Yohana 12 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

ũYesu wipakua ĩmakũta nuMalia kuBetania

¹ Ntondo mutandatu pĩna alĩ ikĩĩlĩ ĩPasaka, ũYesu nuenda kuBetania pĩna alĩ wĩĩlĩ uLazalo naalumũiukilie kwipũna muakiu.

² Iio naamulũgĩla india za mpĩndĩ kuasio; uMalita nukĩtuma. ULazalo alĩ umuĩ wa aasio naalĩ ĩĩlĩ pandia ensi nduyo.

³ Paapo uMalia nuleeta kasali ka makũta ma nalada maaza ma ngele nkakũ, numupaka ũYesu ĩmĩgulu, nupiagula ĩmĩgulu yaakue kumatũmbĩ maakue, nĩnumba nijula ĩnsũla-nsũla ya makũta.

⁴ ũYuda nwa kuIsikaliote, umuĩ wa amanigua aakue, naalusiile kukumusakia, nuũga,

⁵ “Nĩkĩ ĩmakũta aya masiitigulua kushilinge magana matatu nukwipeegua ĩatũka.”

⁶ Alutambuĩle izi, sika kukuakendegeela ĩatũka, ĩpa kunsooko alĩ mũii, alukuuzaa umĩtĩĩte ĩmbogoosi ya mpeesa, nusola naalĩ iĩĩkue muasio.

⁷ ũYesu nuũga, “Mulekĩ, wamaĩĩkaa aya kulutondo lwa kuĩĩkua kumuane.

⁸ ĩAtũka mwĩensi intondo tũlũ, ĩpa ĩne sika kwĩensi kantondo tũlũ.”

⁹ ĩYũmbĩ kyulu lya Ayahũdi nalĩmana kĩna ukoolĩ kuasio; naaaza, sika kunsooko ya kĩYesu udũũ, ĩpa amuone nuLazalo naalumũiukilie kwipũna muakiu.

¹⁰ ĩApolia naakulu naakomia ĩkialo amuulage nuLazalo gaa,

¹¹ kuitĩ kunsooko yaakue Ayahũdi iingĩ naenda naasuĩĩla mwa kĩYesu.

ũYesu wiingĩla mũYelusalemũ zĩ mutemi

¹² Mudaau yaakue iyũmbĩ kyulu lya antu naalĩ ijile kulutondo lukulu pĩna naiigia kĩna ũYesu wijile kũYelusalemũ,

¹³ naazishola ntambĩ za mĩpaama, naapũna kukumusĩngĩĩlia naĩtuntĩkia, Osiana, Wakuligue nũjile muliina lya kĩShekulu, Uuzo Mutemi wa Ĩsilaeli.

¹⁴ ũYesu pĩna nuona muanandoguĩ, numudaamĩĩla, kĩna yandĩkue,

¹⁵ “Ulekioopoka munanso Sayuni; Laaa, uMutemi waako wapolokaa Udaamĩlĩĩle muana-ndoguĩ.”

¹⁶ ĩAmanigua akue sika naazilĩnga izi kumuandio, ĩpa pĩna ũYesu nukuligua, paapo naijuka kĩna alĩ muandĩkĩligue izi, kangĩ kĩna alĩ amutendĩĩle aya.

¹⁷ Luulo gua, iyũmbi naalĩ yĩensi nduyo nalĩmukuĩla kĩna alumuĩtile uLazalo kwipũna mukĩbĩĩla numũiukia kwipũna muakiu.

¹⁸ Kunsooko ĩĩo iyũmbĩ nalĩmuagaana, kuitĩ naiigia kĩna alutendile ĩkĩlĩngasĩĩlio ĩkĩ.

¹⁹ Paapo ĩApalisayo naĩtambuĩla eene kueene, “Laaĩ katĩ, sika musũũmile kakĩntu; uunkũmbigyulu naumutiatĩlĩĩle kunũma yaakue.”

Lyompi lya Agiliki

²⁰ Alĩ akoolĩ Agiliki muaasio nalĩ anankĩĩle kwienda kukĩtekela kulutondo lukulu.

²¹ Paapo naamuagaana uPilipo nwa kuBetisaida ya Galĩlaya, naamukolia naaũga, “Shekulu, kusiiile kukumuona ũYesu.”

²² uPilipo nuenda numuĩĩla uAndelea; uAndelea nuPilipo naenda naamuĩĩla ũYesu.

²³ ũYesu nuashookeelia nuũga, “iTyũngo liazaa uMuana-muntu wakuligue.

²⁴ Tai-taaii namuĩĩla, ĩmpekipemba kanga ĩsiite kwigua munsĩĩ nukwikĩa, ikikyala ing'ene. Kanga ĩkie, yukupĩaa upĩi wingĩ.

²⁵ Nuuloilue uuumĩ waakue ukuulimilagia; nuusuukĩĩlue uumĩ waakue muna nkũmbigyulu uu ukuulindĩĩlaa sunga kuupanga wa kalĩ nakalĩ.

