Taeka n Rabakau 20 - Te B'aib'ara

A Tamaroa Riki Taeka ni Wanawana Nakon Taiani Koora

¹ Bon te aki wanawana te koro ni manging! E kananobabako te mooi manging ao e kairiko nakon te un.

² Te tia tautaeka ae e un bon kaanga ai aron te raian ae e bekorara ae e na manga kauna temanna, ao kam a mate.

³ E taraa raoi taraami ngkana kam katoka te un bon ti aika a nanobaba aika a tatangira te kauntaeka.

⁴ Ngkana kam taningaroti ni b'arau, ao tai kaantaninga taian te uaa.

⁵ Iai tabeman aika a nano aia iango kaanga ai aron nanon te marawa, ma ngkana kam wanawana, ao kam na bon kuneia.

⁶ A m'aiti aika a kaangai, “Kam konaa n onimakinai!” Ma a boni konaa n onimakinaki?

⁷ A maiuakina te raoiroi aomata aika a raoiroi, ao e kakab'aiaia naati aika a katotoongia.

⁸ A katinei taiani kakoaua, taan tautaeka aika a karaoa aia motikitaeka.

⁹ Iai i buakora ae e konaa ni kaangai, “A itiaki au iango, ao akea au bure?”

¹⁰ Uoua b'aai aika e ribai te UEA b'a te kainikatine ae e kewe ao te kai ni baaire ae e kewe.

¹¹ A kaotaki aroia naati ni b'aai aika a raoiroi ke aika a buakaka ake a karaoi.

¹² Te kakauongo ao te noraaba bon ana b'ai n tangira te UEA.

¹³ Ane kam na mate ni baki ngkana kam mamatu n taai nako; ngkana kam teirake ni m'akuri ao a na m'aiti kanami.

¹⁴ A bane aomata n tangiria b'a e na reke irouia te boo ae e booraoi.

¹⁵ A raoiroi riki taeka aika a iangoaki raoi nakon te koora ke te tirewa.

¹⁶ E na bon anaaki mairoum am kabaraaki ngkana ko kukurei n anga te kabomwi i bukin ana taarau te iruwa.

¹⁷ E kangkang riki te am'arake ae e anaaki n te baabakanikawai, ma ane e na manga onikaki nakon te atama.

¹⁸ Kakoaua raoi b'a e a reke iroum te taeka n reirei ae e raoiroi i m'aain karaoan am babaaire ke i m'aain waakinan am buaka.

¹⁹ Kararoako man taiani winanti— a tuangko b'aai ni kabane.

²⁰ A na roko n aban te rotongitong i m'aain rokon aia tai, naati aika a kamaraiaia aia karo.

²¹ Te waetata n riki ni kaub'ai e na manga bitaki nakon te maraia.

²² Ko na aki kataia ni kabooa mwiin te buakaka. Onimakina te UEA, ao ane e na buokiko.

²³ E ribaai taian kainikatine aika a aki eti ao taian rawaawata aika a aki eti te UEA. Ma ngaia ae, tai baabakanikawai!

²⁴ Ti na kanga n taekinna b'a tera ae e na riki nakoira ngkana bon ti te UEA ni babaaire?

²⁵ Ko na aki b'aka nako nanon te b'ainikam'ane n arom ni berita nakon te Atua ma te aki karaurau ni iango!

²⁶ E kakorakoraa tuaaia aomata aika taani bure te uea ae e wanawana.

²⁷ Bon taian taura mairoun te UEA ara iango aika inanora, ao a ukoukori nanora.

²⁸ A kaawakinaki taan tautaeka n ana akoi ma ana kakaonimaki te Atua, ma a riai ni b'aina te akoi b'a e aonga n teimaan abanueaia.

²⁹ A kainikatonga ni korakoraia aomata aika rikirake, ma a taamaroa riki, aika a iaia atuuia ao a wanawana.

³⁰ E konaa ni kanakoi ni kabane mairoum waaki aika a buakaka te oro ae e matoa!