Yohana 9 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

ũYesu ukumukamia umuntu naalĩ mulelue mupokũ.

¹ Pĩna nulongola numuona muntu mupokũ kwipũna kuulelua waakue.

² ĩAmanigua aakue naamukolia naaũga, “Shekulu, waani alutimuĩle, uyune kanga aleli aakue, walelue mupokũ?”

³ ũYesu nushookeelia, “Uyu sika utimuĩle sunga ĩaleli aakue, ĩpa umulĩmo wa kĩNzua wigyeleligue kumuakue.

⁴ Yukũjĩpĩĩle ishie kukĩtuma ĩmĩlĩmo yaakue naaluntumile pĩna kĩlĩ munsĩ. Utiku ukiiiza ukilemua kaumuĩ kukĩtuma umulĩmo.

⁵ Pĩna kĩlĩ nkoolĩ muna unkũmbigyulu, ĩne neene weelu wa unkũmbigyulu.”

⁶ Pĩna nutambula izi, nutia ĩmatĩ pansĩ, nulũa ilyolo, numupaka umupokũ mumiiso maakue kumalolo maasio.

⁷ Numuĩĩla, “Longola, ukalale mwilyambo lya Siloamu” (ndogolelio yaakue Namutumue). Paapo nulongola nukalala, nushooka waaziiona.

⁸ Iio gua ĩanakaa aakue nĩaasio naalĩ amuoonie ĩmbele kĩna alĩ mulompi naaũga, “Sika wayune alukuuzaa wikyalansile nukwilompana?”

⁹ ĩĨĩa naaũga, “Wayuuyu.” Naĩngĩ naaũga, “Zũi, ĩpa wĩpianile ninduyo.” Uzo nuũga, “Ingĩ neene.”

¹⁰ Paapo naamukolia, “ĩmiiso maako malaĩliguaa mbii?”

¹¹ uNuasio nushookeelia, “Muntu nukuĩtaguaa Yesu nulũa ilyolo, numpaka ĩmiiso maane, numbuĩla, ‘Longola kuSiloamu ukalale.’ Paapo nanongola nankalala, namona.”

¹² Naamuĩĩla, “uNuasio wĩĩlĩĩ mpĩĩ?” Nuũga, “Magu.”

¹³ Naalĩ mupokũ naamutuala kuApalisayo.

¹⁴ Alĩ lutondo lwa wikyali pĩna ũYesu alulũile ilyolo nukukumulaĩlia ĩmiiso.

¹⁵ ĩApalisayo namukolia kangĩ, “Alumulaĩligue mbii. Nuaĩĩla, Numpaka malolo ĩmiiso maane, nankalala, namona.”

¹⁶ Iio gua, ĩApalisayo ĩamuĩ naaũga, “uMuntu uyu sikupũnile kwa kĩNzua kunsooko sikukulukendegeela ulutondo lwa wikyali.” Naĩngĩ naaũga, “Wishũũma mbii umunamĩlandu kwitenda iilĩngasĩĩlio kĩna ii?” Nautũla ukamatuki mumiao.

¹⁷ Iio naamuĩĩla umupokũ kangĩ, “Ue wiũgaaii mumpola zaakue, kuitĩ wakulaĩlagiaa ĩmiiso?” Nuũga, “Ingĩ munakĩdagu.”

¹⁸ ĩAyahũdi sika naasuĩĩla impola zaakue kĩna alĩ mupokũ nukwilaĩligua, sunga naaĩĩta ĩaleli aakue naalĩ mulaĩligue.

¹⁹ Naakolia naaũga, “Uyu wayu muana wanine namukuũgaa kĩna alĩ mulelue mupokũ. ĩpaino waiona mbii?”

²⁰ ĩAleli aakue naashookeelia naaũga, “Kumanile kĩna uyu muana wĩĩtu nduyo alĩ mupokũ;

²¹ ĩpa sika kumanile kĩna waaziiona mbii ĩpanio, kanga waani magu numulaĩĩlie ĩmiiso sika kumanile, mukoliĩ, uyo muntu mukulu, wĩtambulĩlie umuene.”

²² ĩAleli aakue alĩ itambula izi kunsooko alĩ aoopookile ĩAyahũdi, kuitĩ ĩAyahũdi alĩ akondilie kwikomia ĩkialo tũlũ wensi kanga wamukuĩle uKilisito, wakamatulue mũshũnagogi.

²³ Luulo gua ĩaleli aakue naaũga, “Uzo muntu mukulu, mukoliĩ umuene.”

²⁴ Paapo naamuĩta kaubĩlĩ umuntu naalĩ mupokũ, naamuĩĩla, “Umukũmuukie uNzua, ishe kumanile kĩna umuntu uyu munamĩlanndu.”

²⁵ uNuasio nushookeelia, “Kanga ĩmunamĩlandu magu sika manile; manile luuluu lumuĩ, alĩ numupokũ ĩpaino naaziona.”

²⁶ Naamuĩĩla, “Azukutendile yaani? Azukulaĩĩlie mbii ĩmiiso?”

²⁷ Nuashookeelia, “Nakondagiaa kukumuĩĩla, sika mũigilie? Nĩkĩ mualoe kwiiigia kangĩ? Niniinie mwaloaguaane kwitũla amanigua aakue?”

²⁸ Naamutuka, naaũga, “Ue umumanigua waakue unuasio; ishie kuamanigua a kĩMusa.

²⁹ Ishie kumanile kĩna uNzua alutambuĩle kwa kĩMusa; ĩpa uyu sika kumanile kĩna upũnile.”

³⁰ Umuntu nuasio nushookeelia nuaĩĩla, “uLukaani ulu lwa ukulĩlua! Kĩna inie sika mumanile kĩna upũnile, nduyo nundaĩlia ĩmiiso.

³¹ Kumanile kĩna uNzua sika ukuiigagiaa ĩanamĩlandu, ĩpa wensi kanga wamukulie uNzua nukwitenda uulooa waakue, unuasio uuyo ukumũigagiaa.

³² Kwipũna iyuukĩ sika yaliigigua kĩna muntu wensi ulaĩĩlie ĩmiiso ma muntu naalĩ mulelue mupokũ.

³³ Kanga uyu ĩsika alupũnile kwa kĩNzua sika azũjilishũũma kwitenda kalukaani.”

³⁴ Naashookeelia naamuĩĩla, “Ue alumulelue mumĩlandu mĩtilĩ, ninduuene wakukumania ishie?” Naamuguma kunzi.

³⁵ ũYesu nuigia kĩna alĩ amugumile kunzi, numuona nuũga, “Ue usuĩlĩĩlene mwa kĩMuana-muntu?”

³⁶ uNuasio nushookeelia nuũga, “Waani Shekulu, koona nsuĩĩle mumuakue.”

³⁷ ũYesu numuĩĩla, “Wamuonaa. Wazu nwitambula ninduue ingĩ muene.”

³⁸ Nuũga, “Nasuĩĩla Shekulu.” Numutũngamĩla.

³⁹ ũYesu nuũga, “Ĩne nijile muna unkũmbigyulu uu kuulamuli, itĩ nasika akuonaa aone, ndĩo nakuonaa atũle apokũ.”

⁴⁰ ĩApalisayo naalĩ yĩensi ninduyo naiigia izi, naamuĩĩla, “Kuapokũne sunga nindiishie?”

⁴¹ ũYesu nuaĩĩla, “Kanga ĩmuapokũ, sika aza mwijilitũla nĩmĩlandu; ĩpa muũgile, Kukuonaa; ĩmĩlandu yaani ĩkoolĩ.”