Te Tua-Kaua 2 - Te B'aib'ara

¹ Ti kabanei ririki aika bati n tiotionako i tinanikun aaba ake a tabukibuki i Teira,

² ni karokoa E taku te UEA: “Moote,

³ e a bati n tau tiotionakoia Iteraera n aaba aika tabukibuki aikai. Manga rairaki ao nakoiang.

⁴ Ao anganiia aomata kaetieti aikai: ‘Taratara raoi, b'a kam nang ri nanon te aba are abaia ami koraki, ake kanoan Etau n te tai ae aki maan. A maakuingkami,

⁵ ma kam na aki buakaniia. I a tia n anganiia aaba ake a tabukibuki ake Teira, ma ngaia are, bon akea ae I anganingkami mai iai, ao bon akea naba teutana ae na reke nnen waemi iai.

⁶ Kam na kabooi kanami ma nimami mai irouia ngkana kam ri nanon abaia.’

⁷ E a tia te UEA ni buokiira i nanon ririki aika 40 aika a tia n nako ngke ti mena i nanon te rereua ae korakora aei. A tia n reke iroura b'ai ni kabane aika ti kainanoi, ao E a tia naba te UEA ni kakab'aiaira ma ni kakatotokanikaira ni b'aai ni kabane ake ti karaoi.

⁸ “Ti ri rarikin te aba are abaia ara koraki, ake kanoan Etau. Ti toua kawain Arab'a are e moa mai maiaki i Erata ao Etion Keeb'a, ao i mwiina, ti a manga rairaki nakoni kawain te rereua are nako Moaaba.

⁹ E taku te UEA nako iu, ‘Ko na aki kataia ni buakaniia kaain Moaaba. Tai kumeia, b'a I a tia n anganiia te aba are arana Are nakoia, ao N na bon aki anganingkami teutana mai iai.’ ”

Baronga Ake A Maeka I Rarikin Kanaan

¹⁰ I m'aain are E anganiia abaia kaain Moaaba te UEA, ao a maeka ngkoa ikai te baronga teuana ae korakora. Bon taian Emim, ao bon ti te bo korakoraia ma taian Anakim.

¹¹ A aranaki irouia kaain Moaaba b'a taian Emim, ao tabeman a kabongana te ara ae Rebaim i bukiia taian Anakim ao taian Emim.

¹² A maeka ngkoa kaain Ora i Teira, ma a anaa te tabo anne kaain Etom A tiringiia kaain Ora aika bati, ao a kairoroia nikiraia b'a a na nako, n aron are a karaoia Iteraera nakoia aomata ake n aaba are E anganiia te UEA.

Touakin Nanon Te Karaanga (ae uarereke) Are Tereta Irouia Kaain Iteraera Ao E taku Moote nakoia Iteraera:

¹³ “Ao ngke ti roko n te karaanga are Tereta n tian Moaaba are i maiaki, ao E tuangiira te UEA b'a ti na ri nanon te karaanga are Tereta nako Moaaba, ao ti karaoa anne.

¹⁴ E riki aei 38 te ririki i mwiin kiitanakin Kaatetib'aania iroura, ao n te tai naba anne are a bane n tia ni mate m'aane ni kabane ake a tia n riki b'a tautia i Kaatetib'aania, n aron are taekinna te UEA b'a e na riki nakoia.

^15-16 Ao E teimatoa te UEA n tiringiia ni karokoa a bane ni mate.”

¹⁷ Ao E kaangai te UEA nako iu,

¹⁸ “Moote, Ko na ri rarikin te kaawa are arana Are, ao ri nanon tian Moaaba are i meang

¹⁹ nako Ammon. Ma kam na aki buakaniia kaain Ammon. I anganiia abaia, ao bon akea teutana ae N na anga nakoia Iteraera.”

Manga M'aitiia Riki Botannaomata Aika Maeka I Rarikin Kanaan

²⁰ I m'aain tauakin te aba irouia kaain Ammon are a tia n anga te UEA nakoia, ao a bon teimatoa naba tabeman taian Rebaim ni maeka ikekei, e ngae ngke a araniia b'a Tamtummim.

