Yohana 4 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

ũYesu numusungu wa kĩSamalia

¹ Iio gua, ũShekulu pĩna numana kĩna ĩApalisayo iigilie kĩna ũYesu waligilie amanigua iingĩ kwikĩla uYohana nukukuabadĩĩzia. (

² Ĩpa ũYesu umuene sika alubadĩzĩlie, alĩ ĩamanigua aakue udũũ),

³ nulega kuUyahũdi nuenda kangĩ kũGalilaya.

⁴ Alĩ yumujĩpile kwikĩlĩla pakatĩ ya Samalia.

⁵ Iio nupika kukaa ya Samalia nyukuĩtaguaa Sikali, piipĩ numugunda uYakobo naalumupĩĩle umuana waakue uYosepu.

⁶ ĩPaasio alĩ lukoolĩ ululungu lwa kĩYakobo. ũYesu, kunsooko alukatĩĩle namusĩnzo, nwikyalansa yoi palulungu. Alĩ zĩ nsaa ya mutandatu.

⁷ Nuuza musungu wa kĩSamalia kwitepeela ĩmaazĩ ũYesu numuĩĩla, “Mpeela nkope.”

⁸ Kunsooko ĩamanigua aakue alĩ endaa mukaa agule impamba.

⁹ Paapo umusungu wa kĩSamalia numuĩĩla. “Ue Muyahũdi wilompa mbii ĩmaazĩ ma kukopa kumuane, nineene numusungu wa kĩSamalia?” Kunsooko ĩAyahũdi nĩAsamalia sika kuuzaa akamantĩĩne.

¹⁰ ũYesu nushookeelia numuĩĩla, “Kanga azuulĩngile azuujile kuumana uupeegua wa kĩNzua ninduyo waani nukuĩĩlile, mpeela nkope, azũjile kumulompa uzo; nduzo azũjile kukupeela ĩmaazĩ ma upanga.”

¹¹ uMusungu numuĩĩla, “Shekulu, umugila kya kusũkĩlia ĩmaazĩ nululungu ingĩ lusimu; ukumaligĩlia mpĩĩ ĩmaazĩ maasio nama upanga?”

¹² Ue umukulune kwikĩla utata wĩĩtu uYakobo naalukupĩĩle ululungu; umuene nukopa muasio nĩaana aakue nĩmĩtũgo yaakue?

¹³ ũYesu nushookeelua numuĩĩla, “Tũlũ wensi nukopile ĩmaazĩ aya ukikolua noota kangĩ;

¹⁴ unuasio nukikopa ĩmaazĩ nanĩkakumupeela ĩne, sikukikolua kanoota sunga ĩkalĩ nakalĩ, ĩpa ĩmaazĩ nanĩkakumupeela mikitũla munsĩ yaakue nziĩlio ya maazĩ namakusamambaa sunga kuupanga wa kalĩ nakalĩ.”

¹⁵ uMusungu numuĩĩla, “Shekulu mpeela ĩmaazĩ maasio ndekikolua ĩnoota, sunga ndekiiiza kunu kwitepeela.”

¹⁶ ũYesu numuĩĩla, “Lenda umuĩte umugoosia waako ushooke kunu.”

¹⁷ uMusungu nuũga, “Numugila kamugoosia.” ũYesu numuĩĩla, “Waũgaa iiza, Numugila kamugoosia,

¹⁸ kunsooko alutĩĩte agoosia ataano, nduzo namwĩensi ĩpainio sika mugoosia waako. Ulu ulutambuĩle ĩtai.”

¹⁹ uMusungu numuĩĩla, “Shekulu, nalĩngaa kĩna ue uue umunakĩdagu.

²⁰ ĩAtata ĩĩtu alĩ ĩkĩtekelaa muna nkonko ĩĩ, niniinie mukuũgaa kĩna kũYelusalemũ kuuko ijĩpĩĩle kukĩtekela.”

²¹ ũYesu numuĩĩla, “Maau nsuĩĩla, kĩna ityũngo likiiza pĩna sika mukakumutekela uTata muna nkonko ĩĩ katia kũYelusalemũ.

²² Inie mukĩtekelaa nasika mukimanile; ishie kukĩtekelaa nakukĩmanile, kuitĩ uugũnua wandĩlĩĩlie kuAyahũdi.

²³ Ĩpa ityũngo likiiza ndĩĩpa lĩkoolĩ, pĩna ĩĩtekeli a tai ĩkakumutekela uTata kunkolo nukutai. Kuluulo uTata ukuadũũmaa kĩna aasio amutekele.

²⁴ uNzua ingĩ Nkolo, nĩndĩo naakumutekelaa ijĩpĩĩle kukĩtekela kunkolo nukutai.”

²⁵ uMusungu numuĩĩla, “Manile kĩna uMesia wijile (nukuĩtaguaa Kilisito) pĩna ukiiza uzo, ukakukupeela impola tũlũ-tũũlũũ.”

²⁶ ũYesu numuĩĩla, “Ĩne nanĩkĩtambuĩla ninduue ingĩ neene.”

²⁷ Paapo naaaza ĩamanigua aakue, naakulĩlua kunsooko ĩkĩtambuĩla numusungu, ĩpa kutilĩ naaluũgile, “Widũũma yaani?” Katia, “Witambula yaani kwa kĩuyu.”

