Yohana 7 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

ũYesu nĩanũna aakue

¹ Pembele ũYesu nũipilima muGalĩlaya; sika nusiia kwipilima muUyahũdi kunsooko ĩAyahũdi alĩ idũũma kukumuulaga.

² Nulutondo nalukulu lwa Ayahũdi lwa pigũnda alĩ lwĩpiipĩ.

³ Luulo gua, ĩanũna aakue naamuĩĩla, “Lega ĩpa, wende kuUyahũdi koona ĩamanigua aako aone ĩmĩlĩmo yaako nukuĩtuma.

⁴ Kuitĩ kutilĩ kamuntu nukutenda ulukaani kukĩmpisĩ-mpisĩ, nduyo umuene usiile kukigyelela. Kanga utende itĩ, igyelelie kuunkũmbigyulu.”

⁵ Kuitĩ sunga ĩanũna aakue sika alĩ asuĩlĩĩle mumuakue.

⁶ Luulo ũYesu nuaĩĩla, “ityũngo liane likaalĩ kalapika, ĩpa ityũngo liani lĩkoolĩ intondo tũlũ.

⁷ uUnkũmbigyulu sika wishũũma kukumusuukĩlua inie; ukunsuukĩlaguaa uneene kunsooko ĩne nukuukuĩlaa kĩna uutendi waakue ingĩ ubĩĩ.

⁸ Nankĩlĩ uniinie muende kulutondo nalukulu; ĩne nikĩĩlĩ kalanankĩla kwienda kulutondo nalukulu luasio, kuitĩ ityũngo likaalĩ kalakonda.”

⁹ Pĩna nuaĩĩla izi, nwikyala muGalĩlaya.

¹⁰ Pĩna ĩanũna aakue naanankĩla kwienda kulutondo nalukulu, paapo nduzo nunankĩla, sika kukualiĩ, alĩ zĩ kukĩmpisĩ-mpisĩ.

¹¹ Iio gua ĩAyahũdi naaa kumudũũma mulutondo nalukulu, naaũga, “Wĩĩlĩ mpĩĩ unuasio?”

¹² Na wĩĩ wĩng'ũng'ũntia wingĩ mumulundo kunsooko yaakue ĩĩĩa naaũga, “Muntu muuza,” ĩĩĩa naaũga, “Zũi, ĩpa ukualimĩĩlia ĩantu.”

¹³ Ĩpa kutilĩ naalumutambuĩle paantu kunsooko ya koopoka ĩAyahũdi.

ũYesu wimania mũYelusalemũ kĩna upũnile kwa kĩNzua

¹⁴ Muntondo za lutondo nalukulu ũYesu nunankĩla nũingĩlla muNumba yakĩNzua nũimania.

¹⁵ ĩAyahũdi nakulĩlua, naaũga, “Uyu umanile mbii ĩmĩlimu pĩna sika mulangue?”

¹⁶ ũYesu nuashookeelia nuũga, “uUmania waane sika waane, ingĩ waakue naaluntumile.

¹⁷ Wensi kanga waloogue kwitenda uulooa waakue, ukakuulĩnga uumanigua uu, kĩna upũnile kwa kĩNzua katia nĩkĩtambulĩlia ning'ene.

¹⁸ Uyu nukĩtambulĩlagiaa wing'ene ukudũũmaa ulukũmo luakue umuene; ĩpa uzo nukudũumaa ulukũmo luakue naalumutumile, uuyo wa tai-taaii nuwoononi ukutilĩ mumuakue.

¹⁹ Naalumupĩĩle inie uUlagĩĩlio sika Musane? Sunga ukutilĩ kumiani nukuukendegelaa uUlagĩĩlio. Nĩkĩ mwinduuma kwimbulaga.”

²⁰ iYũmbĩ nalĩshookeelia, “Ue umunalĩsĩĩmuĩ! Waani nwidũũma kukukuulaga?”

²¹ ũYesu nushookeelia nuaĩĩla, “Alĩ ntendile utendi umuĩ, tũlũ ensi namukulĩlua.

²² Kunsooko ĩĩ uMusa numupeela uwaalami; (sika upũnile kwa kĩ Musa, ĩpa alĩ kuatata aani), niniinie mulutondo lwa wikyali mukualamagiaa umuntu.

²³ Muntu kanga waalamigue palutondo lwa wikyali, uUlagĩĩlio wa kĩMusa ulekioononua, nĩkĩ mwintakĩla kunsooko namukamagiaa umuntu palutondo lwa wikyali?

²⁴ Mulekilamula kunzi udũũ, taazu mulamule ĩkulukuuluu.”

²⁵ Luulo gua, ĩaniYelusalemũ ĩamuĩ naaũga, “Sika wayune naakumudũũmaa amuulage?

²⁶ Laaĩ gua, witambula kualiĩ, sika akumuĩĩla kalukaani! ĩAkulu ĩĩtu alĩngile ĩtaine kĩna uyu ingĩ Kilisito?

