A’NPHUTNA 23 - LEKHARABU INTHENG (BSI)

Sarah Kathia Abraham in Thlân hmun Arachôk

¹ Sarah kum 127 katlung kahring.

² Ama Canaan ram a Hebron khōa kathi, khana Abraham in aralum ade.

³ Ama’n anuhmei kalōng jena hmun kha adahlona Hit-hei hneng kasea avahri,

⁴ “Kei hinahin nankâra khōhme inkhat a ka-om eng; kanuhmei hrena sik ram ahlek kahnenga ajōrpek ruh.”

⁵ Anmani’n anmasôn, “Apu, kan-ṭong rangei roh, keini’n nang hi hlamkakei ratha kaneitak inkhat a kanhmu che.

⁶ Thlân kaṭhapen kantanei inkhat a nanuhmei kha hre roh. Amanu hrena sik thlân kanpek hnōm et sik che.”

⁷ Khava pha Abraham, anhmai kunga inkuna

⁸ ahri, “Nangni’n hinahin kanuhmei hi hre sik nanhnōm inchu, Zohar sapa Ephron kha aderpek ruh,

⁹ ahleihmor leh inhnai Machpelah hlungkōk kha kei hneng ajōrna sik a.”

¹⁰ Khōpui kot kunga intûpna hmun a khan Ephron khet um alak Hit-hei leh le’n ong hei; ama’n a’n-ong hei seng tatheia, aleimasôn,

¹¹ “Apu, rangei roh! Kahlei akhenga leh ashunga hlungkōk kha kapek sik che. Ke’n hinna kamihei hmaikunga hin, nanuhmei nahre theina sik, sova so kapek sik che.”

¹² Tâk-kha Abraham in Hithei hmaikunga inkuna,

¹³ khana an-khenga tathei sik a Ephron hneng ahri, “Lungset a arangei pek ruh tia kangek chei, ahlei akhenga rachôk rong. Aman kapek hi alopek ruh, khana ke’n kanuhmei sona son hre jo rong.”

¹⁴ Ephron in amasôn,

¹⁵ “Apu, ram man chu dangka 400 rōk kae. Eini kâra khava khachu heite changmak? Nanuhmei kha khan vahre roh.”

¹⁶ Mihei tatheia Ephron ṭonghri kapōhrep a Abraham in kahnōma dangka 400 kha invei katlohei tena dungjuia aleipek jo.

¹⁷ Khang’khan Ephron karōi Mamre nisōtinga Machpelah kha Abraham ta leikachang jo. Ahlei, ashunga hlungkōk leh hlei hnōmkea thingkunghei inveisapet heia kae.

¹⁸ Khana an-intûp ninga aka-om Hit-hei seng in Abraham ta kachang jo tia anmanhret pet jo.

¹⁹ Khava sōa Abraham in anuhmei Sarah kha Canaan ram a khura khan ahre joa kae.

²⁰ Khava jâra khan Hit-hei hlei kha leh hlungkōk kha thlân hmun sik a Abraham ta kachang jo.