²⁸ Paapo umusungu numĩleka ĩntunda, nuenda mukaa, nuĩ kuaĩĩla ĩantu,

²⁹ “Nzuĩ muone muntu naazumbuĩlĩĩle tũlũ zensi naalĩ nizitendile; kanga wayu Kilisito, magu?”

³⁰ Naapũna mukaa naamuagaana.

³¹ Uko kunuma ĩamanigua aakue naamulompa, naaũga, “Shekulu, lĩa.”

³² Nuaĩĩla, “Ntĩĩte ĩndia nya kulĩa nasika mumĩlĩngile inie.”

³³ ĩAmanigua aakue naĩĩ kĩtambuĩla, “Muntu aza wamuleetela ndiane?”

³⁴ ũYesu nuaĩĩla, “ĩNdia yaane ntĩĩ,” ntende uulooa waakue naaluntumile, “Nuumalĩĩlie umulĩmo waakue.

³⁵ Sika mukuũgaane inie, ‘Yasaagaa mieli ĩnĩĩ, paapo wĩĩze uuogoli.’ Laaĩ gua namuĩĩla, nansũlĩ imiiso maani ĩlaaĩ ĩmĩgunda, yapĩaa, yakondaa ĩogolue.

³⁶ uMuogoli ukuligagiaa ĩkĩnauogoli nukwiilingĩĩla ĩmaogola kuupanga wa kalĩ nakalĩ, koona umuminzi numuogoli alumbe palumuĩ.

³⁷ Yoi gua ulukaani lukutũlaa lwa tai, ‘Umuĩ ukuminzaa, umuua ukuogolaa.’

³⁸ Ĩne alĩ numutumile kwiogola nasika mwĩtumile kamulĩmo; naĩngĩ alĩ ĩtumile umulĩmo niniinie namũingĩla mumulĩmo waao.”

³⁹ Numukaa niasio Asamalia iingĩ naasuĩĩla mumuakue kunsooko ya lukaani lwa musungu naalukuĩlĩĩle itĩ, “Alumbuĩlĩĩle tũlũ zensi naalĩ nizitendile.”

⁴⁰ Iio gua ĩAsamalia pĩna naamuagaanaa naaa kumulompa wikyale kunsiao, Nwikyala kuuko intondo zibĩlĩ.

⁴¹ Iingĩ dũũ naasuĩĩla kunsooko ya lukaani luakue.

⁴² Naamuĩĩla umusungu, “Ĩpa kwasuĩĩlaa, sika kunsooko ya nkaani zaako udũũ, kuitĩ kũigagiaa undiishie, kangĩ kumanile kĩna tai uzu ingĩ Mugũni wa unkĩmbigyulu.”

ũYesu ukumukamia umuana wa muntu wa kĩtemi kũGalilaya

⁴³ Pĩna nazikĩla intondo zaasio nazibĩlĩ nulega kuasio nuenda kũGalilaya.

⁴⁴ Kuitĩ ũYesu umuene nukuĩla kĩna umunakĩdagu mugila kikyulio munsĩĩ yaakue umuene.

⁴⁵ Pĩna nupika kũGalilaya, ĩAgalĩlaya namuanũnkula kunsooko alĩ aonaa tũlũ naaluzitendile mũYelusalemũ palutondo lukulu, kunsooko nĩndĩo alĩ endile kulutondo lukulu.

⁴⁶ Nuuza kangĩ kuKana ya Galĩlaya, paapo pĩna aluzipilie ĩmazĩ matũle mubinio. Alukoolĩ muntu wakĩtemi, umuana waakue alĩ muluĩle muKapelinaũmũ.

⁴⁷ Uyu pĩna nũigia kĩna ũYesu wijile kwipũna kuUyahũdi sunga kũGalilaya, numuagaanaa numulompa wende wamukamie umuana waakue naalĩ wĩpiipĩ kwikia.

⁴⁸ Paapo ũYesu numuĩĩla, “Kanga musiitiona iilĩngasĩĩlio nĩmakula sika mukishuĩĩla.”

⁴⁹ Umuntu nuasio numuĩĩla, “Shekulu, nzuu pĩna umuana waane wikaalĩ kalakia.”

⁵⁰ ũYesu numuĩĩla, “Longola, umuana waako wakamagiaa.” uMuntu nulusuĩĩla ulukaani ũYesu naalumuĩĩlĩĩle, nulongola.

⁵¹ Pĩna alĩ kĩlĩ alonguĩle, ĩasese aakue naataagania nduyo, naaũga kĩna umuana waakue wakamagiaa.

⁵² Paapo nuakolia ityũngo pĩna alĩ wandiilie kwikamia. Naamuĩĩla, “iGyulo ĩnsaa ya mupũngatĩ uupiupa wamulegela.”

⁵³ Paapo ũshee nulĩnga kĩna liasio lĩĩlo tyũngo pĩna ũYesu alukumuĩĩla, “uMuana waako wakamagiaa.” Nusuĩĩla umuene nĩnumba yaakue tũlũ.

⁵⁴ Ĩkĩ kyokĩ kĩlĩngasĩĩlio kya kabĩlĩ ũYesu naalutendile pĩna alupũnile kuUyahũdi kwienda kũGalilaya.