Taian Areru 28 - Te B'aib'ara

Te Tataro i bukin Ana Buobuoki te UEA

¹ Te UEA, ae nneu ni katantan, I weteiko; ongo b'anaau! Ngkana Ko aki kaekaai, ao N na ruo naba nakon aia aonnaba maate.

² Ongo irou ngkana I tabeki rake baiu ni kaitaraa am Tembora n au tai n tataro, B'a I tangira buokau mairoum.

³ Tai uakinai nako ma akana iowawa, akana taetae ni wii-raraoi nakoia raoia, ma ribakiia ae raba i nanoia.

⁴ Ko na karawawataia i bukini baike a tia ni karaoi, i bukin m'akuri ake a buakaka. Katuaeaia i bukin aia m'akuri ni kabane: anganiia booni mwin aia m'akuri ae a tia ni karaoia

⁵ B'a a aki mutiakin ana m'akuri te UEA, ke baike E a tia ni karaoi; ma ngaia ae E na karawawataia, ao E na kamaunaiia n aki toki.

⁶ E na kamoamoaaki te UEA! b'a E ongo tangu i bukini kani buokau.

⁷ Boni korakorau te UEA ao otangau; I onimakinna. E anganai buokau, ao E kakukureiai. I anene ma te kim'areirei ni kamoamoaa.

⁸ Te UEA boni korakoraia ana Aomata, ao nena ni kamaiu te uea ae rineaki i rouna.

⁹ Te UEA, kamaiuia am botannaomata; ao kakab'aiaia te koraki akana am b'ai. Ko na riki b'a te tia kawakinia n ai aron te tia kawakin-tiibu; ao kawakinia n aki toki.