Taeka n Rabakau 9 - Te B'aib'ara

E karekea te Baka n am'arake te Wanawana

¹ E a tia te Wanawana ni katea ana auti ae itiai bouana.

² E a tia ni katauraoa te iriko ao e katauraoa naba te wain. E a tauraoi ana baka n am'arake.

³ E a tia ni kanakoa ana toro te aine b'a e na katanoataa ana kakao man tabuki aika a rietaata:

⁴ “A kaoaki aomata akana a buurang ke akana a nanobaba!

⁵ Kam bane ni butim'aeaki nakon te kang iriko ma te mooi wain.

⁶ Ngkana kam tangiria ni maiu, ao kam na kaaki nanobabami ao karika te ataib'ai b'a te tia kaawakin m'am'anangami.

Te Wanawana ni Koaua

⁷ Kaeta te tia kamoamoa ae akea boongana, ao ane kam na karekea ti te kammarakaki nanomi ao te korakai.

⁸ Ane a na un iroumi taani kamoamoa ni kabane akana kam kaetiia. Ma ngkana kam kaeta temanna ae iai ana iango ao kam na taatangiraki.

⁹ Ngkana iai am iangoraoi, ao e na buokiko taian reirei ni karekea riki nanom ae e riai. Ao ngkana ko maiu raoi, e na buokiko te kamateb'ai ni konaa n ataa riki are i aona.

¹⁰ Karinea ao ongotaeka iroun te UEA Boni moanan te wanawana aei. Ngkana e reke iroum te ataib'ai, ao ko riai n ataa te Atua are e Tabu.”

¹¹ Bon te Wanawana ngai. Ngkana ko irai, ao e na anaanau maium.

¹² E raoiroi iroum te iangoraoi, ma ngkana ko kamoamoa ao ko bon kammarakiko i bon i roum.

Ana Kakao te Nanobaba

¹³ E aki konaa n iango te nanakabi, akea ana iangoraoi, ao e nanobaba.

¹⁴ E tekateka i matan ana auti ao i aon taian tabuki aika kabanea n rietaata n te kaawa.

¹⁵ E takaarua nakoia aomata ni kabane ake a ri rarikina ni kaangai,

¹⁶ “Ngkana ko kabitaia ao nakomai riin!” Ao e taku nakoia aika a nanobaba,

¹⁷ “E kangkang riki te ran ae e iraeaki, ao te kabanea ni kangkang te am'arake ae ko kanna ni karabaa.”

¹⁸ A aki ataa te b'ai are e taekinna te Nanobaba koraki ake a ongora i rouna b'a kaanga ai aron raoiroia maate ana iruwa nako.