Te Tua-Kaua 34 - Te B'aib'ara

Maten Moote

¹ Ao i mwiin tabeua te tai, ao e kiitan aaba ake a rinano ake i Moaaba Moote. Ao e waerake man te Maunga are Bitika nako taubukin te Maunga are Nebo, are e mena n iteran te Karaanga are Ioretan ni kaaitaraa Ieriko. Ao E kaotii taian aba ni kabane nakoina ni karokoa Kireata i meang ma te kaawa are Taan.

² E kaoti taian aba nakon Moote ake a nang b'ainaki irouia baronga are Nabetari, Eberaim, Manate, ao Iuta ni karokoa Taari are te Mereterenian n te tai ae aki maan.

³ Ao te UEA, E kaota naba nakoina te aba are i maiaki, are moa man te m'arua are i rarikin kaawan Ieriko, are ataaki n arana ae Kaawan Kaai aika Baam, ni manga ruorikaaki nakon te kaawa are Toa.

⁴ Ao E taku te UEA, Moote, aio te aba are I taekinna ngke I berita nakoia Aberaam, Itaaka, ao Iakob'a b'a N na anganiia kanoaia. I a tia ni kaotia nakoim, ae ko na aki ri nanon te Karaanga are te Ioretan ma n rin n te aba arei.

⁵ Ma ngaia are, e mate ana Toro te UEA are Moote ikekei i aon Moaaba n aron are a tia n taekinna te UEA.

⁶ Ao E taunna te UEA n te m'arua are i rarikin te kaawa are Betabeora, ma e aki roko n te ataaki raoi te tabo are taunaki iai.

⁷ E mate Moote ngke ai 120 ana ririki ni maiu, ao a bon raoiroi naba ana taratara, ao e marurung rab'atana.

⁸ Ao a tiku Iteraera n aaba ake a rinano i Moaaba, ike a tanginiwenei iai i bukin Moote i nanon 30 te bong, n aron aia katei.

Rikin Iotua B'a Te Tia Kairiri I Aoia Kaain Iteraera

⁹ Ao i m'aain maten Moote, ao e a tia ni katokaa baina i aon Iotua, ao E a tia te UEA n angan Iotua te wanawana. Ao a kakauongo raoi Iteraera nakon baike e taekin Iotua ma n ongotaeka nakon taian tua ake E a tia te UEA n angan Moote.

Moote, Te Buraabeti Ae Rangi N Ataaki

¹⁰ Bon akea riki te burabeti i aon Iteraera ae katotonga Moote. E taetae te UEA ma ngaia n itaramata

¹¹ ao E kanakoa b'a e na karaoi taian kakai aika m'aaka i matan uean Aikubita ma ana botannaomata ni kabane.

¹² Bon akea ae iai m'aakana ni karaoi m'akuri aika ab'ab'aki n aron are karaoia Moote b'a a na nooria aomata nako.