Te Kaotioti 17 - Te B'aib'ara

Motikan Taekan te Kabekaau ae Rangi n Ataaki

¹ Ao e roko temanna mai buakoia anera ake itiman ake iai i rouia boora ake itiua, ao a taetae nako iu, ni kaangai, “Mai ikai; N na kaota nako im motikan taekan te kabekaau are kakannato are tekateka i aon raan aika bati;

² are a wene ni bure ma ngaia uean aonnaba, ao are a manging i rouna kaain aonnaba ni wain n ana wene ni bure.”

³ Ngke I mena i aani m'aakan ana kairiri te Tamnei, ao E uotai nakon te rereua; ao I nora te aine ae tekateka i aon te man ae uraura ae tiritiri, aika a mena i aon rab'atana ni kabuta aara ni bakanatua, ao itiua atuna, ao tengauni korona.

⁴ Ao e kunnikaiaki te aine arei n te ura-roo ma te uraura, ao e katamaroaaki ni b'aai ni katamaroa aika koora ma atibu aika kakawaki ma moomi; ao iai te m'angko ae te koora i nanoni baina, ae te m'angko ae on ni baika riai ni bati n ribaaki, ma baika kammaira aika b'ain ana wene ni bure;

⁵ ao e koreaki i aon ram'ana te ara ae iai nanona ae raba, ao e kaangai te ara arei: “B'ABURON AE KAKANATO, AE TINAIA KABEKAAU MA B'AIN AON TE ABA AIKA RIAI NI BATI N RIBAKI.”

⁶ Ao I nora te aine arei b'a e manging n raraaia aomata ake a itiaki, ma raraaia ake a kamateaki i bukin onimakinan Iesu. Ngke I nora neierei, ao I rangi ni mimi.

⁷ Ao e kaangai te anera nako iu, “Ko aera ngkai ko mimi? N na tuangko nanon te baere raba are i bukin te aine ma te man are tiritiri are uota neierei, ae te man are itiua atuna ao tengauni korona.

⁸ Te man are ko noria bon iai ngkoa, ma akea ngkai: ao e nangi rierake mai Abuto, ma n nako n te kamateaki. Ao a na mimi akana maeka i aon te aba, akana aki koreaki araia ni bokin te maiu ma ngke a moa ni karikaki aonnaba, ngkana a nora te man arei b'a bon iai ngkoa ma akea ngkai, ao b'a e na manga kaoti.

⁹ “Aio nanona nakon ane iai nanona ae rabakau: Atu ake itiua boni maunga aika itiua aika e tekateka iai te aine; ao bon ueea aika itiman.

¹⁰ A b'aka niiman i buakoia man nakoaia n uea, ao e teimatoa uean temanna, ao are temanna e tuai n roko; ao ngkana e roko, ao e na uea i nanon te tai ae aki maan.

¹¹ Ao te man are iai ngkoa ma akea ngkai, bon te kawaniman, are temanna i buakoia ake itiman; ao e nako n te kamateaki.

¹² “Ao kooro ake tengaun, ake ko noori, bon ueea aika tengaun, aika tuai n reke ueaia; ma a anganaki te m'aaka n tautaeka ngkai kanga ueea, ti teuana te aoa, ni buoka ana tautaeka te man arei.

¹³ Ti teuana nanoia, ao a angan te man arei m'aakaia ma aia tautaeka.

¹⁴ Ane a na buakana te Tiibuteteei, ao a na konaaki aoia iroun te Tiibuteteei ma raona ake a weteaki ma n rineaki ake a kakaonimaki, b'a kioina ngkai te Tiibuteteei bon aia Uea ueea ao aia King kiing.”

¹⁵ Ao e kaangai naba nako iu, “Raan ake ko noori, ike e tekateka iai te kabekaau arei, bon natanaomata, ma koraki n aomata aika bati, ma botannaomata, ma aomata nako aika a kakaokoro aia taetae.

¹⁶ Ao kooro ake tengaun, ake ko noori, ma te man arei, a na ribaa te kabekaau, ao a na kurib'aia n anai ana b'ai ni kababanei, ma ni katikua n akea karabaana; ao a na kana irikona, ao a na kabuokia n te ai.

¹⁷ B'a E a tia te Atua ni kaaki i nanoia te kani karaoa ana kaantaninga n te nano ae ti teuana, ao n aroia n anga m'aakaia n tautaeka nakon te man arei, ni karokoa ae a kakoroaki raoi nanon ana taeka te Atua ake a tia n taekinaki.

¹⁸ “Ao te aine are ko noria bon te kaawa are kakannato are tautaeka i aoia ueea i aonnaba.”