²¹ Te baronga ae te Tamtummim boni te baronga ae a korakora kaanga taian Anakim. Ma E buokiia kaain Ammon te UEA, ao a tiringiia kaain te baronga are tamtummim aika m'aiti, ao a kairoroia nikiraia b'a a na nako. Ao i mwiina, a tekateka kaain Ammon ikekei.

²² E buokiia te UEA n aron are a tia ni buokiia kaain Etom, ake a tiringiia kaain Ora aika m'aiti i Teira, ao a kairoroia nikiraia b'a a na nako, i m'aain tekatekaia.

²³ A mamaeka ngkoa te koraki n aomata aika Awim ni kaawa ake a nakoaiaki ni karokoa Kaata, ma a tiringaki irouia kaain Biritia ao a tekateka n abaia.

M'anangaia Kaain Iteraera I Aon Te M'arua Are Te Arenon Ao e taku Moote:

²⁴ “Ao ngke ti a tia n ri nanon Ammon, ao E taku te UEA nakoira: ‘Iteraera, baarongai ami b'ai, kab'arai ami autinrianna, ao ri nanon te M'arua are te Aremon nakon iterana are teuana. E wene tian aban te uea are Taion are maeka i Etibon n iteran te m'arua are teuana, ma I a anganingkami ngkai abana aei. Ma ngaia are, kam na buakanna, ao taua.

²⁵ N na karikiia kaain botannaomata ake tabeua b'a a na maakuingkami. Ane a ruru ni maaku ngkana iai ae taekiningkami, ao ane a na rangi ni maaku ngkana kam kaoti.’ ”

Konaakin Te Uea are Taion Are Maeka I Etibon Ao e taku Moote nakoia Iteraera:

²⁶ “Ao i mwiina ngke ti a tia n ri nanon te M'arua are te Arenon, ao ngke ti a tia naba ni kateimaeka n Rereuan Ketemota, ao I kanakoa te rongorongo nakon uean Etibon are Taion, ma n anganna au taeka b'a ti aki kan buaka ma ngkami. Ao I taku:

²⁷ “Taiaoka b'a a na ri nanon abam Iteraera, ao a na aki otinako man te kawai.

²⁸ Kam kona naba ni kabooi nakoira taian am'arake ao taiani mooi, ao ti na kabooa n te tirewa.

²⁹ Ti tii kainanoa rokora n te Karaanga are te Ioretan ma n ri nanona, i bukina b'a E a anganiira te UEA ae Atuara te aba are mai maeao. A tia kaain Etom ma Moaaba ni kariaia b'a ti na ri nanon abaia. Taiaoka, kariaia b'a ti na ri nanon naba abami.”

³⁰ Ma e rawa Taion ni kariaia b'a ti na ri nanon abana, i bukina b'a E boni karikia te UEA b'a e na taningamatoa, ma ni ingainga ni kan buakaniira.

³¹ Ao E kaangai te UEA nako iu, “N na buokiko ni kataenikaia Taion ma n taua abana, ma ngaia are, ko na buakanna.”

³² Ao ti aitara ni buaka ma ana taanga ni buaka Taion i Iaata,

³³ ao E buokiira te UEA ae Atuara ni kataenikaiia. Ti tiringa Taion, ma natina m'aane, ao kaain ana taanga ni buaka ni kabane.

³⁴ Ao i mwiina, ti taui ma ni kamaunai kaawa ni kabane ake n abanuean Taion, ma n tiringiia aomata ni kabane,

³⁵ ma ti kaawakiniia taian nanai ni man, ao b'aai aika kakaawaki.

³⁶ Ao E buokiira naba te UEA n taui kaawa ni kabane ni moa man te M'arua are te Arenon nako iaang nakon tian Kireata, n reitaki naba ma te kaawa are Aroera are i mataniwiin te m'arua, ao te kaawa are i nuukan te m'arua.

³⁷ Ma e ngae n anne, ao ti kararoaira man aia kaawa ni kabane kaain Ammon, ake aaba ake a tabukibuki ao ake i rarikin te Karaanga are Iaboka, n aron Ana mwioko te UEA.