Karikani B'aai 28 - Te B'aib'ara

¹ Ao e wetea Iakob'a Itaaka, e kamauria, ao e taku nako ina, “Ko na aki mare ma ainen Kanaan.

² Ko na nako Metobotamia, nakon ana auti tibum are Betuera, ao karekea buum ikekei, temanna mai buakoia natin Raab'an aine.

³ E bia kakab'aiaa am mare te Atua ae M'aaka man anganiko natim aika m'aiti, b'a ko aonga n riki b'a tamaia botannaomata.

⁴ E bia kakab'aiako n arona naba ngke E kakab'aiaa Aberaam, ao ko na b'aina te aba aei, ae ko a tia ni maeka iai, ae E a tia n anga te Atua nakon Aberaam.”

⁵ Ao e kanakoa Iakob'a Itaaka nako Metobotamia nakon Raab'an, are natin Betuera te I-Turia, ao m'anen naba Nei Rebeka are tinan Iakob'a ma Etau.

Manga karekean buun Etau temanna

⁶ Ao e a ataia Etau b'a e a tia Aberaam ni kakab'aiaa Iakob'a, ao e kanakoa nako Metobotamia b'a e na kakaea buuna iai. Ao e ataia naba are e kakab'aiaa Itaaka, ao e tuangnga b'a e na aki iein ma ainen Kanaan.

⁷ Ao e ataia naba b'a e ongotaeka Iakob'a iroun tamana ma tinana, ao e a tia n nako Metobotamia.

⁸ Ao e a tib'a ataia Etau b'a ngaia e ribaia ainen Kanaan tamana are Itaaka.

⁹ Ma ngaia are, e a nako ni kawara natin Aberaam are Itimaera, ao e iein ma natina te aine are Nei Maarata, are m'anen Neb'aiota.

Miin Iakob'a i Betaera

¹⁰ Ao e kitana Beerateb'a Iakob'a, ao e nako Aran.

¹¹ Ao e roko n te tabo ae tabu ngke e a b'aka taai, ao e maeka ikekei. Ao e wene b'a e nang matu, ao e uninga te atiibu.

¹² Ao e miia te kaintam'arake ae tei mai aon te aba nako karawa, ma taian anera aika a tam'arake, ao a ruorikaaki i aona.

¹³ Ao e tei te UEA i rarikina, ao E taku, “Boni Ngai te UEA, are Atuan Aberaam, ao Itaaka. N na anganiko ma am kariki te aba aei ae ko wene iai.

¹⁴ A na rangi ni m'aiti am kariki n ai aron m'aitin tanon aonnaba. Ao a na rababanako abaia ni wairio, ni waerake, nakoiang, ao n nakoaiaki, ao ane a na butiai botannaomata b'a N na kakab'aiaia n ai arou ngke I kakab'aiako ma am kariki.

¹⁵ Uringnga b'a N na bon kakawakiniko n taabo nako ike ko nako iai, ao N na manga kaokiko nakon te aba aei. N na bon aki kitaniko ni karokoa I tia ni karaoi b'ai ni kabane ake I a tia ni berita iai.”

¹⁶ Ao e uti Iakob'a, ao e taku, “E mena te UEA ikai. E mena n te tabo aei, ao I aki ataia.”

¹⁷ Ao e maaku, ao e taku, “Ai kakamaaku ra te tabo aei! Bon Ana auti te Atua te tabo aei; bon te mataroa nako karawa.”

¹⁸ Ao e uti m'aaka Iakob'a n te ingabong are i mwiina, ao e anaa te atiibu are e uninganna, ao e kateia b'a te kanuringa. Ao e kab'aroa b'aan te oriwa i aona ma ni katabua nakon te Atua.

¹⁹ Ao e arana te tabo arei b'a “Betaera.” (Aran te kaawa aei ngkoa bon Ruti)

²⁰ Ao e karaoa ana berita Iakob'a nakon te UEA, ao e taku, “Ngkana tao Ko irai mani kaawakinai ni kawaiu aei ma n anganai te am'arake ma te kunnikai,

²¹ ao ngkana arona b'a I okirikaaki nakon au auti ma te rau, ao Ko na riki b'a Atuau.

²² E na riki te atiibu ae I kateia aei b'a te tabo i bukin taromauriakim, ao N na anganiko te katebwina ni m'akoro man au b'ai ni kabane.”