AMOS 6 - LEKHARABU INTHENG (BSI)

Israel Suk manset a A-om

¹ Ziona kahōitak a ka-om khana Samaria a ka-ôrtak a ka-om nangnihei sik a heituk a ṭit ka-ompek chei mo, jât kalen Israelhei hlamkakei kalenhei, mipui in inthōpuina kangek sik a anta heisor jo hei, nangni!

² Se una Kalne khōpui enruh. Khava sōa Hamath khōpui kalena khana abâna Philisti khōpui Gath a sesuk ruh. Israel leh Judah rengramhei kanek a, sohei so kaṭhachet hei mo? Nangni ram kanek a anmani ram akalen jôk mo?

³ Nangni insuk inhmangna kani inkhat kahong sik ti hi hnōm mak chei, tâk nanṭōn tlohei khan chu khava kani kha ahei manhnai chet a kae.

⁴ Ret kaṭhatak jekhum chunga inthlonga, kemōng chete leh kemōng rala hme vânga revei katlo nangni heituk a ṭitpek aka-om sik chei mo!

⁵ David kapōa hla phō sik nanmadu, serângdâr manjui sik nanmadu.

⁶ Kōklei kasip tlit a ju nan-in, marim katui thai nan-in no, tâk Israel inhmangna chunga chu ṭajai suimak chei.

⁷ Khava jâra hmatak a rehring sura akase sik kha nangni chei kae. Nanrevei sâktlâng kabâng sik jo.

⁸ Chunghnung Rōngpu’n hiva mansena ka-ôrtak hi apek jo: “Israel mipuihei inlensakna kha kamater; an-innpuihei heitea sak pek mak eng. Akhōpui kalen leh ashunga ka-om rakip an-inrepuihei kapek sik hei.”

⁹ Innshung inkhat a mi 10 dahlona an-om inchu, anmani kathi sik hei.

¹⁰ Mikathipa inkō mi, akathi kahre sik a a’nṭangpa khan, innshunga inphut kathi kalōnghei alosōt sik. Inkō mi khan innshunga dahlona alaka-om hei kha abek sik hei, “Khana khan tu-tu mo alaka-om chei?” “Tûte om mak!” tia rasâ inkhat in ahei masôn sik. Khava pha inkō mi khan, “Sip ti roh! Rōngpu rahming kapha niphâkmak sik kae,” ati sik.

¹¹ Rōngpu’n ṭong apek pha khan inn kalen, inn kasinhei avōk khōipet sik jo hei.

¹² Shakor he’n hlungpui chunga akatlân hei mo? Tu inkhat in tuipui shunga sehratche vâng hlei akhōi mo? Tâk-kha nangni chu akadik kha tûr nanmanchang jo, akadik kha akaṭhe nanmanchang jo.

¹³ Lodebar khōpui nanhlō jâra inlensak chei. Nangni inlensak cheia, “Karmaim kahlō sik a katluk a ratha kannei jo,” nanti.

¹⁴ Akahratpen Rōngpu Pathen ama khet in ati, “Israelhei, nanram kahlō sik a miram remi kahei tir sik kae. Khahei khan sak tinga Hamath Rakanna, thlang tinga Arabah kavadung, katlunga ansuk manrim sik chei.”