Karikani B'aai 50 - Te B'aib'ara

¹ Ao e b'aka Ioteb'a i aon tamana n tang ma ni kiiti ma ubuna.

² Ao i mwiina e anga ana taeka b'a e nang karaoaki rab'atan tamana b'a e na aki buakaka.

³ E nakon abwi te bong karaoan rab'atana b'a e na aki buakaka. Ao a tanginiwenei kaain Aikubita i nanon itibwi te bong.

⁴ Ao ngke e a bane bongin te tanginiwenei i bukina, ao e taku Ioteb'a nako ia ana aobitia, “Taiaoka ma nikira au rongorongo aio nakon te uea:

⁵ I m'aain maten tamau, ao e tuangai b'a N na berita b'a N na tauna rab'atana n te b'angani matang are e a tia ni katauraoia n te aba are Kanaan. Ma ngaia are, I butiiko b'a ko na kariaia b'a N na nako moa n tauna rab'atan tamau, ao i mwiina I a manga okirikaaki.”

⁶ Ao e taku te uea, “Naako tauna tamam n aron are ko berita b'a ko na karaoia.”

⁷ Ao e nako n tauna tamana Ioteb'a, ao a bane ni ira Ioteb'a aobitia, ma kaain ana baareti te uea, ma taani kairiiri ni kabane mai Aikubita.

⁸ A airi naba ma ngaia ana utu, tarina nako, ao ana utu tamana ni kabane. Bon ti ataei ake a uarereke ma aia tiibu, ma kooti, ao aia kao ake a tiku n te tabo are Koten.

⁹ Ao a raonaki naba irouia taan toka i aon ka ni buaka aika katikitikaki irouia aoti, ao taan toka naba i aoia aoti. Bon te koraki ae korakora.

¹⁰ Ao ngke a roko n te tabo n oro uita n te tabo are Atata are i mainikun te Ioretan, ao a tang n takaarua n te tai ae maan, ao e a karaoa ana am'arake n taoatama Ioteb'a i nanon itiua te bong.

¹¹ Ao ngke a nooriia aomata aika a tanginiwenei i Atata kaain Kanaan, ao a taku, “Ai kamakura te bootaki n tanginiwenei are a karaoia kaain Aikubita.”

¹² Ma ngaia are, a karaoa te b'ai are a tuangaki natin Iakob'a mm'aane n aron are e a tia n tuangiia;

¹³ a uota rab'atana nako Kanaan, ao a taunna n te b'angani matang are i Makebera i mainikun Mamre n te tawaana are e kabooa Aberaam mairoun Eberon are te I-Itaite b'a aia tabo n taunimate.

¹⁴ Ao ngke a tia Ioteb'a n taunna, ao e a okira Aikubita ma tarina nako, ao aomata ake a ira te taunimate arei.

Ana taeka ni karaunano Ioteb'a nako ia tarina

¹⁵ Ao i mwiin maten tamaia, ao a taku tarin Ioteb'a, “Tera ami iango ngkana e bon ribaira naba Ioteb'a, ao e a babaairea kaokan ara m'akuri n tiritiri nako ina?”

¹⁶ Ma ngaia are, a kanakoa aia rongorongo nakon Ioteb'a ao a taku, “I m'aain maten tamara,

¹⁷ ao e tuangiira b'a ti na bubutiiko, ‘Ko na kab'arai aia bure tarim n aron aia kaairua ake a tia ni karaoia nako im.’ Ti butiiko ngkai b'a ko na kab'arai ara bure ake ti a tia ni karaoi, ngaira aika ana toro Atuan tamam.” Ao e tang Ioteb'a ngke e reke i rouna te rongorongo arei.

¹⁸ Ao i mwiina, a roko tarina nako ina ma ni bobaraaki i matana ao a taku, “Aikai ngaira i matam aika am toro.”

¹⁹ Ma e taku Ioteb'a nako ia, “Kam na aki maaku; I aki kona n anaa nakoan te Atua.

²⁰ Kam kam'aneai, ma E a tia n rairia te Atua nakon te b'ai ae e raoiroi, b'a aonga ni kaawakinaki maiuia aomata aika m'aiti aika maiu n te bong aei man te b'ai are a tia n riki.

²¹ Bon akea te b'ai ae kam na maakua. N na kaawakiningkami ma ami ataei.” Ma ngaia are, e anganiia taeka ni karaunano aika a roota nanoia.

Maten Ioteb'a

²² Ao e tiku ni maiu Ioteb'a ma ana utu tamana i aon Aikubita; ao ai tebubua tebwina ana ririki ni maiu ngke e mate.

²³ Ao e kauiaia natin ma tibun Eberaim. Ao e kauia naba bungiakin te mm'aane are Makira are natin Manate, ao e butim'aia nakon aia utu.

²⁴ Ao e taku nako ia tarina, “E a kaan mateu, ma E na boni kaawakiningkami te Atua ma ni kairingkami ni kaotinakoingkami man te aba aei nakon te aba are E a tia ni berita iai nakon Aberaam, Itaaka, ao Iakob'a.”

²⁵ Ao i mwiina, e a bubuti Ioteb'a nako ia ana aomata b'a a na berita, ao e taku, “Kam na berita nako iu, b'a ngkana E kairingkami te Atua nakon te aba arei, ao kam na uota naba rab'atau ma ngkami.”

²⁶ Ma ngaia are, e mate Ioteb'a i Aikubita ngke ai tebubua tebwina ana ririki ni maiu. A karaoa rab'atana b'a e na aki buakaka, ao a karinna n te b'aoki ni mate.