A’NPHUTNA 22 - LEKHARABU INTHENG (BSI)

Isaac Tōksōtna sik Pathen Ṭongpek

¹ Pha ṭhahrep khat sōa Pathen in Abraham kha enmansinna aleineia, “Abraham” tia abek. Abraham in amasôn, “Hôi, hin ka-om eng.”

² Pathen in, “Inkhat rōk nanei, na-lungset tak nasapa Isaac kha ṭhōi ina Moriah ram a se ruh. Tlâng inkhat kamanhmu sik che, ama kha ro-in-thoina tlo inna kahnenga heitōk roh,” ati.

³ Ajînga jîngkâr hmatak Abraham kathōia thing ṭhahrep atan a sha-kōrtung chunga aleimanrôna Isaac leh asōk 2 aleiṭhōi jo hei. Anmani Pathen in aleihri pekna hmun kajōna leikase hei.

⁴ Ni 3 tluk ning ahmun kha kahlatak a inphut Abraham in aleihmu.

⁵ Khava pha ama’n asōk-hei hneng ahri, “Shakōrtung leh hinahin leiom ruh. Naipangpa leh kei sona sōn kase sik unga kha kanva kamuk sik, khava sō leh nanhnenga hong inle sik ung.”

⁶ Abraham in Isaac kha inthoina sik thing alei manchoi khana ama’n hmei mansûkna sik hmeira-ê kahring leh chem aleichoi. Khanga ansepum a

⁷ Isaac in, “Apa!” tia abek. “Hôi, sapa heimo?” tia ama’n ama sôn. Isaac in ader, “Thing leh koila nanei chu kahmu, tâk ro-inthoina tlona sik kemōngte-e khon mo ka-om?”

⁸ Abraham in amasôn, “Pathen in inkhat apek sik me.” Khana an-inhnia khanga leikase hei.

⁹ Pathen in aman theina hmun anheitlung pha, Abraham in maichâm inkhat asyema khava chunga thing ada jo. Ama’n asapa akhōp a maichâm chunga thing adana chunga ada jo.

¹⁰ Khava sōa that rong tia chem kha akalâng jo.

¹¹ Tâk-kha marvâna inphut Rōngpu ngeva’n ahei bek, “Abraham, Abraham!” Ama’n, “Hôi, hin ka-om eng,” tia amasôn.

¹² Ama’n ati, “Naipangpa kha tônthei mak tin, heite tlothei mak tin. Tûnchu nang in Pathen nakaja, aṭong najui ti kamanhret jo; ajârchu nasapa inkhat rōk nanei kapha’m ahnenga maner mak che.”

¹³ Abraham in asîr-apang a-en pha akahnungting kemōngche inkhat thingbura araki intok a ka-om ahmu jo. Abraham kasea kemōngche kha avasura asapa kahlanga ro-inthoina sik a atōk jo.

¹⁴ Khava jâra Abraham in ahmun kha “Rōngpu’n apek”, (Jehova Jire) tia arahming aphō, khana tuning katlunga mihe’n “Rōngpu tlâng chunga ama’n apek,” anlatia kae.

¹⁵ Vōihni tlukna Rōngpu ngeva’n marvâna inphut Abraham kha ajōng bek,

¹⁶ “Hivahi Rōngpu ṭonghri kae, kei katak khet in a’ntep eng kae, khachu nang kalentak a vâng kapek sik che. Ajârchu, hivahi natlosōt jo khana nasapa inkhat rōk kha kahnenga pek sik maner mak che.

¹⁷ Kei intep eng khachu nasōn-napâr chunga ârsi ja kapō khana tuipui panga nêrdi ja kapō kapek sik che. Nasōn-napâr he’n an-indōipui hei antator sik hei kae.

¹⁸ Nang in kaṭong pek najui jâra, nasōn-napâr hei vâng kapek hei kapōa jât rakip he’num vâng chenna sik ander sik eng,” ati.

¹⁹ Abraham in asōk 2 hei hneng khan inlea anmani leh ama omna Beersheba ting kahongsap jo hei.

Nahor Sōn leh Pârhei

²⁰ Pha ṭhahrep sōa Abraham in anaipa Nahor kha anuhmei Milcah in sa 8 aneipek ti amanhret jo.

²¹ Upapen in Uz, anaipa Buz, Aram apa Kemuel,

²² Chesed, Hazo, Pildash, Jidlaph khana Rebecca pa

²³ Bethuel. Abraham naipa, Nahor kha Milcah’n sapa 8 aneipek hei.

²⁴ Nahor nuhmei manbonu, Reuma sahei kha Teba, Gaham, Tahash leh Maacah hei kae.