²⁶ Wensi kanga wantumĩle, nwantiate; pĩna nĩĩlĩ ĩne, paapo numwĩtumi waane ukitũla wĩĩlĩ. Wensi kanga wamtumile, uTata ukakumukulia.

²⁷ “Ĩpaino ĩnkolo yaane yakankanalaa, mbũgeeii? Tata, ungũne mutyũngo ĩlĩ. Ĩpa kunsooko ya izi nalĩpikĩĩlaa ityũngo ĩlĩ.

²⁸ Tata, kulia ĩliina liako. Paapo naluuza luli kwipũna kwigyulu, Nalĩkulagiaa, kangĩ nĩkakulĩkulia.”

²⁹ Iio iyũmbĩ naalĩ liĩmĩkile paasio naigia, naaũga, Yatũla mugũgũmo. ĩĩĩa naaũga, “Malaĩka utambuĩle ninduyo.”

³⁰ ũYesu nushookeelia nuũga, “uLuli ulu sika lutũlile kunsooko yaane, ĩpa kunsooko yaani.

³¹ Ĩpaino uulamulua wa unkũmbigyulu uu ukoolĩ; ĩpaino umukulu wa unkũmbigyulu ukitaagua kunzi.

³² Nineene pĩna nikinansulua kwipũna muna nsĩĩ, nikilũta tũlũ-tũũlũũ kumuane.”

³³ Alutambuĩle izi, walagĩĩle nkia kĩ nukikia.

³⁴ iYũmbĩ nalĩmushookeelia, “Ishie kũigilie muulagĩĩlio kĩna uKilisito ukikyala sunga ĩkalĩ nakalĩ, ninduue waũga mbii kĩna ijipĩĩle uMuana-muntu wanansulue. uMuana-muntu uyu waani?”

³⁵ Iio ũYesu nuaĩĩla, “uWeelu kĩlĩ ukoolĩ kumiani tyũngo; mugende pĩna mutĩĩte uweelu, ĩkiitĩ kĩleke kumuguĩla. Nukugendalaa mukiiti sika wĩĩzĩ kĩna ulunziĩ.

³⁶ Pĩna mutĩĩte uweelu suĩĩlĩ muweelu, mutũle aana a weelu.” Pĩna nutambula izi ũYesu, nulega kwipũna kumiao nwĩpisa.

Usiitishuĩĩla muUyahũdi, ĩpa amanigua akeei a unkũnkũ

³⁷ Kanga alutendile ilĩngasĩĩlio iingĩ nakĩ ntongela yaao, sika naasuĩĩla mumuakue,

³⁸ koona lutimĩĩligue ulukaani lwa kĩYesaya umunakĩdagu naalutambuĩle, “Shekulu, waani nusuĩlĩĩle impola zĩtu. Numukono wa kĩShekulu alĩ mukũnukulĩlue waani?”

³⁹ Kunsooko ĩĩ sika naasũũma kwishuĩĩla, kuitĩ uYesaya nuũga kangĩ,

⁴⁰ “Uapokũilie ĩmiiso, Uakakĩĩlie inkolo Alekiona namiiso maao, Alekilĩnga munkolo zaao, Agomoke, nĩakamie.”

⁴¹ uYesaya aluũgile izi pĩna aluoonie uukulu waakue, nutambula impola zaakue.

⁴² Ĩpa sunga muakulu alĩ akoolĩ iingĩ naasuĩlĩĩle mumuakue, ĩpa kunsooko ya Apalisayo sika naakũmuula, alekikamatulua mũshũnagogi.

⁴³ Kuitĩ alĩ aloogue ulukumo lwa antu kwikĩla ulukũmo lwa kĩNzua.

Nkaani nankulu za umania wa kĩYesu

⁴⁴ ũYesu nwĩtunta ululi nuũga, “Nusuĩlĩĩle mumuane sikunsuĩlĩĩle kaneene, ĩpa uuyo naaluntumile.

⁴⁵ Nundaaile ĩne amulaaile naaluntumile.

⁴⁶ Ĩne nijile nĩĩ weelu muna unkũmbigyulu, koona tũlũ wensi nusũlĩĩle mumuane waleke kikyala mukiiti.

⁴⁷ Wensi kanga wiigie inkaani zaane kanga waleke kuzikendegeela, ĩne sika nukumulamula, kunsooko sika nijile nuulamule uunkũmbigyulu, ĩpa nuugũne uunkũmbigyulu.

⁴⁸ Nwakunsiita ĩne, nasikukuanũnkulaa inkaani zaane, utĩĩte nwakumulamula; ulukaani nanulutambuĩle, luulo lukakumulamula palutondo lwa mpelo.

⁴⁹ Kunsooko sika alĩ ntambuĩle ning'ene, ĩpa uTata naaluntumile, muene undagĩlĩĩlie nanikiũga nikwitambula.

⁵⁰ Nineene manile kĩna ilyagĩĩlio liakue ingĩ upanga wa kalĩ nakalĩ. Izi nanukutambulaa gua; kĩna uTata alumbuĩlĩĩle, iio nukutambulaa.”