Yohana 20 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Kĩbĩĩla nakĩgila kamũimba

¹ uLutondo lwa muandio lwijũma, uMalia nwa kuMagidala nuenda kukĩbĩĩla mũgyĩngu, kĩlĩ iilu, nulĩona igyũe lyaleegagiguaa mukĩbĩĩla.

² Iio numanka, nuenda kwa kĩSimoni Petelo nukumumanigua muua, unuasio ũYesu naalumuloilue, nuaĩĩla, “Amuleegagiaa ũShekulu mukĩbĩĩla, sika kumanile kĩna amuĩĩkile.”

³ uPetelo numumanigua muua naapũna,, naenda kukĩbĩĩla.

⁴ Naamanka tũlũ ensi abĩlĩ, umumanigua muua numankĩkia numukĩla uPetelo, nupika mbele kukĩbĩĩla;

⁵ Nutũna, nusungĩĩla, nuziona intiila nzalue; ĩpa sika nũingĩla.

⁶ Paapo nuuza nuSimoni Petelo numutiatile, nũingĩla mukĩbĩĩla, nuziona intiila nzalue,

⁷ nĩkatiila naalĩ kĩĩlĩ mũtyũe sika alĩ kaalue palumuĩ nintiila, ĩpa alĩ kapalingue luandĩ king'ene.

⁸ Paapo nũingĩla umumaniguaa muua naalĩ wa muandio kwipika kukĩbĩĩla, nuona nusuĩĩla.

⁹ Alĩ ikaalĩ kukuulĩnga uwandĩkua kĩna yumũjĩpĩĩle kwiiiuka kwipũna muakiu.

¹⁰ Paapo ĩamanigua naashooka kumiao kangĩ.

ũYesu ukumũgyeleela uMalia

¹¹ Ĩpa uMalia nuĩmĩka panzi pakĩbĩĩla nũilĩla. Pĩna nuilĩla itĩ, nutũna, nusungĩĩla mukĩbĩĩla;

¹² nuaona amalaĩka abĩlĩ naajialile ntiila nzelu, naikyalansile, umuua kumĩtũe, umuua kumĩgulu, paasio pina umuĩlĩ wa kĩYesu alĩ muĩĩkue.

¹³ ĩAasio naamuĩĩla, “Maau, wilĩĩla yaani?” Nuaĩĩla, “Amuleegagiaa ũShekulu waane, sika manile kĩna amuĩĩkile.”

¹⁴ Pĩna nutambula izi, nupĩluka, numuona ũYesu wĩĩmĩkile, sika numumana kĩna muene ũYesu.

¹⁵ ũYesu numuĩĩla, “Maau, wilĩĩla yaani? Ukumudũũma waani?” Uzo, nũshĩĩga kĩna uyu mukendegeela kĩtanga, numuĩĩla, “Shekulu, malĩĩ wamusolaa uue, mbuĩla kĩna umuĩĩkile, nineene numusole.”

¹⁶ ũYesu numuĩĩla, “Malia.” Uyo nupĩluka, numuĩĩla kuKĩebũlania, “Laboni!” Ndogolelio yaakue. (Mumania waane numukulu.)

¹⁷ ũYesu numuĩĩla, “Lekimamba kunsooko sika nalanankĩla kwa KĩTata. Ĩpa lenda kuanũna aane uaĩĩle, Ninankĩla kwa kĩTata waane nukwa kĩTata waani, kwa kĩNzua waane nukwa kĩNzua waani.”

¹⁸ uMalia nwa kuMagidala nulongola nuaĩĩla ĩamanigua kĩna wamuonaa ũShekulu, kangĩ kĩna wamuĩĩlaa izi.

ũYesu ukuigyeleela ĩatumua

¹⁹ Pĩna nĩtũla mpĩndĩ ya lutondo luasio lwa muandio lwijũma, injĩĩgĩ alĩ ngyalĩlue muasio muna alĩ ĩĩlĩ ĩamanigua kunsooko ya koopooka ĩAyahũdi, nuuza ũYesu nuĩmĩka pakatĩ, nuaĩĩla, “Matiliga mĩĩ kumiani.”

²⁰ Pĩna nutambula izi, nuambia ĩmĩkono yaakue nulualũ luakue. Iio ĩamanigua naalumba pĩna naamuona ũShekulu.

²¹ Iio ũYesu nuaĩĩla kangĩ, “Matiliga mĩĩ kumiani. Kĩna uTata aluntumile ĩne, nineene nukumutuma inie.”

²² Pĩna nutambula izi, nuasũũpĩla, nuaĩĩla, “Aanũnkulĩ uMuau Muelu.

²³ Tũlũ wensi namukakualeegelia ĩmĩlandu aleegelagiguaa kumuao; tũlũ ensi namukakuatũnga atugagua.”

ũYesu ukumũgyeleela uTomaso

²⁴ uTomaso, umuĩ wikyumi naabĩlĩ, nukuitangua Tyũtĩ alukutilĩ palumuĩ ndĩo pĩna alũjile ũYesu.

²⁵ Iio ĩamanigua naĩngĩ naamuĩĩla, “Aza kwamuonaa ũShekulu.” Nduyo nuaĩĩla, “Kanga nsiitiona mumĩkono yaakue ĩmaamba ma nkĩngĩ, ntuale uluala luane mumaamba ma nkĩngĩ, ntuale umukono waane mulualũ luakue, sikaka nikishuĩĩla kainiino.”

²⁶ Nazikĩla intondo munaana, ĩamanigua aakue alĩ akoolĩ munumba kangĩ, nuTomaso palumuĩ ndĩo ũYesu nuuza, injĩĩgĩ alĩ zigyalĩlaguaa, nuĩmĩka pakatĩ, nuũga, Matiliga mĩĩ kumiani.

²⁷ Paapo numuĩĩla uTomaso, “Leeta uluala luako ĩpa, ulaae ĩmĩkono yaane, uleete numukono waako uuĩĩkĩle mulualũ luane; ulekitũla nasikusuĩlĩĩle, ĩpa nusuĩlĩĩle.”

²⁸ uTomaso nushookeelia numuĩĩla, “Shekulu waane nuNzua waane!”

²⁹ ũYesu numuĩĩla, “Kunsooko wamonaa wasuĩĩlaa; aliukũ nasika aoonie naasũĩĩla.”

Lukaani nalukulu mukĩtabũ ĩkĩ

³⁰ Ikoolĩ ilĩngasĩĩlio nayĩngĩ iingĩ naalutendile ũYesu ntoongela ya amanigua nasika yandĩkue muna kĩtabũ ĩkĩ,

³¹ ĩpa izi nandĩkue koona musuĩĩle kĩna ũYesu ingĩ Kilisito Muana wa kĩNzua, numuusuĩĩli muĩ nuupanga muliina liakue.