Yohana 11 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Kwiiiukigua kwa kĩLazalo

¹ Alukoolĩ muluĩle, umuĩ, uLazalo wa kuBetania, kukĩsaalĩ kya kĩMalia nuMalita umunũna waakue.

² Alĩ uMalia uuyo naalumupakile ũShekulu ĩmaakũta nukukumupiagula ĩmĩgulu yaakue kumatũmbĩ maakue; numugũlĩ waakue uLazalo alĩ muluĩle.

³ Iio gua, ĩagũlĩ naamutualĩla impola, naaũga, “Shekulu laaa, numuloilue waazaa muluĩle.”

⁴ ũYesu pĩna nũigia, nuũga, “uUluĩle uu sika wa nkia, ĩpa kunsooko ya ukulu wa kĩNzua, koona uMuana wa kĩNzua wakuligue kuwaasio.”

⁵ ũYesu alualoilue uMalita numunũna waakue nuLazalo.

⁶ Luulo, pĩna nũigia kĩna waazaa muluĩle, nwikyala ntondo zibĩlĩ paapo pĩna alĩ wĩĩlĩ.

⁷ Pembele nuaĩĩla ĩamanigua aakue, “Kuĩni kuUyahũdi kangĩ.”

⁸ ĩAmanigua naamuĩĩla, “Shekulu, ijuli-juulii ĩAyahũdi alĩ idũũma akutũle ĩmagũe; ukiendane kangĩ kuasio?”

⁹ ũYesu nushookeelia, “iNsaa za munsĩ sika kyumi nazibĩlĩne? Tũlũ wensi kanga wagende ĩmunsĩ sika ukukũmpaa kunsooko ukuuonaa uweelu wa unkũmbigyulu uu.

¹⁰ Tũlũ wensi kanga wagende uutiku ukukũmpaa kunsooko uweelu ukutilĩ mumuakue.”

¹¹ Nutaambula izi, pembele nuaĩĩla, “uLazalo umusuamĩĩĩtu wagonile ndoolo, ĩpa nalongola kukumulaĩlia.”

¹² Paapo ĩamanigua aakue naamuĩĩla, “Shekulu, kanga ĩugonile ndoolo ukikamia.”

¹³ Ĩpa ũYesu alutambuĩle impola za nkia yaakue; ĩaasio naasĩĩga kĩna witambula impola za kugona ndoolo.

¹⁴ Paapo ũYesu nuadundulĩla, “uLazalo wakiile.

¹⁵ Nineene nalumba kunsooko yaani kĩna alĩ nukutilĩ kuasio, koona musuĩĩle; ĩpa kuĩni gua kumuakue.”

¹⁶ Paapo uTomaso nukuĩtaguaa Tyutĩ, nuaĩĩla ĩamanigua ĩĩa, “Kuĩni nindiisie kukie palumuĩ nduyo.”

¹⁷ ũYesu pĩna nuuza nuagaana watendile intondo zinĩĩ mukĩbĩĩla.

¹⁸ ĩBetania alĩ yĩpiipĩ niYelusalemũ, alĩ zĩ maili zibĩlĩ.

¹⁹ ĩAyahũdi iingĩ alĩ ijile kwa kĩMalita nuMalia, aapumbulie kunsooko ya mugũlĩ waao.

²⁰ Paapo uMalita pĩna nũigia ya kĩna ũYesu wapolokaa, numusambĩĩlia, nuMalia nuĩma kukaa.

²¹ Iio uMalita numuĩĩla ũYesu, “Shekulu, kanga ĩalĩĩ ukoolĩ kwanu, umugũlĩ waane sika alĩ wijilikia.

²² Ĩpaino manile kĩna luensi kanga umulompe uNzua ukakukupeela.”

²³ ũYesu numuĩĩla, “uMugũlĩ waako ukiiiuka.”

²⁴ uMalita numuĩĩla, “Manile kĩna ukiiiuka muwiiuki palutondo lwa mpelo.”

²⁵ ũYesu numuĩĩla, “Ĩne neene wiiuki nuupanga; nusuĩlĩĩle mumuane, kanga wakie nakĩ, ukipangata.

²⁶ Wensi namupanga nukwishuĩĩla mumuane sika ukikia sunga ĩkalĩ nakalĩ. Usuĩlĩĩlene izi.”

²⁷ Numuĩĩla, “Eeze Shekulu, ĩne nasuĩlĩĩle kĩna ue uue Kilisito, uMuana wa kĩNzua, nũjile muna unkũmbigyulu.”

²⁸ Pĩna nuzitambula izi nulongola, numuĩta uMalia umunũna waakue kukĩmpisi-mpisi, nuũga, “uMumania ukoolĩ ukukuĩta.”

²⁹ Nduyo pĩna nũigia, nuuuka nukaawa, numuagaana.

³⁰ nũYesu sika alĩ walapika mukĩsaalĩ, ĩpa alĩ wĩĩlĩ kuuko kĩna uMalita alumuagaanĩĩle.

³¹ ĩAyahũdi naalĩ yĩensi ninduyo munumba kukumupumbulia, pĩna naamuona uMalia wauuka kuukaaũ nukwipũna, naamutiata naishĩĩga kĩna ulunziĩ kukĩbĩĩla walĩle kuasio.

³² Iio, uMalia pĩna nupika kuasio kĩna alĩ wĩĩlĩ ũYesu, numuona, nutũngama pamĩgulu yaakue, numuĩĩla, “Shekulu, kanga alĩĩ ukoolĩ kwanu, umugũlĩ wane sika alĩ wijilikia.”

³³ ũYesu pĩna numuona wilĩla nĩAyahũdi nalĩ ĩtiatile ninduyoo ilĩla, naishululĩla munkolo, nukankanala.

³⁴ nuũga, “Mumuĩĩkile mpĩĩ?” Naamuĩĩla, “Shekulu nzuu, ulaae.”

³⁵ ũYesu misholi nĩgenda.

³⁶ Iio ĩAyahũdi naaũga, “Laaĩ gua kĩna alumuloilue.”

³⁷ ĩĨĩa muaasio naaũga, “Uyu naalumulaĩlie ĩmiiso umupokũ, sika wishũũmane kwigilia uyu walekikia?”

³⁸ Iio ũYesu naishululĩla kangĩ munkolo, nupika kukĩbĩĩla. