Yohana 16 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

¹ “Izi alĩ numuĩĩlĩĩle mulekikũmpigua.

² Ĩkakumukamatula mumasũnagogi; ĩtai ityũngo lijile, wensi kanga wamuulage inie ukishĩĩga ukumutumĩla uNzua.

³ Nindiizi ĩkakuzitenda kunsooko sika alĩ amuĩzĩ uTata sunga uneene.

⁴ Ĩpa alĩ numuĩĩlĩĩle koona ityũngo liao pĩna likiiiza muzijuke kĩna ĩne alĩ numuĩĩlĩĩle. Izi sika alĩ numuĩĩlĩĩle kwipũna umuandio kunsooko alĩ kwĩensi niniinie.

⁵ Ĩpaino nalongola kumuakue naaluntumile. Ukutilĩ mumuani nwinkolia, Ulunziĩ mpĩĩ?

⁶ Ĩpa kunsooko naalĩ numuĩĩlĩĩle izi, uusungu wijula inkolo zaani.

⁷ Ĩpa ĩne namuĩĩla ĩtai, yumũjĩpĩle inie ĩne ndege; kuitĩ kanga nsiitilega, uMualĩĩlia sika wijile kumiani; ĩpa kanga nende nĩkakumutuma kumuani.

⁸ Na waaza unuasio ukakuusokia uunkũmbigyulu kumpola za mulandu nĩkulukuuluu nuulamuli.

⁹ Kumpola za mulandu, kunsooko sika asuĩlĩĩle mumuane.

¹⁰ Kumpola za kulukuuluu, kunsooko nalongolaa kwa kĩTata; sika mwimona kangĩ.

¹¹ Kumpola za ulamuli kunsooko umukulu wa unkũmbigyulu uu walamulaguaa.”

¹² “Kĩlĩ ntĩĩte ningĩ za kumuĩĩla, ĩpa sika mwishũũma kukuzigigimĩlia ĩpaino.

¹³ Ĩpa pĩna ukiiiza unuasio, uMuau nwa tai, ukakumutongeela inie mutai tũlũ yensĩ, kunsooko sika ukakĩtambulĩlia wing'ene, ĩpa ziizo nukakuziigia ukitambula; sunga nazijile ukakumutanantĩlia.

¹⁴ uNuasio ukinkulia ĩne, kunsooko ukishola ĩzaane nukakumutanantĩlia inie.

¹⁵ Tũlũ zensi nutĩĩte uTata ingĩ zaaane, luulo alĩ ntambuĩle kĩna ukusolaa ĩzaane nukukumutanantĩlia.

Nkaani za kĩlaga

¹⁶ “Kĩlĩ katũngo kaniino sika mwimona; kangĩ kĩlĩ katũngo kaniino mukimona.”

¹⁷ Paapo ityũmpi lya amanigua naĩtambuĩla eene kueene. “Yaani itĩ nukukuĩĩla, kĩlĩ katũngo kaniino sika mwimona, kangĩ kĩlĩ katũngo kaniino mukimona; kangĩ, Kunsooko nalongola kwa kĩTata?”

¹⁸ Iio naaũga, “Yaani itĩ nwiũga, Kĩlĩ katũngo kaniino. Sika kumanile witambula yaani.”

¹⁹ ũYesu nulĩnga kĩna asiiile kukumukolia, nuaĩĩla, “Mukĩkoliane naaza mbũgile, kĩlĩ katũngo kaniino sika mwimona, kangĩ kĩlĩ katũngo kaniino mukimona?

²⁰ Tai-taaii namuĩĩla, mukikuuta kĩlĩlo nukwilĩla inie, ĩpa uunkũmbigyulu ukilumba; inie mukileetelua usungu, ĩpa uusungu waani ukikaĩlĩka wĩĩ ulumbi.

²¹ Umusungu pĩna wĩkĩtũnguĩla utĩĩte uusungu kunsooko ityũngo liakue liazaa; pĩna wamulela umuana, sika ukulũjuka kangĩ uluago kunsooko ya ulumbi wa kalelua umuntu muna unkũmbigyulu.

²² Iio niniinie mutĩĩte uusungu ĩpaino, ĩpa nĩkakumuona kangĩ ninkolo zaani zikilumba, nuulumbi waani ukutilĩ nukumuleegelia.

²³ Mulutondo luasio sika mukinkolia kalukaani. Tai-taaii namuĩĩla, luensi kanga mumulompe uTata muliina liane ukakumupeela.

²⁴ Sunga ĩpaino sika mulompile kalukaani muliina liane. Lompĩ, mukiligia, uulumbi waani wĩĩ ukamĩnkĩĩlũ.

²⁵ “Izi numuĩĩlĩĩle inie kuung'enua; ityũngo lijile sika nikitambula niniinie kangĩ kuung'enua, ĩpa nĩkakumudundulĩla impola za kĩTata.

²⁶ Palutondo luasio mukilompa muliina liane; sika nukumuĩĩla kĩna nĩkakumulompeela inie kwa kĩTata.

²⁷ Kunsooko uTata muene umuloilue inie, kuitĩ inie mwandoilue nukwishuĩĩla kĩna ĩne alĩ mpũnile kwa kĩTata.

²⁸ Alĩ mpũnile kwa kĩTata, naazile muna unkũmbigyulu; kangĩ naulekaa uunkũmbigyulu, nalongolaa kwa kĩTata.”

²⁹ ĩAmanigua aakue naaũga, “Laaa gua, ĩpaino witambula tengetenge, sikakawitambula kuung'enua.

³⁰ Ĩpaino kumanile kĩna umanile tũlũ-tũũlũũ, sika wishiia tũlũ wensi wakukolie; luulo kwasuĩĩla kĩna ue upũnile kwa kĩNzua.”

³¹ ũYesu nuashookeelia, “Iino mwasuĩĩlane.

³² Laaa gua, ityũngo lijile, kangĩ liazaa, mukishapatĩla muntu wensi kunsiao, mukindeka ning'ene. ĩpa sika ning'ene, kunsooko uTata ukoolĩ palumuĩ nineene.

³³ Izi alĩ numuĩĩlĩĩle muĩ nĩmatiliga mumuane. Muna unkũmbigyulu mutĩĩte luago ĩpa kamiĩ nkolo; ĩne naudulile uunkũmbigyulu.”