Tani Motiki-taeka 2 - Te B'aib'ara

Taetaen Ana Anera Te UEA Nakoia Kaain Iteraera

¹ Ao E m'ananga Ana anera te UEA mai Kirekara nako Bokim ao E anganiia Iteraera te rongorongo aei: I berita nakoia ami bakatibu b'a N nang anga te aba aei nakoia ami utu, ao e karokoia ami aomata aikai mai Aikubita. Ti karaoa ngkoa te berita, ao I berita b'a e na aki uruaki.

² Ao kam berita naba b'a kam na aki boraraoakina te raoi ma botannaomata tabeua ake a maekana te aba. Ao i rarikin anne naba kam kariaia b'a kam na urui taiani baonikarea ake a anganga karea iai nakoia aia bouananti. Ma kam aki kaawakini ami berita.

³ Ma ngaia are, N na aki buokingkami ni kataenikaia ami kairiribai. Ma ane a na mena ikekei ni kam'aneingkami n taromauri taiani bouananti.

⁴ Ao a tang n takaarua Iteraera,

⁵ ao a anga aia karea nakon te UEA. Ao mai mwiin te tai anne ao a arana te tabo anne b'a “Tanginiwenei.”

Tokin Taromaurian Te UEA Irouia Kaain Iteraera

^6-9 Ao e kakaonimaki Iotua Iroun te UEA. Ao a teimatoa ni kakaonimaki Iteraera iroun te UEA ni karokoa maten Iotua ngke ai 110 ana ririki ni maiu, i mwiin kanakoakiia Iteraera iroun Iotua b'a a na taua te aba ake a tia ni berita iai. E taunaki Iotua i abana i Timnata-ereti n aaba ake a tabukibuki ake i Eberaim i meangin te Maunga are Kaati. E ngae ngke akea Iotua, ao a bon kakaonimaki naba Iteraera nakon te UEA i nanon aia tai ni maiu koraki ake a tia ni kairiiri ma Iotua, ake a tia n noori baika a kamimii ake E a tia ni karaoi te UEA i bukiia Iteraera.

¹⁰ Ao i mwiin te tai ae aki maan, a mate kaain ana roro Iotua, ao a aki ataa te UEA te roro are i mwiina, ke a aki atai b'aai ni kabane ake E a tia ni karaoi te UEA i bukiia Iteraera ngkoa.

^11-13 E a tia te UEA ni kaotinakoia aia bakatibu mai Aikubita, ao a tia n taromauriia. Ma n te tai aei, a aki taromauria te UEA Iteraera, ao a manga taromauri bouanantin B'aara, ao bouanantin Nei Atiterota, ao ai uana naba ma bouanantiia atua riki tabeman ake ni botannaomata ake i rarikiia. Ao E rangi n un te UEA

^14-15 irouia Iteraera n te aro are E a kanakoia botannaomata tabeua ni buakaniia ma ni kimoai arokaia ma aia b'ai riki tabeua. A mena kairiribai n taabo ni kabane, ao E bon kairiia te UEA b'a a na kataenikaia Iteraera n te buaka. E a kaman kauringiia Iteraera b'a E na boni karaoa te aro aei, ao ngkai a taonaki n te kaangaanga Iteraera.

Rineakiia Aia Taani Kairiri Kaain Iteraera iroun Te UEA

¹⁶ Man te tai teuana nakon te tai teuana, ao ane E na rineia taani kairiiri te UEA aika a aranaki b'a taani moti. A na kairiia aomata taani moti aikai nakon te buaka ma ni kataenikaiia aia kairiribai ake a buakanaki irouia.

¹⁷ N ririki ake a nako, ao a kakaonimaki Iteraera nakon te UEA, ma a manga waekoa n aki kakaonimaki man rawa n ongo irouia taani moti aikai. A na aki ongotaeka Iteraera iroun te UEA, ao ane a na manga taromauriia atua riki tabeman n onea mwiin taromauriana.

¹⁸ Ao ngkana a karawawataaki maiuia Iteraera irouia aia kairiribai ao E na manga nanoangaia te UEA. E na rinea te tia motikitaeka ma ni buoka te tia motikitaeka anne ni kamaiuia Iteraera mai rouia aia kairiribai. E na bon nanoangaiia Iteraera te UEA i nanon ana tai ni maiu te tia motikitaeka.

¹⁹ Ma rimwi riki, a na rikirake ni bure Iteraera nakoia aia bakatibu. A tangingabono Iteraera, a aki katoka aroia n tataromauria atua riki tabeman ke n ongo aia reirei aaro tabeua.

²⁰ Ao E un te UEA irouia Iteraera ao E taku: A tia Iteraera n urua te boraraoi are I karaoia ma aia bakatibu. A aki ongotaeka irou,

²¹ ma ngaia are, N na katoka buokaia b'a a aonga n aki kataenikaiia aia kairiribai. Ao a bon rangi ni m'aiti naba aia kairiribai Iteraera ngke e mate Iotua,

²² ao N na aki kanakoia kairiribai aikai. N na kabonganaia b'a taani kataia Iteraera, b'a I aonga n ataia b'a a na taromauriai ma n ongotaeka irou Iteraera n aroia aia bakatibu.

²³ Ao bon anne bukina are E aki kariaia iai Iotua te UEA b'a e na aki kataenikaiia botannaomata ni kabane.