Yohana 13 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

ũYesu ukuakalalia ĩamanigua aakue ĩmĩgulu

¹ uLutondo lukulu lwa Pasaka pĩna alĩ lwikaalĩ ũYesu numanile kĩna ityũngo liakue liazaaa lya kulega muna unkũmbigyulu uu wende kwa kĩTata, alĩ ualoilue ĩaakue muna unkũmbigyulu, nualoogua sunga kumpelo.

² Pĩna alĩ ilĩa india za mpĩndĩ, ũShetani nwakondilie kwiingĩlia ĩmasĩĩgo munkolo ya kĩYuda ũsha Simoni nwa kuIsikaliote kukumusakia.

³ Luulo gua, ũYesu numanile kĩna uTata alĩ wamupĩĩle tũlũ mumĩkono yaakue nĩkangĩ kĩna alupũnile kwa kĩNzua nukwilongola kwa kĩNzua,

⁴ nuuuka pandia, nuĩĩka luandĩ intiila zaakue, nusola kĩdeeo nwĩtũnga.

⁵ Pembele nutaagĩla ĩmaazĩ mukĩĩko nuandia kukuakalalia ĩamanigua ĩmĩgulu nukwipiagula nakĩdeeo naalĩ wĩtungile.

⁶ Paapo nupika pa kĩSimoni Petelo. uNuasio numuĩĩla, “Shekulu, ue winkalaliane ĩmĩgulu?”

⁷ ũYesu nushookeelia numuĩĩla, “Nanitenda ĩne sika umanile ĩpaino; pembele ukilĩnga.”

⁸ uPetelo numuĩĩla, “Sika ukinkalalia ĩmĩgulu yaane sunga ĩkalĩ nakalĩ.” ũYesu numushookeelia, “Kanga nsiite kukukalalia, sika kwityũmpĩ palumuĩ nineene.”

⁹ uSimoni Petelo numuĩĩla, “Shekulu, sika kamĩgulu yaane udũũ, sunga nĩmĩkono nityũe gaa.”

¹⁰ ũYesu numuĩĩla, “uNuasio noogile ukukalalaa ĩmĩgulu udũũ, ĩpa umuĩlĩ wensi muelu, niniinie muelile, ĩpa sika tũlũ ensi.”

¹¹ Kuitĩ alumumanile nukakumusakia; luulo nuũga, “Sika mwĩeelu tũlũ ensi.”

¹² Pĩna nukondia kukuakalalia ĩmĩgulu, nusola intiila zaakue, nwikyalansa kangĩ pandia, nuaĩĩla, “Mwalĩngane naaza numutendĩĩle?

¹³ Ĩnie mwinjĩta Mumaania kangĩ Shekulu; Mwitambula iiza, ingĩ neene.

¹⁴ Kanga uneene naniShekulu kangĩ Mumania namukalalia ĩmĩgulu, ijĩpĩĩle niniinie kukĩkalalia ĩmĩgulu.

¹⁵ Kuitĩ numupĩĩle mpiani; kĩna numutendĩĩle inie, niniinie mutende iio-iioo.

¹⁶ Tai-taaii namuĩĩla, uMusese sika mukulu kwikĩla ũShekulu waakue, katia umutumua sika mukulu kwikĩla numutumile.

¹⁷ Kanga mumane zaasio, mualiukũ kanga muzitende.

¹⁸ Sika nitambula impola zaani inie tũlũ. Nĩĩĩzĩ nanĩasaaguĩle, ĩpa uwandĩkua utimĩĩligue, Nulĩĩle india zaane nunsamba ilyakĩ.

¹⁹ Kwipũna ĩpaino namuĩĩla pĩna ikaalĩ kukigyelela, koona pĩna ikigyelela musuĩĩle kĩna ingĩ neene.

²⁰ Tai-taaii namuĩĩla, uNuasio nukumuanũnkula wensi nanumutumile ukunanũnkulaa uneene; nduyo nukunanũnkulaa ĩne ukumuanũnkulaa uzo naaluntumile.”

²¹ Pĩna nutambula izi, ũYesu nukankanala munkolo nukuĩla nuũga, “Tai-taaii namuĩĩla, umuĩ waani ukinshakia.”

²² ĩAmanigua naĩlaa, naiiona nkankani, waani gile nukumugamba.

²³ Alukoolĩ umuĩ wa amanigua aakue naalumuegamĩĩle ũYesu mukĩkũa kiakue, uzo ũYesu naalumuloilue.

²⁴ Iio uSimoni Petelo numuangaazĩlia umukono, numuĩĩla, “Mukolie waani nukumugamba.”

²⁵ uNuasio pĩna alumuegamĩĩle ũYesu mukĩkũa kiakue, numuĩĩla, “Shekulu, waani gile.”

²⁶ Paapo ũYesu nushookeelia, “Ingĩ uuyo nanĩkakumulĩĩlĩlia ĩntonge nukukumupeela.” Numĩlĩĩlia ĩntonge, numupeela ũYuda ũsha Simoni nwa kuIsikaliote.

²⁷ Pĩna numĩlia ĩntonge, paapo ũShetani numũingĩĩla, ũYesu numuĩĩla, “Kĩna witenda, tendaanga.”

²⁸ Alukutili muaasio naalĩ ikyalansile pandia naalumanile kunsooko kĩ ukumuĩĩla itĩ.

²⁹ ĩĨĩa, kunsooko ũYuda alumĩtĩĩte ĩmbogoosi ya mpeesa, naasĩĩga kĩna ũYesu alumuĩĩlĩĩle, “Gula nakuasilĩlue kulutondo nalukulu,” katia waapeele ĩatũka kĩntu.

³⁰ Paapo unuasio pĩna numianũnkula ĩntonge, ĩkamuĩ nupũna; alĩ utiku.

Lyagĩĩlio nĩpia lya uloogua

³¹ Pĩna nupũna, ũYesu nuũga, “Ĩpaino wakulagiguaa uMuana-muntu, nuNzua wakulagiguaa mumuakue.

³² uNzua kanga wakuligue mumuakue, uNzua ukakumukulia munsĩ yaakue; ĩkamuĩ ukakumukulia.

³³ Aana aane namuaniino, kĩlĩ nkoolĩ tyungo niino palumuĩ niniinie. Mukindaaa-laa-la; kĩna alĩ nĩaĩĩlĩĩle ĩAyahũdi, ĩpaino namuĩĩla niniinie, ĩne, kĩna nunziĩ, inie sika mwishũũma kwiiiza.

³⁴ Namupeela lyagĩĩlio nĩpia, mwĩloogue. Kĩnaalĩ numuloilue inie, niniinie mwĩloogue iio-iioo.

³⁵ Kuitĩ tũlũ ikilĩnga kĩna inie mwĩamanigua aane, kanga muĩ nuuloogua niinie kuniinie.”

Kwikaana kwa kĩPetelo ikũnukulua nũYesu

³⁶ uSimoni Petelo numuĩĩla, “Shekulu, ulunziĩ mpĩĩ?” ũYesu nushookeelia, “Kĩna nunziĩ ĩne, sika wishũũma kwintiata ĩpaino; ukintiata pembele.”

³⁷ uPetelo numuĩĩla, “Shekulu, nĩkĩ sika nishũũma kukutiata ĩpaino? Nikipũnia uumĩ waane kunsooko yaako.”

³⁸ ũYesu nushookeelia; Ukĩpũniane uuumĩ waako kunsooko yaane. Tai-taaii nakuĩĩla, uMumbĩ sika ukikunkula pina uwe ukawankana nkua zitatu.