Yohana 2 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Wĩnga kuKana

¹ Nulutondo lwa katatu alĩ ukoolĩ winga mukana ya Galĩlaya, nunina wa kĩYesu alĩ wĩĩlĩ kuuko.

² NũYesu nĩamanigua aakue naanua kuwĩnga.

³ Pĩna umubinio naukeepa, unina wa kĩYesu numuĩĩla, “Agila kamubinio.”

⁴ ũYesu numuĩĩla, “Maau, Ya yaani ĩne ninduue? Ityũngo liane sika lyalaaza.”

⁵ uNina nuaĩĩla ĩĩtumi, “Luensi nukakumuĩĩla, lutendĩ.”

⁶ Alĩ zikoolĩ inteleko mutandatu za magũe nambĩĩkue paasio kuntendo ya Ayahũdi kukĩeelia. iNteleko zensi alĩ zakijula ntunda zibĩlĩ katia zitatu.

⁷ ũYesu nuaĩĩla, “Zijulie inteleko ĩmaazĩ.” Naazijulia ndee.

⁸ Nuaĩĩla, “Ĩpaino tepiĩ, mumutualĩle umukulu wa wĩnga.” Naatuala.

⁹ uMukulu wa wĩnga pĩna numalũla ĩmaazĩ naalĩ matũlile mubinio, sika alumanile pĩna upũnile, (ĩpa ĩĩtumi naalĩ akumatepeela ĩmaazĩ alĩ amanile) umukulu wa wĩnga numuĩta umutooli,

¹⁰ Numuĩĩla, “Muntu wensi ukutengaa tangua umubino namuuza; pĩna akopekia, paapo ukuuleeta namusuu. Ue uuutile umubinio namuuza sunga nunzuauu.”

¹¹ Uu wau muandio wa ilĩngasĩĩlio naalutendile ũYesu muKana ya Galĩlaya. Nwigyelelia uukulu waakue, nĩamanigua aakue naasuĩĩla mumuakue.

¹² Pembele nutima kuKapelinaũmũ, umuene nunina, nĩanũna nĩamanigua aakue; naikyala kuuko ntondo nkeei.

Kukumielia ĩNumba ya kĩNzua

¹³ ĩPasaka ya Ayahũdi alĩ yĩpipĩ; nũYesu nunankĩla kũYelusalemũ.

¹⁴ Nuaona muNumba ya kĩNzua naigulia ng'ombe ninkolo ninjĩa; nĩakaĩĩsia-mapeesa ikyalansile.

¹⁵ Nuzĩpia nsualu ya mukoa, nuaĩnga tũlũ ensi muNumba ya kĩNzua, ninkolo ning'ombe, numiita ĩmapeesa ma akaĩĩsia, nuzigalulanga ĩmeeza zaao.

¹⁶ Nuaĩĩla naalĩ akuzigulia injĩa, “Maleegiĩ aya ĩpa; muleke kumĩtenda ĩnumba ya kĩTata waane itũle nunba igyulĩlo.”

¹⁷ ĩAmanigua aakue naijuka kĩna alĩ yandĩkue, “Wĩĩlũ wa nunba yaako ukindĩa.”

¹⁸ Iio gua, ĩAyahũdi naashookeelia naamuĩĩla, “Ukukulagĩĩla kĩlĩngasĩĩlio kĩ, nwitenda itĩ?”

¹⁹ ũYesu nushookeelia nuaĩĩla, “Mĩtaulĩ ĩNumba ĩĩ nya kĩNzua nineene kuntondo zitatu nikakumiĩmĩkia.”

²⁰ Luulo gua, ĩAyahũdi naaũga, “ĩNumba ĩĩ nya kĩNzua alĩ nzengue kumiaka makumi manĩĩ namutandatu, ninduue ukakumiĩmĩkia kuntondo zitatu?”

²¹ Ĩpa uzo alumĩtambuĩle ĩNumba ya muĩlĩ waakue.

²² Pĩna alĩ mũiukigue kwipũna muakiu, ĩamanigua naijuka kĩna alutambuĩle itĩ, naasuĩĩla uwandĩkua nulukaani ũYesu naalulutambuĩle.

²³ Pĩna alĩ wĩĩlĩ mũYelusalemũ palutondo nalukulu lwa Pasaka, iingĩ naasuĩĩla muliina liakue pĩna naaiona iilĩngasĩĩlio yaakue naalukuitenda.

²⁴ Ĩpa ũYesu umuene sika alĩ waasanilie aasio kunsooko alĩ waalĩngile tũlũ ensi;

²⁵ Luulo gua, sika alusiiile tũlũ wensi wakuĩle impola za muntu, kunsooko umuene alulĩngile nazĩĩlĩ mumuntu.