²⁷ Ĩpa uyu kumumanile kĩna upũnile. Iio uKilisito pĩna ukiiiza, ukutilĩ numanile kĩna upũnile.”

²⁸ Luulo ũYesu nwĩtunta ululi muNumba ya kĩNzua, nũmania nuũga, “Ĩne munzĩzĩ, nĩkĩna mpũnile muĩzĩ; sunga sika nĩĩzĩĩle uneene, ĩpa naaluntumile ingĩ wa tai, niniinie sika mumuĩzĩ.

²⁹ Ĩne numuĩzĩ kunsooko mpũnile kumuakue, nduyo muene untumile.”

³⁰ Luulo gua naandũũma kukumuguĩla, ĩpa kutilĩ naalumutualĩlĩĩle umukono, kunsooko ityũngo liakue sika alĩ lyalaaza.

³¹ Iingĩ mwiyũmbĩ naasuĩĩla mumuakue, naaũga, “Pĩna wijiliiiza uKilisito, ũjilitenda ilĩngasĩĩllio iingĩne kwikĩla naalutendile uyu?”

³² ĩApalisayo naaligyũlia iyũmbĩ lĩkĩũlũnga izi kunsooko yaakue; paapo ĩapolia naakulu nĩApalisayo naatuma ĩĩtumi amuguĩle.

³³ ũYesu nuũga, “Tyũngo niino kĩlĩ nĩpalumuĩ niniinie; nonguĩle kumuakue naaluntumile.

³⁴ Mukindũũma, sika mukimona, nineene pĩna nĩĩlĩ inie sika mwishũũma kwiiiza.”

³⁵ Paapo ĩAyahũdi naĩtambuĩla eene kuene, “Ulomile wende mpĩĩ uyu itĩ kuleke kumuona ishie. Ukienda kuupalansano wa Agilikine nukukuamania ĩAgiliki?

³⁶ Lukaani kĩ ulu naazulutambuĩle, Mukindũũma, sika mukimona; nineene pĩna nĩĩlĩ inie sika mwishũũma kwiiiza?”

Maazi ma upanga.

³⁷ Palutondo nalukulu nangũlũ, lwa mumalĩĩlio lwa ntondo nankulu, ũYeu nuĩmĩka nwĩtuntĩkia nuũga, “Tũlũ wensi kanga wakolue ĩnoota waaze kumuane wakope.

³⁸ Nusuĩlĩĩle mumuane kĩna uwandĩkua uũgile, miongo ya maazĩ ma upanga ikipũna munsĩ yaakue.”

³⁹ Alutambuĩle itĩ mumpola za kĩMuau naĩkakumuanũnkula naasuĩlĩĩle mumuakue, kuitĩ uMuau alĩ wikĩĩlĩ kalakigyelela, kunsooko ũYesu alĩ wikĩĩlĩĩ wakuligue.

⁴⁰ Paapo ĩĩĩa kwipuna mwiyũmbĩ pĩna naaziigia inkaani izi naaũga, “Tai uyu wayu munakĩdagu nuasio.”

⁴¹ Naĩngĩ naaũga, Uyu wayu Kilisito. ĩĨĩa naaũga, “Mbii gua, uKilisito wapũna kũGalilayan?

⁴² uWandĩkua sika alĩ uũgilene kĩna uKilisito upũnile muluuli lwa kĩDaudi, muBetelehemũ ĩkĩsaalĩ naalĩ wĩĩlĩ uDaudi?”

⁴³ Paapo nautũla ukamatuki mwiyũmbĩ kunsooko yaakue.

⁴⁴ ĩAmuĩ aao nasiia amuguĩle, ĩpa kutilĩ naalumutualĩlĩĩle ĩmĩkono.

⁴⁵ Paapo ĩĩtumi naaaza kuapolia naakulu nĩApalisayo ndĩo naaaĩĩla, “Nĩkĩ sika mwamuleeta?”

⁴⁶ ĩĨtumi naashookeelia, “Kutilĩ kamuntu nukutambulaa kĩna umuntu nuasio nwitambula!”

⁴⁷ Paapo ĩApalisayo naashookeelia, “Niniinie mwapuutagiguaane?

⁴⁸ Waani gua muakulu katia muApalisayo naasuĩlĩĩle mumuakue?

⁴⁹ Ĩpa iyũmbĩ ĩlĩ nasika lĩlĩngile uulagĩĩlio lyazũmaguaa.”

⁵⁰ uNikodemo, uyo naalumuuzĩlĩĩle mbele, naalĩ umuĩ waao, nuaĩĩla,

⁵¹ “Mbii, uUlagĩĩlio wĩĩtu ukulamulaane umuntu pĩna sika waliigiguaa tangua nukwimana kĩna utendile yaani?”

⁵² Nashookeelia naamuĩĩla, “Nunduue upũnile kũGalilayane? Dũũma, uoone kĩna kutilĩ kamunakĩdagu naalũgyelĩĩle kwipũna kũGalilaya.” [

Musungu naalĩ mukũngue muugololia

⁵³ Nulongola, wensi kunumba yaakue,