Te Tua-Kaua 9 - Te B'aib'ara

Buokakiia Kaain Iteraera Iroun te UEA Ao e taku Moote nakoia Iteraera:

¹ Kam na ongora Iteraera irou. Kam a kaan ri nanon te karaanga are te Ioretan nakon te aba ma ni kakionakoia botannaomata ake a maeka ikekei. A boni korakora riki nakoimi, ao a rietaata nako karawa oon aia kaawa.

² Tabeman mai buakoia aomata aikai, a riki mairouia taian Anakim. Kam bon atai aron korakoraia ma marurungiia, ao kam na bae n tia naba n ongongo taekaia b'a a bon tuai mani konaaki n te buaka.

³ Ma E a tia ni berita te UEA ae Atuami b'a E na ririmoami, kaanga ai aron te ai ae kabuebue ae kabueki b'aai ni kabane mai m'aaini kawaimi. Ma ngaia are, ngkana kam buakaniia ami kairiribai, ao e na bon rangi ni bebete iroumi ngkana kam tiringiia man taua te aba.

^4-6 Ao ngkana E buokingkami te UEA n tiringiia botannaomata ake tekorakina man taua abaia, ao kam na tai taku b'a E karaoa aei i bukina b'a aomata ngkami aika raoiroi. Kam aki raoiroi--kam bonotaninga. Bon tiaki ngaia anne, ma E nang bon buokingkami te UEA, i bukina b'a a buakaka botannaomata ake a maeka ikekei, ao i bukina naba b'a E tangiria ni kaawakina ana Berita are karaoia ma ara bakatibu ake Aberaam, Itaaka, ao Iakob'a.

Tuaan Iteraera Ngkana E karaoa Te Bouananti Ao e taku Moote nakoia Iteraera:

⁷ Kam na aki m'am'aninga aromi ngkoa ni kakaitaraa te UEA ma ni kakaunna n taai nako ngke kam mena i nanon te rereua. Kam a boni kakaitaraa naba ni moa mangke kam kiitana Aikubita ni karokoa te tai are kam roko iai ikai.

⁸ Kam rangi ni kauna naba te UEA n te Maunga are Tinai n te aro are E nang kamateingkami.

^9-11 E riki naba i nanon 40 te bong ma te ngaina ngke I mena i aon te Maunga ma n aki am'am'arake ao n aki momooi. E tuangai b'a N na tam'arake b'a E na anganai taiani boraraoi ake E a tia ni karaoi ma ngaira. Ao taiani boraraoi aikai bon taian Tua ake 10 ake E a tia ni katanoatai nakoimi ngke E taetae nakoimi man te ai mai aon te maunga. E a tia te UEA ni koroi ni baina i aon 2 atiibu aika raababa. Ma i mwiin anganakiu atiibu akana 2,

¹² ao E taku: Moote, ko na kawaekoako n ruo man te maunga nakoia aomata ake ko kaotinakoia mai Aikubita. A tia n aki ongotaeka nako Iu, b'a a karaoa te bure ae moan te buakaka are karaoan te bouananti.

¹³ I a tia ni matakuakiniia kaain Iteraera ma n nooriia b'a ngaia bon aomata aika rangi n taningabono ma ni kamangao.

¹⁴ Ma ngaia are, ko na aki manga tautauai. N nang kamaunaia, ao akea man te aonnaba aei ae na manga ataia b'a a bon tia ni maiu. Ao N na kabuuburaa ma ni kakorakora riki kanoam nakoia aia botannaomata Iteraera.

Ao e taku Moote nakoia Iteraera:

¹⁵ Ao e tiinako te ai ae korakora mai taubukin te maunga ngke I a ruorikaaki, ma ni uouoti taian atiibu ake uoua akekei ma tuua ake 10 i aoia

¹⁶ Ao I noori aromi b'a kam waekoa ni karaoa te bure, ao n aki ongotaeka nakon te UEA ae Atuami. Ao kam a taromauria te bouananti ikekei ae karaoaki man te biti ae kam karaoia b'a katotongan te kao teteei.

¹⁷ Ma ngaia are, I bouai atiibu ake uoua i matami.

^18-20 Ao I bobaraaki n te tabo n taromauri, ao I tataro nakon te UEA, ao I aki am'am'arake ma ni mooi i nanon 40 te bong ao te ngaina. Kam a tia ni karaoa te bure ae rangi ni buakaka are karaoan te bouananti, ao E bon rangi n ribaa te b'ai are kam karaoia te UEA. Ao E rangi n maraki nanona n te aro are E na boni kamaunaingkami ni kabane n reitaki naba ma Aaron. Ma ngaia are, I tataro i bukimi, ao i bukin naba Aaron n aron are I karaoia naba ngkoa, ao E kaekai au tataro te UEA n te tai aei.

²¹ Bon te bure ae kam karaoia ngke kam karaoa te bouananti, ma ngaia are, I karenakoi nakon te ai ni manga karanna. Ao i mwiina I anaa te koora, ao I kamantintia ni kabubua, ao I a karenakoa nako nanon te karaanga are raanga rikaaki man te maunga.

²² Ao kam kauna naba te UEA ngke kam tiku i Tabera, i Mata, ao i Kiberota Ataawa.

²³ Ao E a manga taku te UEA i mwiina i Kaatetib'aania, I anganingkami te aba, ma ngaia are, kam na nako n taua. Ma i bukina ngke kam aki onimakina te UEA, ma ngaia are, kam kaaitaraa, ao kam aki ongotaeka nakon ana Tua.

²⁴ Ni koauana raoi, ao kam kakaitaraa te UEA ni moa man te tai are E a tia ni kinaingkami iai.

²⁵ Ao i mwiin karaoan te bouananti are tamnein te kao teteei, ao E taku te UEA b'a E na tiringingkami. Ma ngaia are, I bobaraaki i matan te Um'antabunrianna i nanon 40 te ngaina ma te tairiki.

²⁶ Ao I tataro: Ara UEA, taiaoka n aki kamateia am Aomata. Ko a tia ni kamanenaa m'aakam ae korakora ni kamaiuia ngkoa mai Aikubita, ao Ko karikiia b'a am Aomata ni koaua.

²⁷ A kakaonimaki nakoim ara bakatibu ake Aberaam, Itaaka, ao Iakob'a. Ko na uringiia, ao ko na aki uring aia taningabono, aia buakaka ao aia bure Iteraera te UEA.

²⁸ B'a ngkana ko tiringiira, ao ane a na kaangai kaain Aikubita E berita ngkoa te Atua b'a E na anganiia Iteraera te aba, ma bon akea m'aakana ni kaawakina ana Berita, ao ni koauana, E bon rangi n ribaia n te aro are E kairiia nakon te rereua n tiringiia iai.

²⁹ Ma Ngkoe ara UEA, ko rineia Iteraera b'a am Aomata ni koaua, ao Ko kamaiuia ni baim ae m'aaka mai Aikubita.