Taeka n Rabakau 27 - Te B'aib'ara

Tai Kamoamoa I bukin te Ingabong

¹ Ko na aki kamoamoa i bukin te ingabong! b'a ko aki ataa kanoan te bong teuana ma teuana.

² Tai kamoamoako i bon iroum ke a kamoamoako tem'angina.

³ A rawaawata atiibu ma taian tano, ma e rawaawata riki te uota n te kangaanga ae e karikia te nanobaba.

⁴ E kamaamate te aomata ae e un, ma e a rangi ni kamaamate riki te aomata ae e babakantang.

⁵ E aki maaku ni kaetiko te aomata ae bon raoraom ni koaua.

⁶ Ko konaa n onimakina raoraom ae e kaetiko, ma taian inga mairouia kairiribai bon akea b'a ti taiani kewe.

⁷ E aki rangi ni kangkang ana karewe te manibeeru ngkana a m'aiti kanam, ma ko kang b'aai n aki akaaka ngkana ko a rangi ni baki.

⁸ Ngkana ko raroa nako ma ni mwengam, ao ko namakinna b'a kaanga ai aron te mannikiba ngkoe ae akea ngaona.

⁹ E karika te marurung inanom arokakin te boiarara, ma e a rangi n tamaroa riki te iraorao ae e koaua.

¹⁰ Tai kiitana te aomata ae e a kara ae raoraoia ngkoa am utu ke ni kawariia am koraki n tain rekem n te kangaanga. E raoiroi raoraom ae ko kaan ma ngaia nakoia am koraki aika a raroa nako.

¹¹ Natiu, kaota te wanawana! Ao n na kukurei iai ao n na konaa ni kaekaia aomata nako aika a tiribureai.

¹² B'aina te tatauraoi ao karabako ngkana ko noora te kangaanga tai burababa ni m'ananga ni kakioa buakon te kangaanga.

¹³ Tai anga am m'ane i bukin ana taarau te iruwa ni karokoa e reke iroum te b'ai teuana ae e na riki b'a te kakoaua i bukin te taarau.

¹⁴ Te taeka ni kamauri ae e om'aaka n te itingaroo bon ti te bo ma te kamaraia.

¹⁵ Bon ti te arona te timtim ni karau ae e teimatoa ma te ainenum'a ae e memeremere.

¹⁶ E konaa riki n tauaki n te ang ke n tauaki i nanon te bai b'aan te oriwa nakon katokan te ainenum'a ae e meremere.

¹⁷ Ai aron taiman te biti raao a taimi nanoia i bon irouia.

¹⁸ Kaawakina raoi te aroka ao ane e na manga anganiko uaana; tararuaa raoi am toka ao ko na neboaki.

¹⁹ Ko noora moamoam n te tirotaam ao ko noora am iango n nanoia tem'angina.

²⁰ A aki konaa n rauaki te mate ma te ruanimate, ao ai bon ti te arona naba ma ngaira.

²¹ A tuoaki te koora ma te tirewa n te ura ae e m'aaka roiroi, ma ti tuoaki n te neboaki.

²² Ko bon aki konaa ni kanakoa te nanobaba mai nanon te nanobaba ngkana ko batibooia ni karawataa.

²³ Ko riai ni kaawakiniia raoi am tiibu ma am kooti,

²⁴ b'a a aki teimatoa n aki toki te kaub'ai ma te karineaki.

²⁵ Ngkana e a tia ni koreaki te uteute ao e na manga rikirake ae e boou ao e toki te tai,

²⁶ Ko konaa ni kabooi nako tiibu ma kooti ni kabooa iai te kunnikai ao te aba.

²⁷ Ko konaa ni karaoa te tiiti ae e tau i bukin kaam'arakeaia kaain am utu ao am taani m'akuri ni kabane man ranin mamman te kooti.