa leh aremi hlamkakei Phicol kha Isaac inhmupui sik a kahong heia kae.

²⁷ Khava jâra Isaac in ader, “A’nthloppui hnōmlo chea narama inphut nahnong sōt jo enga, tûn kei inhmupui sik heisa mo akahong che?”

²⁸ Anmani’n anmasôn, “Tûn nang hi Rōngpu’n mahâmṭhat apek che ti kanmanhret jo, nang leh keini kaṭhatak a inchamna ninei sik a kanmandon jo.

²⁹ Keini’n nang heite kanta sukset mak che kapōa nang inum keini nasukset mak sik unga na’ntep sik kanmadu. Nang kanlei lungset che khana kahōitak a kanta mansesōt che kae. Tûnchu Rōngpu’n vâng apek che ti hi inchên jo.”

³⁰ Isaac in revei atlopek heia, anmani’n ansâk an-ina kae.

³¹ Ajîng jîngkâr hmatak mi inkhat et in ṭong intepna anleineia intepna vâng ṭong ankam jo. Khava sōa Isaac in mathlâna anei heia ṭhōnsa changtak a inṭhen jo hei.

³² Khava ning khan Isaac sōk-hei kahong heia anmani’n anta leikhōr tuikhur chunga anleimanthei. “Keini’n tuikapût kanhmu jo,” anti.

³³ Ama’n khava tuikhur kha, “Intepna” tia aleiphō. Khang’khan Beersheba khōpui khan khava rahming kha aleichen jo kae.

Esau Nuhmei Ramlak Mihei

³⁴ Esau kum 40 atluk pha, Hit jât nuhngâk 2 aleiompui hei, Beeri sanu Judith leh Elon sanu Basemath kae.

³⁵ Anmani hin Isaac leh Rebecca hringkhō malung châmna anlei mannei hêr hei.