Taeka n Rabakau 31 - Te B'aib'ara

Ana Reirei Tinan te Uea are Remuera nakon Natina te m'aane

¹ Aikai taeka n rabakau ake e reireinaki te uea are Remuera are kaain Mata iroun tinana.

² Natiu te m'aane ae Remuera, ko bungiaki b'a kaekaan au tataro, ma ngaia ae, ko na kakauongo raoi.

³ Ko na tai kabanea am tai ni kakaeia aine! bon aei te b'ai ae e aki toki n uruan aroia uea aika a bati,

⁴ A na riai n aki koro ni manging ao a na aki b'arua naba te manging uea ma taan tautaeka.

⁵ E kam'aningako te manging man tib'angam, ao ko na karaoa ae e aki raoiroi nakoia aika a maiu ni kainano.

⁶ E na ti kabonganaaki te manging ma te wain irouia akana a nang mate ke irouia aika akea nikiran aia kaantaninga.

⁷ Kamooia b'a aonga ni m'aninga ma n aki namakina kainanoia ao rawawataia.

⁸ Ma ko riai n tei i bukiia aika a tangira buokaia ao aika akea aia kaantaninga.

⁹ Karaoa ae riai ao n anga te babaaire ae e raoiroi nakoia aika a maiu ni kainano ao aika akea mwengaia.

Neboan Te Ainenum'a ae e Raoiroi

¹⁰ Reken te ainenum'a ae e rangi n raoiroi iroun te m'aane bon reken te kaub'ai ae moan te tamaroa!

¹¹ E mwiokoaki neienne iroun buuna, ao e aki konaa ni kab'aka nanoni buuna.

¹² E rangi n raoiroi nakon buuna ni kabane bongini maiuna,

¹³ ao e boni karaoi kunnikain buuna ni bon oini baina ma te kukurei.

¹⁴ Bon ti te bo ngaia ma te kaibuke ni ieie ae e uoti taian am'arake ri nanoni marawa.

¹⁵ E a kaman uti i m'aain otin taai ni katauraoa te am'arake i bukiia ana utu ao ana toro.

¹⁶ E ataa aron kakaaean te aba are e na kabooa ao aron unikan te kureebe,

¹⁷ ao e m'akuri korakora n taai nako.

¹⁸ E ataa aron te bitineti ao karekean te raka, ao e aki toki n tatabetabe n taai nako ni karokoa e a tairaa.

¹⁹ E bon rarangaa kunnikaina,

²⁰ ao e buokiia aika a maiu ni kainano ao aika a kai nanoia.

²¹ A b'ainiia ana utu ni kunnikai aika a abue, ai ngaia are, e aki raraoma ngkana e roko tain te tinoo.

²² E bon itutuu, ao a bane n tamaroa ana kunnikai aika e b'ain.

²³ E rangi ni kinaaki buuna ao te tia kairiiri ae e karineaki n te kaawa ae e buubura.

²⁴ E karaoi kunnikai ake a na kabooaki nako iroun are iai ana tabo ni kabob'ai.

²⁵ E marurung ao e kakukurei, ao e kaantaningai boong aika a na roko ma te kukurei.

²⁶ E taetae ma te iango raoi, ao a rangi n nano ana taeka n reirei.

²⁷ E tararuaia raoi ana utu ao e aki konaa n taningaroti.

²⁸ E neboaki irouia natina, e tataekinna buuna ni kamoamoaa ni kaangai,

²⁹ “A m'aiti aine aika a raoiroi ma bon te kabanea n raoiroi ngkoe mai buakoia!”

³⁰ E konaa naba ni kam'anea te aba te tikiraoi, ao e na manga bon b'aruku te botonaine, ma e bon riai ni karineaki te aine ae e karinea te UEA.

³¹ Kaota karineana neboia i mataia aomata i bukin baika e a tia ni karaoi.