AMOS 7 - LEKHARABU INTHENG (BSI)

Khaikhu Katla sik Hmangtalâr

¹ Akahratpen Rōngpu a inphut hmangtalâr inkhat kaleihmu. Khana khan rengpa kahar chen sik kha an-âtsō lim leh kahardông ahongkektak a khan ama’n khâikhu rup asyem hei kha kaleihmu.

² Kahmangtalâr a khan ram shunga phidông rakip khâikhu he’n antasâkpet kha kaleihmu, khan ke’n kati, “Chunghnung Rōngpu, namihei rangei mandam hei roh! Anmani heikhong inmo akahringtor sik hei? Anmani katlôm hei khana katlasam hêr hei!”

³ Rōngpu’n amalung athlenga ahri, “Natahmu kapōa sōk mak jo ning.”

Hmei Hmangtalâr

⁴ Chunghnung Rōngpua inphut hmangtalâr hlop inkhat kahmu nôk. Khana khan ama’n amihei kha hmei vânga karâkna pek sik a amantluk kha kahmu. Hmei khan ralei thōia tui-ôngpui kha akângsō jo, khana ralei kâng sik a aphut jo.

⁵ Khava pha ke’n kati, “Hai roh, Chunghnung Rōngpu! Heikhonga mo namihei akahringtor sik hei? Anmani katlôm hei khana katlasam hêr hei.”

⁶ Rōngpu’n amalung athleng nôk a ati, “Hivahi’m sōk mak jo ning.”

Tena Tekam Hmangtalâr

⁷ Rōngpua inphut hmangtalâr hlop inkhat kahmu nôk. Khana khan atena tekam inhmanga bang insak hnenga ama akangir kha kahmu, akut a tena tekam kha achoia kae.

⁸ Ama’n ader eng, “Amos, heimo nahmu?” Ke’n kamasôn, “Tena tekam.” Khava sōa ama’n ati, “Kamihei kha tena tekam leh a’ntōkmak bang kapō anchang kha manhretna sik a hivahi kahmang kae. Anmani karâkna pekna kha avea kamalung thlengmak jo ning.

⁹ Isaac sōn leh pârhei kamukna hmunhei kha suk manhmanga ka-om sik. Israelhei hmun intheng hei kha a’nhmang chera dahlona ka-om sik hei. Ke’n Jeroboam phung hrui kha kamanbâng sik jo.”

Amos leh Amaziah

¹⁰ Khava sōa, Bethel a thempu Amaziah khan Israelhei Reng Jeroboam hnenga ṭong amathlunga: “Amos in mihei kâra nang kadôia ṭōn amantluk jo. Ama ṭonghri hei khan ram amanhmang sik jo.

¹¹ Ama tahri kha hivahi kae: ‘Rehmun a Jeroboam kathi sik, khana Israel mihei miram a rehringa ankei sik hei,’ ati.”

¹² Amaziah khan Amos hnenga ati, “Khavakha katluk jo, sânkathempa! Judah ram a inle jo roh, sona son vahri jo roh. Anmani’n khava sik a aman pek che rasoh.

¹³ Avea Bethel a hin hrimak jo roh. Hivahi rengpa kamukna hmun kae, jât-hei bek-inn kae.”

¹⁴ Amos khan amasôn, “Kei hi aman pek a ṭong kasân sânkathem kha changmak eng. Kei chu sekakhem eng kae, khana theichangkung akahrung mi eng kae.

¹⁵ Tâk-kha Rōngpu’n kakemōng khemna inphut aṭhōisōt enga ami Israelhei hneng ṭong kasânsōt a akahong sik a ṭong apek eng kae.

¹⁶ Khava jâra tûnchu Rōngpu’n heimo ahri rangei roh. Nang in kaṭongsânsōt bângna sik a Israelhei dōina ṭong bângna sik a namanthei eng.

¹⁷ Khava jâra, Amaziah, Rōngpu’n nahnenga ahri, ‘Nanuhmei kha hlamlen heia noti hongkachang sik, khana nasahei kha rehmun a anthat sik hei. Naram insem sik hei, khana mihlop-hei hneng inpek sik hei, khana natak khet um khōvelhei ram a kathi sik che. Khana Israelhei kha anrama inphut rehringa ankei sik hei.’”