Taian Areru 87 - Te B'aib'ara

Kamoamoaan Ierutarem

(Aia Areru ao aia anene natin Kora;)

¹ E katea ana kaawa te UEA i aon te maunga are tabu;

² E tangira riki te kaawa are Ierutarem nakon taabo nako i aon Iteraera.

³ Ana kaawa te Atua, ko na ongora n taekam aika kamimii mai Rouna:

⁴ “N na karina aran Aikubita ma B'aburon ngkana I korei ni karinani araia botannaomata aika ongeaba nako iu; N na warekia kaain Biritia ma Tuuro ma Tiobia i buakoia kaain Ierutarem.

⁵ Ao e na atongaki Tion b'a aia tabo aomata n aekaia nako, Ao e na nene ni matoatoa iroun te Atua are Moan te Rietaata

⁶ E na korei araia aomata nako te UEA ao E na atongiia b'a kaain naba Ierutarem.

⁷ A anene ni b'ab'atere ao ana kaangai, “A nako mai Tion kab'aiara ni bane.”