Iobi 18 - Te B'aib'ara

Ana kauoua n taetae Biretata. Tao Manra riki am tai n taetae?

¹ Ao E taku Biretata are kaain Tua,

² “E na toki n ningai am kakabotaeka? Ongora moa b'a ti na taetae.

³ E aera ngkai ko taraira b'a kanga ti burababa n aroia taiani kao?

⁴ Ko bon kaikoakiko ni marakin nanom. Tao e nang kitanaki te aonnaba ti i bukin unim, ke tao e nang kam'aingaki nako te maunga mani nnena?

⁵ E na teimatoa ni mauna maiun te aomata ae buakaka n ai aron ootan te taura, ao e na aki manga oki n ura.

⁶ E karooaki tauran ana auti n rianna,

⁷ E nakonako raoi ngkoa ma ngkai e a tatatata, e a manga bon okiraki n ana babaaire,

⁸ b'a e a manga bon uotia waena nako nanon te karaun, ma ni kab'aka nako nanon te kinono are te b'ai ni kam'ane.

⁹ A reke tauran waena n te b'ai ni kab'aru ma n tauaki iai.

¹⁰ E raba te roobu ni kabaewae i aan te tano; e a tia ni kaweneaki te kai ni kab'aru i m'aain kawaina.

¹¹ E otab'aniniaki ni b'aai aika kakamaaku, a iririia n taabo nako ike e nako iai.

¹² Bon te kaub'ai ngkoa, ma e a maiu ni kainano ngkai; a teitei n tataninga taian kangaanga i rarikina.

¹³ E buta te aoraki ae kamamate i aon rab'atana, ao e na kanaki baina ma waena n te mka.

¹⁴ E taekaki nako man ana auti n rianna ike e maeka iai ma te rau, ao e uaakinaki b'a e na kaitaraa ma Uean te mate.

¹⁵ Ao ngkai, a nang maeka tabeman n ana auti n rianna ngkana e a tia ni kab'akaaki te b'ai n aoraki i nanona i bukin kaitiakan mwiin te aoraki.

¹⁶ E na riki b'a kaanga aron te aroka ae mate man wakaana nakon m'angana ake i eta.

¹⁷ Ao e a toki uringana n te auti, ao n taabo nako; bon akea ae manga ururingnga.

¹⁸ E na kanakoaki man abaia aomata aika maiu, e na kanakoaki man te oota nakon te rotongitong.

¹⁹ Akea ana kariki, ao akea naba te nikira ni maiu i rouia kaain te auti are e mamaeka iai.

²⁰ A bane n ruru ma ni maaku aomata ake a maeka i mainiku, ao i maeao ngke a ongo taekan matena.

²¹ Bon anne tokiia aomata aika buakaka, tokiia aomata aika aki tabe ma te Atua.