Yohana 21 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

ũYesu ukigyeela pananza ya Tibelia

¹ Pembele ũYesu nwĩambia kangĩ kuamanigua pananza ya Tibelia; alĩ wĩambilie itĩ.

² Alĩ akoolĩ palumuĩ, uSimoni Petelo nuTomaso nukuĩtaguaa Tyutĩ nuNatanaeli wa kuKana ya Galĩlaya, nĩaanaa a kĩZebedayo, nĩĩĩa abĩlĩ muamanigua aakue.

³ uSimoni Petelo nuaĩĩla, naukijũa nsiĩ. Naamuĩĩla, “Nindiishie kulunziĩ palumuĩ ninduue.” Naalongola, naanankĩla mwipyango, nuutiku waasio sika naaguĩla kakĩntu.

⁴ Pĩna nayandia kwiyeela, ũYesu nuĩmĩka pikiki, ĩpa ĩamanigua sika alĩ amanile kĩna ingĩ Yesu.

⁵ Paapo ũYesu nuaĩĩla, “Aana aane, mutĩĩtene inani?” Naamushookeelia, “Zũi.”

⁶ Nuaĩĩla, “Lĩgumĩlĩ ijũĩlo kuluandĩ lwa kĩgoosia lwipyango, mukiligia.” Iio naagumĩla, ndĩo sika naasũũma kukulĩlũta kunsooko ya wiingĩ wa nsiĩ.

⁷ Paapo umumanigua nuasio ũYesu naalumuloilue numuĩĩla uPetelo, “Ingĩ Shekulu.” uSimoni Petelo pĩna nũigia kĩna ingĩ Shekulu, nwĩtũnga ĩntiila kunsooko alĩ ukĩpũĩ, nutima munanza.

⁸ ĩAmanigua naĩngĩ naaaza mukapango kunsooko sika alĩ kulĩ nĩnsĩĩ, alĩ zĩ mĩgulu gyana lĩmuĩ; naaa kĩlĩlũta ijũĩlo lya nsiĩ.

⁹ Pĩna naapika pikiki, naaona mooto wa makala nipishiĩ piĩlĩ muumo, nipyũli.

¹⁰ ũYesu nuaĩĩla, “Oomolĩ ipishiĩ naaza muzũile ĩpaino.”

¹¹ uSimoni Petelo nunankĩla nulĩlũta ijũĩlo pikiki, nalijuile inshiĩ nankulu, gyana lĩmuĩ nĩmakumi mataano nazitatu. Kanga alĩ ningĩnakĩ ijũĩĩlo sika nalĩĩtika.

¹² ũYesu nuaĩĩla, “Nzuĩ mulĩe.” Ukutilĩ muamanigua nalugimilie kukumukolia, “uUe waani.” Alĩ amanile kĩna ingĩ Shekulu.

¹³ ũYesu nuuza nulĩsola ipyũli, nuapeela, iio ninshiĩ.

¹⁴ Ĩi yoi alĩ nkua ya katatu ũYesu kukĩambia ntongela ya amanigua pĩna nũiuka kwipũna muakiu.

Nkaani za mpelo za kĩYesu kwa kĩPetelo

¹⁵ Pĩna naakondia kwilĩa, ũYesu numuĩĩla uSimoni Petelo, “Simoni shaYohana, undoiluene kwikĩla ĩa?” Numuĩĩla, “Eeze Shekulu, uue umanile kĩna nukuloilue.” Numuĩĩla, “Lĩĩsia ĩaana-nkolo aane.”

¹⁶ Numuĩĩla kaubĩlĩ, “Simoni shaYohana undoilue?” Numuĩĩla, “Eeze Shekulu, uue umanile kĩna nukuloilue.” Numuĩĩla, “Dĩĩma ipikolo piane.”

¹⁷ Numuĩĩla kautatu, “Simoni shaYohana, undoiluene?” uPetelo nuona usungu kunsooko alĩ waamuĩĩla kautatu, “Undoiluene.” Numuĩĩla, “Shekulu, umanile tũlũ, ulĩngile kĩna nukuloilue.” ũYesu numuĩĩla, “Lĩĩsia ipikolo piane.

¹⁸ Tai-taii nakuĩĩla, Pĩna alĩ umusumba ulukĩtũngaa nukwiumba kĩna umuloe, ĩpa pĩna ukinampaala, ukigolola ĩmĩkono yaako, wĩngĩ ukakukutũnga, ukakukutuala kĩna sikumuloe.”

¹⁹ (Alutambuĩle izi walagĩĩle nkiakĩ nukakumukulia uNzua). Pĩna nutambula izi, numuĩĩla ntiata.

²⁰ uPetelo nupĩluka, numuona umumanigua ũYesu naalumuloilue utiatĩlĩĩle, uuzo naalĩ weegamĩĩle mukĩkũa kiakue pandia; numuĩĩla, “Shekulu, waani ukakukusakia ue?”

²¹ uPetelo Pĩna numuona nuasio, numuĩĩla ũYesu, “Shekulu, auyu mbii?”

²² ũYesu numuĩĩla, “Kanga ĩnumuloe wikyale sunga nĩĩze, yaani gua ue. Ue ntiata.”

²³ Iio ulukaani ulu nalukũmuuka muanũna kĩna umumanigua nuasio sikukikia, ĩpa ũYesu sika uluũgile, Sikukikia, ĩpa, Kanga ĩnumuloe wikyale sunga nĩĩze, yaani gua ue.

Mumalĩĩlio

²⁴ Uyu wayu mumanigua nukuĩlĩĩle izi, nuzandĩkile izi; kumanile kĩna uukuĩlĩ waakue ingĩ tai.

²⁵ Zikoolĩ nazĩngĩ ningĩ naaluzitendile ũYesu; ndizo kanga zandĩkue lumuĩ lumuĩ, nsĩĩgile sunga uunkũmbigyulu tũlũ sika wienda muumo iitabũ yaasio naikiandĩkua.