Yohana 14 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Nzĩla ya kwa kĩTata

¹ “ĩNkolo zaani zilekikankanala; musuĩĩle mwa kĩNzua, musuĩĩle numumuane.

² Munumba mwa kĩTata waane ukoolĩ wikyalo wingĩ; kanga ĩsika iio, aza nijilekumuĩĩla. Nalongola kukumuzĩpĩlĩĩlia uwĩĩmo.

³ Pĩna nalongola kukumuzipilĩĩlia uwĩĩmo, nikiiiza kangĩ numuanũnkule kumuane, koona pĩna nĩĩlĩ ĩne, niniinie muĩ paapo.

⁴ Kĩna nunziĩ mumĩmanile ĩnzĩla.”

⁵ uTomaso numuĩĩla, “Shekulu, sika kumanile kĩna ulunziĩ, kukakumĩmana mbii ĩnzĩla?”

⁶ ũYesu numuĩĩla, “Ĩne neene nzĩla nĩtai nuupanga; ukutilĩ nũjile kwa kĩTata isiititũla kunzĩla ya ĩne.

⁷ Kanga ĩalĩĩ munĩngile ĩne alĩ mũjile kumulĩnga nuTata. Kwipũna ĩpaino mwamulĩngaa, kangĩ mwamuonaa.”

⁸ uPilipo numuĩĩla, “Shekulu, kulagĩĩle uTata, koona yakuenda muumo.”

⁹ ũYesu numuĩĩla, “Ĩne nikyalikilie nakwĩensi niniinie, sikunĩngilene Pilipo? Numoonie ĩne wamuoonie nuTata. Wiũgaaii ue, kulagĩĩle uTata.

¹⁰ Sika wishuĩĩlane kĩna ĩne moolĩ mwa kĩTata, nuTata umoolĩ mumuane. iNkaani nanukumuĩĩla ĩne sika nĩkĩtambulĩlagiaa ning'ene, ĩpa uTata nũkyalile munsĩ yaane ukĩtumaa ĩmĩlĩmo yaakue.

¹¹ Nsuĩĩlĩ kĩna ĩne nkoolĩ mwa kĩTata nuTata ukoolĩ mumuane; naa sika iio, nsuĩĩlĩ kunsooko ya mĩlĩmo ĩmiene.

¹² “Tai-taaii namuĩĩla, nusuĩlĩĩle mumuane, ĩmĩlĩmo nanĩkĩtuma ĩne nduzo ukakuĩtuma, kangĩ namĩkulu kwikĩla ĩĩ ukakĩtuma kunsooko nalongolaa kwa kĩTata.

¹³ Luensi namukakululompa muliina liane nĩkakulutenda, uTata wakuligue muMuana.

¹⁴ Luensi kanga munompe muliina liane nĩkakulutenda.”

Lyago lya kĩMuau Muelu

¹⁵ Kanga mundoogue mukikendegeela ĩmalagĩĩlio maane.

¹⁶ Nineene nĩkakumulompa uTata, nduzo ukakumupeela Mualĩĩlia numuua, wikyale niniinie ĩkalĩ nakalĩ;

¹⁷ uMuau nwa tai; uunkũmbigyulu sika wishũũma kukumuanũnkula kunsooko sika umuoonie, sunga sika umulĩngile. Ĩnie mumulĩngile kunsooko wikyalile kumuani, nduzo ukitũla munsĩ yaani.

¹⁸ “Sika nĩkakumuleka inie mwĩakĩa; nijile kumiani.

¹⁹ Kĩlĩ katũngo kaniino uunkũmbigyulu sika wimona kangĩ, ĩpa inie mwĩmona kunsooko ĩne numupamga, niniinie mukitũla muapanga.

²⁰ Palutondo luasio mukimana uniniie kĩna ĩne moolĩ mwa kĩTata waane, niniinie mumoolĩ mumuane nineene moolĩ mumiani.

²¹ uNuasio nutĩĩte ĩmalagĩĩlio maane nukukumakendegeela, unuasio undoilue; nduzo nundoilue ukiloogua nuTata waane, nineene nĩkakumuloogua nukukigyelela kumuakue.”

²² ũYuda, (sika nwa kuIsikaliote,) numuĩĩla, “Shekulu, ikitũla mbii kĩna usiiile kukigyelela kumuĩtu, sika kuunkũmbigyulu?”

²³ ũYesu nushookeelia numuĩĩla, “Wensi kanga wandoogue ukikendegeela ulukaani luane, nuTata waane ukakumuloogua, nindiishie kukiiiza kumuakue nukwitenda wikyalo kumuakue.

²⁴ Nasika undoulue sikukukendegeelaa inkaani zaane, nulukaani namukulũigagiaa sika luane, ingĩ lwa kĩTata naaluntumile.

²⁵ “Izi alĩ numuĩĩlĩĩle pĩna alĩ kuuzaa nkoolĩ kumiani.

²⁶ Ĩpa uMualĩĩlia, uMuau Muelu, uTata nukakumutuma muliina liane, unuasio ukakumumania tũlũ zensi nukukumũjukĩlia tũlũ zensi naalĩ numuĩĩlĩĩle.

²⁷ ĩMatiliga namulekela; ĩmatiliga maane namupeela, ĩne nukumupeelaa sika kĩna uunkũmbigyulu naukumupeelaa. iNkolo zaani zilekikankanala sunga zilekiopoka.

²⁸ “Mũigilie kĩna ĩne alĩnumuĩlĩĩle kĩna nalongola, nijile kangĩ kumiani. Kanga ĩalĩĩ mundoilue alĩ mũjililumba kunsooko nalongola kwa kĩTata, kuitĩ uTata ingĩ mukulu kwikĩla ĩne.

²⁹ Nĩndĩĩpa numuĩĩlĩĩle pĩna ikaali kukigyela, koona pĩna ĩkakigyelela, musuĩĩle.

³⁰ Sika nĩkakumutambuĩla ningĩ kangĩ kunsooko umukulu wa unkũmbigyulu wapolokaa. Mugila kakĩntu kumuane;

³¹ ĩpa uunkũmbigyulu umane kĩna numuloilue uTata, iio nukutendaa kĩna uTata alundagĩlĩĩlie. Uukĩ kwĩĩni kulege kunu.”