Te Tua-Kaua 12 - Te B'aib'ara

Te Tabo N Taromauri I bukin Te UEA Ao e taku Moote nakoia Iteraera:

¹ N na tuangngkami tuua ma reirei aika kam na ongotaeka nako iai ngkana kam a maeka n te aba are anganingkami te UEA are Atuaia ami bakatibu, ni boong ni kabane aika kam maiu iai i aon te aonnaba.

² Ma a taromaurii atuaia tabeman botannaomata ake a maeka ikekei. Ma ngaia are, ngkana kam tia n taua te aba, ao kam na kamaunai ni kabane aia tabo n taromauri--ake i aoni maunga ao taian tabuki, ke ake i aan nuun kaai aika korakora.

³ Kam na urui aia baonikarea, aia nikawewe, ao kabuoki aia baangota ake a kabonganaaki i bukin taromaurian te anti te aine are Nei Aatera, ao urui aia bouananti. Urui aia tabo n taromauri ni kamaunanakoi b'a a aonga ni m'anuokinaki taekaia.

⁴ Kam na aki taromauria te UEA ae Atuami n aroia botannaomata aikai ngkana a taromauriia antiia.

⁵ Kam nang ri nanon te Karaanga are te Ioretan n te tai ae e aki maan, ao E na buokingkami te UEA ni kataenikaia ami kairiribai,

⁶ ma ni kamaekaingkami ma te rau n te aba are E a tia n anganingkami. Ma ngkana kam a tia n tekateka, ao ane e na manga kaokoro te maiu.

⁷ Kam na aki manga anga te karea n taabo nako ike kam tangiria ni karaoia iai, ma E nang rinea te tabo teuana te UEA i aon Iteraera ike kam na taromauriia iai.

⁸ Kam na uoti ami karea ma ami angab'ai nako ikekei, n reitaki naba ma te karea are kakukureian te UEA

⁹ ao taiani b'aintangira nako ake kam berita, ke kam anga nanomi b'a kam na anganna. Ao kam na anga naba kaka teuana te katebwina man ami uita, wain, ao man ami b'a n oriwa,

¹⁰ ao ai uana naba ma aia man aika karimoa n aia nanai ni kao, aia nanai n tiibu, ao aia nanai n kooti

¹¹ Kam na kang ami b'aintangira ao ami karea

¹² ngkami ma ami utu, ao ami toro, ao kam na bootaki n te tabo n taromauri, b'a E a tia te UEA ae Atuami n anganingkami te totokanikai ni b'aai ni kabane aika kam a tia ni karaoi.

¹³ Ao ngkai akea abaia kanoan Rewi, ao kam na kairiia tabeman mairouia nakon te bootaki.

¹⁴ N taai tabetai ao kam na tangiria n tiringa te man bon i bukin kanami, ao tiaki i bukin te karea.

¹⁵ Ngkana arona b'a E kakab'aiaingkami te UEA n anganingkami ami kao ke ami tiibu ke ami kooti aika m'aiti,

¹⁶ ao kam kona ngkanne n tiringa temanna b'a kanami n te tabo are kam maeka iai.

¹⁷ Kam kona ni kanna n aron kanakin irikon te ria, ke te katere ae konami ngkana kam kaeman,

¹⁸ ao a kona naba ni kang baikai aomata aika a kam'araa, ma a aki tau nakon te taromauri.

¹⁹ Ma kam na ti aki kana raraan te man, katinakoa moa raraana i aon tano.

²⁰ E a tia ni berita te UEA b'a E na manga anganiia riki abaia Iteraera rimwi riki, ao ane a na aki kona tabeman mairoumi ni m'ananga man ami auti nakon te tabo n taromauri n taai ake kam kani kana iai taa iriko.

²¹ Ma E na anganingkami te UEA te kao, te tiibu, ao te kooti, ao kam kona n tiring maan aikai ni mwengami b'a kanami n aron are kam tangiria.

²² Bon ti te bo ma kanakin irikon te ria ma te katere are kokonami ni kaeman. Ao n te aro aei, ao a kona naba ni kana te iriko aomata ake a kam'araa, ao a aki tau nakon te taromauri.

²³ Ma kam na aki kana te raraa.

²⁴ B'a boni maiun te man, ma ngaia are, kam na katinakoa nakon te tano i m'aain kanakin te iriko.

²⁵ Kam tangiria b'a E na katetekeraoingkami te UEA? Kam tangiria b'a a na tetekeraoi naba ami ataei ngkana kam a bua? Ma ngaia are, kam na karaoi b'aai aika E na kukurei iai te UEA, ao tai kana te raraa.

²⁶ A na bane taiani karea ma angab'ai nakon te UEA ni uotaki nakon te tabo are E a tia n rinei te UEA b'a taabo n taromauri.

²⁷ Ngkana kam anga karea i bukin kakukureian te UEA, ao a na bane ni kabuokaki taian iriko i aon te baonikarea. Kam kona ni kang iriko n aekaki ni karea nako, ma kam riai ni katiinakoi raraaia maan i aon te baonikarea.

²⁸ Ngkana kam ongotaeka nakon tuua aikai, ao kam bon karaoa ngkanne te b'ai are taku te UEA ae Atuami b'a e eti, ao e raoiroi. Ao E na buokingkami ma kanoami ni katetekeraoingkami.

Taromaurian te UEA n te Kawai ae Eti Ao e taku Moote:

²⁹ Iteraera, ngkana kam nakon te aba ma ni buakaniia botannaomata ake ikekei, ao E na kamateia te UEA ao kam na kona n anaa abaia.

³⁰ Ma n te tai aei ao kam na taratara raoi riki nakon are mai m'aaina n aki titiraki ni kaangai, A kanga aroia n taromauriia antiia, b'a ti na manga katotongi aroia n taromauri ngkana ti taromauria te UEA?

³¹ Kam na bon aki karaoa anne. B'a te UEA, E ribaai aroia botannaomata aikai n taromauriia antiia, i bukina b'a a kabuoki natiia m'aane ao natiia aine b'a aia karea.

³² Ongotaeka nakon taian tua ma reirei aika I anganingkami. Tai manga karakai riki tabeua nakon aikai, ao tai kaaki naba tabeua man aikai.