Etekiera 38 - Te B'aib'ara

Buakanakin Iteraera Iroun Koka

¹ E taku te UEA:

² Etekiera ae natin te aomata, ko na kabuakakaa Koka, are te tia tautaeka ae e buakaka n te abanuea are Meteka ao Tubara n te aba are Makoka. Tuangnga ni kaangai:

³ Bon te UEA Ngai ae te Atua ae am kairiribai,

⁴ ao N na kamamaarako! N na kaaki i wiim te matau ao N na uaakiniko ngkoe ma am taanga ni buaka are e korakora. Ko kaira te taanga ni buaka are a toka i aoia aoti aika a b'ain kunnikai ni buaka aika a rawawata ao a uoti taian otanga ao taiani kabaang.

⁵ A raonaki am taanga ni buaka irouia tautian Botia, Itiobia, ao Ribia,

⁶ ao ai uana naba mai Komera ao Beta Tokarema i meaang. Tetoakaei am taanga ni buaka!

⁷ Ma ngaia ae ko na kakatauraoa am taanga ni buaka nakon te buaka,

⁸ b'a tabeua riki te ririki, ao N na tuangko b'a ko na kataenikaia Iteraera, te kaawa are e uruakaki n te buaka. E a tia ni kiitanaki n te tai ae e maan, ma a tia n oki kaaina mairouia botannaomata aika ianena ake a maeka iai ngkoa. A maeka ngkai Iteraera ma te rau ni maungan oin abaia.

⁹ Ma ko na buakaniia ma am taanga ni buaka kaanga buakanikarawa ma ni katobibia kaanga te nang.

¹⁰ I ataia b'a ko na karaoa te iango ae e buakaka ngkana e roko te tai arei

¹¹ b'a ane ko na aonikaia Iteraera, te kaawa ae e mamaara ae e rau ike a maeka iai aomata ma te kaawakinaki raoi i nanon taian kaawa aika akea ooia ke mataroaia ke rokaia.

¹² Ane ko na kimoai aia b'ai aomata akana maeka n taiani kaawa ake bon taian b'ariko n atiibu ngkoa aika a uruaki. A maeka aomata aika kaanga taian taenikai i abaia ianena, ma a tia n okira Iteraera, te tabo ae te kabanea ni boongana n te aonnaba, ao a manin taiani kao ao a b'ain b'a aia b'ai.

¹³ A na riki kaain Tieba ao kaain Tetan, n reitaki ma taani kabob'ai man taiani kaawa ake a uarereke i Tibein meaang b'a taan raoniko. A na tangiri taian tirewa ma taiani koora, ao ai uana naba ma taian nanai ni man ao b'aai ake a anai ami taanga ni buaka mai Iteraera.

¹⁴ I ataia Ngai ae te UEA ae te Atua b'a ngkana ko noora Au aomata ae Iteraera b'a e maeka ma te rau,

¹⁵ ao ane ko na kaira am taanga ni buaka ae e korakora ake taan toka i aoia aoti mai meaang.

¹⁶ Ko na buakana Au aomata kaanga nangin te buaka ae rabuna aon te aba. N na kariaia b'a ko na taua abau are Iteraera, b'a a aonga botannaomata nako n te aonnaba n ataia b'a bon te UEA Ngai ae I tabu.

Motikan taekan Koka

¹⁷ Ao e taku te UEA nakon Koka: N taai ake ngkoa I tuangiia Au burabeti b'a a na kauringiia Iteraera b'a n te bong teuana N na kanakoa te kairiribai b'a e na buakaniia. Boni ngkoe Koka te kairiribai, ao e a roko te bong anne.

¹⁸ Ngkana ko buakana Iteraera, N na bon rangi ni un,

¹⁹ ao N na kanakoa te m'aiei ae e kakamaaku b'a e na ioioa Iteraera.

²⁰ A na bane b'aai aika a maiu i aon te aonnaba ni maakai; ika ma maanikiba ni kabane, maan aika a aki manana ao taiani man aika a kawakawa ni kabane, ao aomata ni kabane. A na ingunako maunga, a na b'aka taian katati, ao a na urubekebeke kaawa aika a buubura.

²¹ N na kariaia maungan Iteraera b'a a na kaaitarako. A na rangi ni maaku am taanga ni buaka n te aro ae a na manga bon buaka i bon irouia.

²² N na oroiko n te aoraki ao N na katuaaeko n te mate. Ko na katobibiaki ma am taanga ni buaka ni buakan karawa ma te karau, te karau te aiti, ao te burimton ae e ura.

²³ N na karaoi baikai ni kaotia nakon te aonnaba b'a bon te UEA Ngai ae I tabu.