Te Tua-Kaua 23 - Te B'aib'ara

Aomata Aika Aki Tau N Riki B'a Ana Aomata Te UEA Ao e taku Moote nakoia Iteraera:

¹ Ngkana arona b'a e a tia ni manatua maangen te m'aane, ke ni koreaki ni kanakoaki ana buakaka, ao e na bon aki kona n riki b'a ana Aomata te UEA.

² E na aki riki b'a ana aomata te UEA te aomata ae aki mare tamana ma tinana. Ao a na bon aki riki naba kanoana b'a ana Aomata te UEA ni karokoa te katebwina n roro.

³ Bon akea kaain Ammon, ao kaain Moaaba, ni karokoa naba te katebwina n roro man kanoaia ae na riki b'a ana Aomata te UEA.

⁴ E riki aei nakoia i bukina b'a ngke kam otinako mai Aikubita, ao a aki karekei kanami ma nimam, ao i rarikin anne, a kabooa naba B'araam b'a e na katekebuakaingkami.

⁵ Ma E tangiringkami te UEA ae Atuami, ao E aki kan ongo iroun B'araam, ao E a manga onika ana katekebuaka B'araam nakon te kakab'aia.

⁶ Kam na bon aki iangoa naba teutana taekan karaoan te boraraoi n raoi ma kaain Moaaba ke Ammon.

⁷ Ma kam na aki ribaia kaain Etom b'a bon ami koraki, ao kam na aki ribaia naba kaain Aikubita b'a kam maeka ngkoa n iruwa i abaia.

⁸ Kam na kariaia tibutoruia b'a a na kona n riki b'a ana Aomata te UEA.

Kaawakinan Aia Maeka Tautia B'a E Na Butim'aeaki Iroun Te UEA Ao e taku Moote nakoia Iteraera:

⁹ Ngkana kam nako ngkami m'aane ni buakaniia ami kairiribai, ao kam riai ni kakoaua raoi b'a e nakoraoi ami maeka i matan te UEA.

¹⁰ N aron aei, ngkana iai te b'ai ae riki ni kam'araa iai te m'aane ngke tairiki, are na riki n aki tau iai nakon taromaurian te UEA, ao e na nako tinanikun te maeka ma n tiku ikanne

¹¹ ni karokoa te b'akantaai. Ao i mwiina, e a tib'a kona n tebotebo, ao e a kona n okira te maeka ngkana e a bung taai.

¹² Kam na karaoa te tabo teuana i tinanikun te maeka ae te tabo n nakotinaniku.

¹³ Ao kam na bon riai n toa ma te tiabora ae uarereke b'a raon ami b'ai n taai nako. Ngkana kam otinako nakon te tabo n nakotinaniku, ao kam na kabongana te tiabora anne ni kena iai ami tabo n nakotinaniku. Ao ngkana kam a tia ao manga tauna mwiimi.

¹⁴ Kam na kaitiaka ami maeka man b'aai aika kam'araa ao ma ni b'aai aika ribaaki. E memena te UEA n ami maeka n taai nako, n tatauraoi ni kamaiungkami ma n anganingkami te tokanikai i aoia ami kairiribai, ma ngkana E noora te b'ai ae kam'araa i nanon ami maeka, ao E na bae rairaki ma ni kitana te tabo anne.

Taian Toro Ake A Birinako Man Aaba Tabeua Ao e taku Moote:

¹⁵ Ngkana a roko i aon Iteraera tooro aika birinako man aaba tabeua i bukin kamanoaia, ao kam na aki anga nakoia aia toka.

¹⁶ Ma, kam na anganiia te inaomata n rinea te kaawa teuana man ami kaawa b'a e na maeka iai. Kam na aki karaoa te m'akuri n iowawa nakoia tooro aika birinako.

Kameakaan Te Tembora Ao e taku Moote:

¹⁷ Kaain Iteraera, bon akea mai buakomi ae na riki b'a ainen matawaan te tembora.

¹⁸ Te UEA ae Atuami, E bon rangi n ribaia m'aane ma aine aika karaoi aekaki ni m'akuri aikai, ao E na bon aki butim'aai aia b'aintangira, e ngae ngkana E a tia ni berita nakoia.

Taian Raka N te Roun Ao e taku Moote:

¹⁹ Ngkana ko anga te m'ane ke te am'arake, ke te b'ai teuana ni kataarauia Iteraera iai, ao ko na aki anaa te raka.

²⁰ Kam ti kona n anai bakaon aia taarau ianena. B'a ngkana kam bakaoni aia taarau Iteraera tabeman, ao E na aki anganingkami te tetekeraoi te UEA n te aba ae kam nang abanna.

Te Berita Ae Tabu Nakon Te UEA Ao e taku Moote:

²¹ Kaain Iteraera, ngkana kam karaoa te berita ae tabu b'a kam na anga ami b'aintangira nakon te UEA, ao kam na karaoia naba n te tai ae waekoa, b'a ngkana E roko te UEA ni kakaea te b'aintangira are ko berita iai, ao ko na bure n urua te berita ngkana ko tuai n anga am b'aintangira.

²² E raoiroi naba ngkana kam aki karaoa te berita, b'a kam aki kona n reke n te bure n urua te berita iai.

²³ Ko na riai ni kaawakini ami berita ni kabane ake kam karaoia nakon te UEA. Boni ngkoe ae ko baaireia b'a ko na karaoa te berita, ao akea ae imanonoiko.

Kanakin Uaan Arokan Te Aomata Temanna

²⁴ Ngkana kam nakon ana nnenikureebe temanna, ao kam kariaiakaki ni kang kureebe n aron are kam tangiria ngke kam mena ikanne. Ma kam na aki uotinako tabeua ngkana ko nako.

²⁵ Ao ai arona naba ngkana kam mena n ana katawanang temanna, kam kona n anai tabeua taian uita, ma kam na aki koroi uita ma n uoti nakon ami auti.