Yohana 17 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Ulompi wa kĩYesu

¹ iNkaani izi aluzitambuĩle ũYesu; nulangamĩla kwigyulu, nuũga, “Tata, ityũngo liazaa. Kulia ue uMuana waako, koona uMuana wakukulie ue,

² kĩna yoi naalumupĩĩle uusũũmi kuensi naakola muĩlĩ, itĩ tũlũ naalumupĩĩle waapeele uupanga wa kalĩ nakalĩ.

³ Nuupanga wa kalĩ nakalĩ ingĩ ntuuu, akumane ue nwĩNzua nwing'ene nwa tai, nũYesu Kilisito nalumutumile.

⁴ Ĩne alĩ nukukulĩlie muna nsĩĩ; nanuumalĩĩlia umulĩmo naalumpĩĩle nuutume.

⁵ Ĩpaino Tata, nkulia pamuako kuukulu waasio naalĩ ntĩĩte kumuako pĩna uunkũmbigyulu alĩ wikaalĩ.

⁶ “ĩLiina liako naligyelelagiaa kuantu naalumpĩĩle muna unkũmbigyulu. Alĩ aako, numpeela ĩne, nulukaani luako alukendegeelaa.

⁷ Ĩpaino amanile kĩna tũlũ zensi naalumpĩĩle zipũnile kumuako.

⁸ Kunsooko inkaani naalumpĩĩle ĩne naapĩĩle; naazaanũnkula, naamana ĩtai kĩna mpũnile kumuako; naasuĩĩla kĩna uue aluntumile.

⁹ Ĩne nukualompeela ĩa, sika nukuulompeela uunkũmbigyulu, ĩpa aao nalumpĩĩle, kunsooko ingĩ aako.

¹⁰ Tũlũ zensi naalĩ zaane ingĩ zaako; nĩzaako ingĩ zaane; nineene nakulagiguaa munsĩ yaao.

¹¹ “Nineene sika nkoolĩ muna unkũmbigyulu; ĩa akoolĩ muna unkũmbigyulu, nineene naazaa kumuako. Tata numuelu, uakendegeele muliina liako aao naalumpĩĩle, koona atũle, umuĩ zĩ undiishie.

¹² Pĩna alĩ kwĩensi ĩne alĩ nĩakendegelĩĩle muliina liako; aao naalumpĩĩle alĩ nĩalindĩlĩĩle, ukutilĩ nunumuĩ mumuao naalulimĩlĩĩle ĩpa umuana wa ulimĩĩli, uwandĩkua utimĩĩligue.

¹³ Ĩpaino nijile kumuako, nindiizi nazitambulaa muna unkũmbigyulu koona uulumbi waane utimĩĩligue munsĩ yaao.

¹⁴ Ĩne naapĩĩle ulukaani luako, nuunkũmbigyulu waasuukĩĩlue kunsooko ĩa sika a unkũmbigyulu kĩna uneene nasika na unkũmbigyulu.

¹⁵ Sika nilompa ualeegie muna unkũmbigyulu, ĩpa uakendegeele kumubĩĩ.

¹⁶ Ĩa sika a unkũmbigyulu kĩna uneene nasika na unkũmbigyulu.

¹⁷ Ueelie mutai, ulukaani luako ingĩ tai.

¹⁸ Kĩna iio naaluntumile muna unkũmbigyulu, nineene iio nĩatumile muna unkũmbigyulu.

¹⁹ Nukunsooko yaao nĩeelagiaa, koona nĩndĩo eeligue mutai.

²⁰ “Sika nukualompeela awa dũũ, ĩpa nĩndĩĩo naikishuĩĩla mumuane kunsooko ya lukaani luao

²¹ Tũlũ ensi atũle umuĩ kĩna ue Tata nukoolĩ mumuane nineene moolĩ mumuako, koona ĩa atũle umuĩ munsĩ yĩĩtu, uunkũmbigyulu usuĩĩle kĩna uue untumile.

²² Nineene, uukulu naalumpĩĩle ĩne, naapeelaa awa, atũle umuĩ zĩ undiishie.

²³ Ĩne munsĩ yaao nunduue munsi yaane, koona atũle akamatĩkũ muumuĩ, uunkũmbigyulu umane kĩna uue alutumile, nualoogua ĩa kĩna alundoilue ĩne.

²⁴ “Tata, ĩaasio nwampĩĩle ĩne, nsiiile ĩĩ palumuĩ nineene pĩna nĩĩlĩ, alaae uukulu waane nwampĩĩle ĩne, kunsooko alundoilue pĩna umukulĩla wa unkũmbigyulu alĩ wikaalĩ kalaĩĩkua

²⁵ Tata mukola kulukuuluu, uunkĩmbigyulu sika ukumanile ue, ĩpa ĩne nukumanile ue, nĩndĩĩa amanile kĩna uue alutumile.

²⁶ Naamanilie ĩliina liako, kangĩ nĩkakuamania; itĩ uuloogua naalundoilue ĩne wĩĩ munsĩ yaao, nineene nĩĩ munsĩ yaao.”