Karikani B'aai 33 - Te B'aib'ara

Kaitiboon Iakob'a ma Etau

¹ Ao e noora Etau Iakob'a n roko ma ana rorobuaka aika abubua m'aitiia, ma ngaia are, e a tib'aia ataei nakoia Nei Reea, ma Nei Rakera, ao buuna ni kewe ake uoman.

² E karimoaia buuna ni kewe mai moa, ma aia ataei, ao i mwina Nei Reea ma ana ataei, ao te kabanea Nei Rakera ao Ioteb'a mai buki.

³ Ao e rimoaia Iakob'a, ao e boobaraaki nako aontano itiua te tai ngke roko i matan tarina.

⁴ Ma e biri Etau nakoina, e rab'atia, ao e inga ma ngaia. Ao a kaai n tang.

⁵ Ao e taratara nako Etau, ao e nooriia aine ma ataei, ao e taku, “Ao ai antai aomata aika raom aikai?” Ao e taku Iakob'a, “Bon aikai ataei aika E a tia te Atua n nanoangaai n anganai.”

⁶ Ao i mwiina, a roko buuna ni kewe ma aia ataei, ma ni boobaraaki;

⁷ ao i mwiina, Nei Reea ma ana koraki n ataei, ao bon te kabanea raoi Ioteb'a ma Nei Rakera, a manga roko ni boobaraaki.

⁸ Ao e taku Etau, “Ao tera te koraki are teuana ake I kaaitibo ma ngaiia? Tera nanon anne?” Ao e taku Iakob'a, “Bon ara m'akuri n anai nano nakoim.”

⁹ Ma e taku Etau, “Ko rab'a tariu. Bon iai naba au nanai, kaawakin am b'ai.”

¹⁰ E taku Iakob'a, “Tiaki ngaia anne, I a butiiko. Ngkana ko taku b'a ko kukurei irou, ao ko na butim'aai au b'ai n tangira. Nooran matam i rou kaanga aron nooran matan te Atua, ma ko a tia ni karaoa te m'akuri n iraorao nako iu.

¹¹ I butiiko b'a ko na butim'aai taian b'ai n tangira aika I uoti nako im; E nanoangaai te Atua, ao E anganai b'aai ni kabane aika I kainanoi.” E teimatoa Iakob'a ni kairoroia ni karokoa e kariaia.

¹² Ao e taku Etau, “Ti a katauraoira, b'a ti nang nako. N na nako n rimoam.”

¹³ Ao e taku Iakob'a, “A rangi ni waeremweremwe ataei aikai, ao I iangoia naba tiibu ma maan aikai ma natiia aika uarereke. Ngkana tao a imanonoaki ni kawaekoaki i nanon ti te bongina, ao a na bon bane ni mate.

¹⁴ Taiaoka rimoau, ao N na karaurau n rimwiim n tokin waekoara ae ti konaa ma maan aika kawakawa aikai, ao ataei ni karokoa ti roko iroumi i Etom.”

¹⁵ Ao e taku Etau, “Ao ngkana ngaia anne, ao N na katikuia mm'aane tabeman b'a a na raoningkami.” Ao e taku Iakob'a, “Ko rab'a n anne Etau b'a ko a tia ni karaoa te akoi ae buubura riki nakon anne ngke ko butim'aeai.”

¹⁶ Ma ngaia are, e a toua nako kawaina Etau n okira Etom.

¹⁷ Ao Iakob'a E nako nako Tukota, ao e katea ana auti ikekei ma katanaia ana nanai ni man aika kawakawa.

¹⁸ Ao i nanon kawaina n oki mai Metobotamia, ao e roko raoi Iakob'a n akea te kangaanga n te kaawa are Tekem n te aba are Kanaan, ao e katea iai ana auti n rianna n te tawaana are i rarikin te kaawa arei.

¹⁹ Ao e kabooa m'akoron te tawaana arei mairouia kanoan Amora are taman Tekem n te m'aiti ae tebubua te m'akoro n tirewa.

²⁰ E katea te baonikarea ikekei, ao e aranna b'a Era-eroe-Iteraera, Atuaia Iteraera.