Yohana 5 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Mulema wa kuBatesida

¹ Pembele alĩ lukoolĩ lutondo lukulu lwa Ayahũdi. ũYesu nunankĩla kwienda kũYelusalemũ.

² Kuasio mũYelusalemũ pamulango wa nkolo lĩkoolĩ lyambo lyukuĩtaguaa kuKĩebũlania Betesida, nalĩtĩĩte ianda itaano.

³ Muasio alĩ akoolĩ aluĩle iingĩ, apokũ, anakĩtele, akiigyandi, naatũngĩĩle uuseliuki wa maazĩ.

⁴ Kuitĩ ityũngo alĩ lĩkoolĩ pĩna alukutimaa umalaĩka pilyambo, numakũlũgania ĩmaazĩ. Iio gua wensi nwa kũingĩla mbele pĩna ĩmaazĩ makũlũganiguaa nukamia uluĩle wensi naalĩ wamutyapile.

⁵ ĩPaasio alukoolĩ muntu alĩ walemilue miaka makumi matatu namunaana.

⁶ ũYesu pĩna numuona ugonile, nulĩnga kĩna wikyalile iio miaka mingĩ, numuĩĩla, “Usiiilene wĩĩ mupanga?”

⁷ uMuluĩle numushookeelia, “Shekulu, numugila kamuntu nwa kungumĩla mwilyambo pĩna ĩmaazĩ makũlũganigua. Pĩna ĩne nunziĩ, wĩngĩ nũingĩla nuntanga.”

⁸ ũYesu numuĩĩla, “Ĩimĩka, ĩTuĩke uulĩlĩ waako ulongole.”

⁹ Ĩkamuĩ umuntu nukamia nwĩtuĩka uulĩlĩ waakue, nulongola. Lutondo luasio alĩ lutondo lwa wikyali.

¹⁰ Iio gua ĩAyahũdi naamuĩĩla naalĩ mukamigue, “Nantende lutondo lwa wikyali, ingĩ mũiko kumuako kukĩtuĩka uulĩlĩ.”

¹¹ Uyo nuashookeelia, “Uzo naazunkamilie muene azumbuĩlĩĩle, ĩtuĩke uulĩlĩ waako, ulongole.”

¹² Naamukolia, “Muntu kĩ nukuĩĩlĩĩle, ĩtuĩke uulĩlĩ, ulongole?”

¹³ Ĩpa uzo naalĩ mukamigue sika numana kanga waani magu, kunsooko ũYesu nwĩũna, kuitĩ paasio alĩ mulundo mukulu,

¹⁴ Pembele ũYesu numuona muNumba ya kĩNzua, numuĩĩla, “Laaa, wakamagiaa! Ulekitimula kangĩ, nalubĩĩ nangũlũ luleke kukuagaana.”

¹⁵ uMuntu nuasio nuenda nuaĩĩla ĩAyahũdi kĩna ingĩ ũYesu naalumukamilie.

¹⁶ Luulo gua, ĩAyahũdi naamuagia ũYesu kunsooko alutendile izi palutondo lwa wikyali.

¹⁷ ũYesu nuashookeelia, “uTata waane ukĩtumaa umulĩmo sunga nunzuauu, nuneene nĩkĩtumaa umulĩmo.”

¹⁸ Kunsooko ĩĩ, ĩAyahũdi naĩkakia kwidũũma kukumuulaga kunsooko sika alutimulĩĩle ulutondo lwa wikyali udũũ, ĩpa numuĩta uNzua Tata waakue, nukĩtenda lika lĩmuĩ nuNzua umuene.

ũYesu wilondoosia ishanio liakue mwa kĩtata

¹⁹ Iio gua ũYesu nushookeelia, “Tai-taai namuĩĩla, uMuana sika wishũũma kwitenda kalukaani wing'ene, ĩpa luensi nuoonie uTata witenda; kuitĩ kĩna ukutendaa uyo, iio nuMuana ukuzitendaa zizo-ziizoo.

²⁰ Kunsooko uTata umuloogilue uMuana, ukumulagĩĩlaa tũlũ zensi nukuzitendaa umuene, nĩmĩlĩmo namĩkulu nangũlũ kwikĩla ĩĩ ukakumulagĩĩla, koona inie mukulĩlue.

²¹ Kuitĩ kĩna uTata ukũiukagiaa ĩakiu nukukuapangatia, iio-iioo nuMuana ukuapangatagiaa nualoilue.

