I-Rom 1 - Te B'aib'ara

Taeka ni Kamauri

¹ Ngai ae B'auro, ae ana toro Iesu Kristo, ae weteaki b'a te tia tuatua, ao e rineaki i bukin tataekinan ana euangkerio te Atua;

² E a kaman taekina te euangkerio aei te Atua i nanon te B'aib'ara irouia ana burabeti:

³ bon taekan Natina, are Iesu Kristo, are bungiaki n te aro n rab'ata b'a kanoan ana kariki Tawita;

⁴ ma ni maiuna n tamnei are reitaki ma te Atua, ao E kaotia te Atua n te aro ae m'aaka b'a bon Natina ngke E a manga kamaiua mai buakoia maate.

⁵ Boni Ngaia are ti anganaki mai Rouna te kona n riki b'a taan tuatua i bukin arana, b'a a aonga n onimaki ma n ongeaba botannaomata ni kabaneia.

⁶ Kam warekaki naba i buakoia te botannaomata anne, ngkami aika kam weteaki b'a ana b'ai Iesu Kristo:

⁷ nakoia ake a mena i Rom ni kabaneia, ake a tangiraki iroun te Atua, ake a weteaki b'a ana aomata: ami b'ai te akoaki ma te rau mairoun te Atua are Tamara ma te UEA are Iesu Kristo.

Ana Kaitau B'auro nakon te Atua

⁸ I rimoa moa ni kaitaua Atuau iroun Iesu Kristo i bukimi ni kabaneingkami, i bukin ami onimaki ae taekinaki i aonnaba ni bane.

⁹ B'a te Atua bon te tia kakoauai au taeka, ao boni Ngaia ae I toro i rouna n tamneiu i bukin tataekinan euangkerion Natina, b'a I aki toki n uringngkami

¹⁰ ni katoa te tai are I tataro iai, ao I butia te Atua b'a ngkana nanona, ao e bia reke te tai are N na m'ananga iai ni kawaringkami ngkai.

¹¹ B'a I rangi ni kan noringkami, b'a N na anganingkami b'aai n tituaraoi tabeua ake mairoun te Tamnei, b'a kam aonga ni kateimatoaki iai.

¹² Ae I nanonna b'a ti na uaia ni buokaki, ngkami n au onimaki ao ngai n ami onimaki.

¹³ Ma I tangiringkami, tariu, b'a kam na ataia b'a e m'aiti au tai ae I a tia ni baireia b'a N na nakoimi iai, ma iai te b'ai ae aki toki n tototokoa m'anangau ni karokoa naba te tai aei. I kan rairiia naba tem'angina i buakomi nakon te UEA, n ai aroia ake a tia n rairaki i rou i buakoia botannaomata ake tiaki I-Iutaia.

¹⁴ Iai tabeu ae I riai ni karaoia nakoia I-Erene ma aomata aika tiaki I-Erene, ao nakoia aika reireiaki ma aika aki reireiaki;

¹⁵ ao bon aei bukin ae e ingainga nanou iai ni kan taekina te euangkerio nakoimi naba, ngkami ake kam mena i Rom.

M'akan te Euangkerio

¹⁶ B'a I aki mamaa n te euangkerio: b'a boni m'aakan te Atua ni kamaiuia aomata nako aika onimaki, aika I-Iutaia moa ao I-Erene naba.

¹⁷ B'a e kaotaki n te euangkerio aron te Atua ni kaeti aroia aomata nakoina n te onimaki, ni moa man rekena i rouia ni karokoa tokina: n ai aron are koreaki ni kaangai: “E na maiu ane e kaetaki arona n reitaki ma te Atua n te onimaki.”

A Bane ni Bure Kaain Aonnaba

¹⁸ B'a e kaotaki unin te Atua mai karawa nakoia aomata ake a tia ni kakaraoa te bure, ma te aro n iowawa; ao i bukin aroia aika bubuaka n tukiia aomata man atan te koaua.

¹⁹ B'a e bon teretere nakoia te baere e kona n ataaki iai te Atua: b'a E kaotia nakoia te Atua.

²⁰ B'a a kaman noraki raoi aron te Atua aika aki nonoraki, are m'aakana ae akea moana ma tokina, ma arona n Atua, ma ngke a moa ni karikaki aonnaba; ao a ataaki ni baike E karaoi. Ma ngaia are, bon akea aonaia.

²¹ A ata te Atua, ma a aki anganna neboana ngkai te Atua Ngaia, ao a aki kaitaua; ma a riki aia iango b'a baika akea bonganaia, ao a karooaki nanoia aika aki wanawana.

²² A taku b'a a rabakau, ma a nanobaba;

²³ ao a onika te Atua ae aki mamate ae mimitong b'a te bouananti ae katotongan te aomata ae mamate, ke maan aika kibakiba, ke maan aika kakaeai waeia, ke maan aika kawakawa.

²⁴ Ma ngaia are, E katikuia te Atua n aroia n tangira te kammaira, ao a karaoi m'akuri ni kamamaa nakon rab'ataia, temanna nakon temanna.

²⁵ A bita te koaua mairoun te Atua nakon te kewe; ao a taromauria te bae karikaki ma n toro i rouna, n onea mwin te Tia Kariki b'aai, are riai ni karaoiroaki n aki toki. Amen.

²⁶ Ma ngaia are, E katikuia te Atua nakon aroia ni kaitataan aika bubuaka: b'a aia aine a onea aroia n iraorao ma mm'aane are riai ao a iraorao ma raoia n aine;

²⁷ ao ai aroia naba mm'aane: a kitan aroia n iraorao ma aine are riai, ao a rangi n taaniia i bon i rouia: mm'aane ma mm'aane a karaoa te kammaira ni kamamaa; ao mwina, boni karekeani kaiia i bukin te m'akuri ae buakaka are a tia ni karaoia.

²⁸ Ngke a rawa ni kaaki i nanoia ataakin te Atua, ao E katikuia n aroia aika ti te iangoi baika kammaira, b'a a aonga ni karaoi m'akuri aika aki riai.

²⁹ A kaonaki nanoia n te buakaka ni kabanea, ma te kani buakaka, ma te kani b'aib'ai ae korakora, ma te babakanikawai. A on n te bakantang, ma te nano ni kamamate ma ni kauntaeka, ma te uarao, ma te iowawa. Bon taani winanti,

³⁰ taani bukibuki, taan ribaa te Atua, taan taetaebuaka, taani kainikatonga, taani kamoamoaia, taani kariki iango aika bubuaka, taan aki iri nanoia aia karo,

³¹ te koraki aika bure aroia, taan uru taeka ni boraraoi, taani babakaine, taan aki nanoanga.

³² A bon ata ana taeka te Atua ae kaangai, A riai mateia akana karaoi baikai. A aki ti kakaraoi baikai, ma a boni kaoti naba nanoia aika kukurei ngkana a karaoaki baikai irouia tem'angina.