Karikani B'aai 7 - Te B'aib'ara

Te Ieka

¹ Ao E taku te UEA nakon Nooa, “Riin i nanon te kaibuke ma am utu ni kabane; bon ti ngkoe ae ko kaakaraoa te raoiroi n te aonnaba aei.

² Katokaia i rarikim kaka itiman maan aika kawakawa man aekakiia nako aika itiaki, aika mm'aane ma aine, ao ti kaka temanna aika ko na kairiia man aekaki ni maan aika kawakawa nako aika a kam'araa aika mm'aane ma aine naba.

³ Katokaia naba mannikiba aika itiman aika mm'aane ma aine. Kam na karaoa aei b'a a aonga n tiku ni maiu aekaki ni maan aika kawakawa nako, ma mannikiba nako, b'a a aonga ni manga kariki n te aonnaba.

⁴ Ai ti itiua te bong ma ngkai, ao N nang karokoa te karau, ae e na b'aka i nanon abwi te bong ma te ngaina, b'a a aonga ni mate b'aai ni kabane aika maiu aika I a tia ni kariki.”

⁵ Ao E karaoi b'aai ni kabane Nooa ake E mwiokoia te Atua iai.

⁶ Ao onobubua ana ririki ni maiu Nooa ngke e a roko te ieka i aon te aba.

⁷ Ao a nako n rin nako ngaia ma buuna, ma natina mm'aane, ma buuia, nako nanon te kaibuke ni karabaia man te ieka.

⁸ Ao a bane naba n rin nako i nanon te kaibuke maan aika kawakawa ma mannikiba n aekaia nako, aika mm'aane ma aine, aika maan aika kawakawa ma mannikiba aika itiaki, ma aika a kam'araa.

⁹ A bane n rinnako ma Nooa i nanon te kaibuke, n aron ana mwioko te Atua.

¹⁰ Itiua te bong i mwiina, ao e roko te ieka.

¹¹ Ngke ai onobubua ana ririki ni maiu Nooa, ni katebwi ma itiuan bongin te kauoua n nam'akaina, ao a uki kawain raan ake i aan te aba n tiirake, ao a uki naba mataroan ranin karawa ni b'aro,

¹² ao e b'aka te karau nako aon te aba i nanon abwi te bong ma te ngaina.

¹³ Ni bon te bongi naba are e tabe ni b'aka iai te karau, ao a rinnako nanon te kaibuke Nooa ma buuna, ma natina mm'aane ake teniman, ake Teem, Aam, ao Iabeta, ma buuia,

¹⁴ ma maan aika kawakawa n aekaia nako, aika manana ma aika aki manana, aika buubura ma aika uarereke, ma mannikiba n aekaia nako.

¹⁵ A bane n rinnako ma Nooa nako nanon te kaibuke b'aai ni kabane aika maiu, aika mm'aane ma aine,

¹⁶ n aron ana mwioko te Atua. Ao ngke e rinnako Nooa, ao te UEA e kaina mataroan te kaibuke.

¹⁷ Ao e reiti nako b'akan te karau i nanon abwi te bong, ao e tabe ni iabuti te ran n te aro are e a betirake te kaibuke mai aon te aba.

¹⁸ E rikirake iabutin te ran, ao e a beibeti rake te kaibuke.

¹⁹ E a rangi n iabuti te ran n te aro are e a rooti taiani maunga ake a rangi n ririeta.

²⁰ E rikirake man rikirake iabutina ni karokoa ae a raka i aon itiua te miita rietana i aon maunga ake a ririeta.

²¹ A bane ni mate b'aai aika maiu i aon te aba, mannikiba ni kabane, maan aika kawakawa ni kabane aika buubura ma aika uarereke, ao aomata ni kabane.

²² Ao a bane ni mate maan ni kabane aika maiu i aon te aba.

²³ Ao E kamaunai b'aai ni kabane aika maiu te Atua i aon te aba n aroia aomata, maan, ao mannikiba. Bon ti Nooa ma raona i nanon te kaibuke ake a maiu.

²⁴ Ao e tiku n aki ikinako te ran i nanon 150 te bong.