²² Kangĩ uTata sika ukumulamulaa kaumuĩ, ĩpa numupeela uMuana ulamuli wensi,

²³ itĩ tũlũ ensi amukulie uMuana kĩna akumukulagiaa uTata. Uzo nasika ukumukulagiaa uMuana sika ukumukulagiaa nuTata naalumutumile.”

²⁴ Tai-taaii namuĩĩla, “Nukũigagiaa ulukaani luane nukukumusuĩĩla naaluntumile utĩĩte uupanga wa kalĩ nakalĩ, sunga sika wipika muulamuli, ĩpa walegile muukiu, wingĩĩle muupanga.

²⁵ Tai-taai namuĩĩla, iTyũngo lijile nunzuauu lĩkoolĩ, ĩakiu ĩkakulũigia ululi lwa Muana wa kĩNzua, nĩndĩo naĩkakulũigia ikitũla apanga.

²⁶ Iio gua, kĩna uTata utĩĩte upanga umuene, iio-iioo numupeela uMuana wĩĩ nuupanga umuene.

²⁷ Numupeela uusũũmi kwilamula, kunsooko ingĩ Muana-muntu.

²⁸ Mulekikulĩlua izi, kuitĩ ityũngo lĩpolokile pĩna tũlũ ensi naakoolĩ muibĩĩla ikiigia ululi luakue,

²⁹ ndĩo ikipũna, naalĩ atendile iiza kuwiiuki wa upanga, naalĩ atendile namabĩĩ kuwiiuki wa ulamulua.”

Ukuĩli kwa kĩYesu

³⁰ “Ĩne sika nishũũma kwitenda kalukaani ning'ene; kĩna nukũigagiaa iio nukulamulaa, nuulamuli waane wa kulukuuluu kunsooko sika nidũũma kaulooa waane uneene, ĩpa uuloa waakue naaluntumile.

³¹ Kanga ĩnĩkĩkuĩla uneene, ukuĩli waane sika tai;

³² Ukoolĩ nuĩngĩ nwinkuĩla; manile kĩna uukuĩli waakue nwinkuĩla ingĩ wa tai.

³³ Ĩnie alĩ mutumile antu kwa kĩYohana; numĩkuĩla ĩtai.

³⁴ uUkuĩli naniaanũnkula ĩne sika upũnile kumuntu, ĩpa nitambula izi koona inie mugũnike.

³⁵ uNuasio alĩ ntala nyukuakĩlaa nukwieelia, inie alĩ mualoe kwilumbĩĩlia muweelu waakue kwityũngo.

³⁶ “Ĩne gua ntĩĩte ukuĩli ukulu kwikila wa kĩYohana. Kuitĩ ĩmĩlĩmo naalĩ numupeegue nuTata nĩĩmalĩĩlie, ĩmĩlĩmo niasio nanukuĩtumaa ĩnkuĩlĩĩle kĩna uTata untumile.

³⁷ NuTata naaluntumile, muene wankuĩlĩĩle. Ululi luakue sika mukulũigagiaa tyũngo liensi, ikyelu liakue sika mukulĩonaa,

³⁸ sunga ulukaani luakue sika lukolĩ munsĩ yaani, kunsooko unuasio naalĩ mutumue, inie sika mwamusuĩĩla.

³⁹ Mukuukeesekagiaa uwandĩkua, kuitĩ inie mukusĩĩgaa kĩna muumo mutĩĩte uupanga wa kalĩ nakalĩ; uwaasio uuo unkuĩlĩĩle ĩne.

⁴⁰ “Ĩpa sika mualoe kwiiza kumuane muĩ nuupanga.

⁴¹ Sika niaanũnkula ulukũmo kuantu.

⁴² Ĩpa numumanile kĩna muagila kauloogua wa kĩNzua munsĩ yaani.

⁴³ Ĩne nijile muliina lya kĩTata waane, sika mwananũnkula ĩne, umuua kanga waaze muliina liakue umuene, unuasio mukakumuanũnkula.

⁴⁴ Mwishũũma mbii kwishuĩĩla, inie namukĩkulagiaa niinie kuniinie, nuukulu naupũnile kwa kĩNzua nwing'ene sika mukuudũũmaa?

⁴⁵ Mulekishĩĩga kĩna ĩne nĩkakumusokia kwa kĩNzua, ukoolĩ umusokia waani, ingĩ uMusa namumusanilie inie.

⁴⁶ Kuitĩ kanga ĩmumusuĩlĩĩle uMusa, aza mujilinshuĩĩla nineeni; kunsooko uzo alĩ wandĩkile impola zaane.

⁴⁷ Kanga musiitishuĩĩla uwandĩkua waakue, mukishuĩĩla mbii inkaani zaane?”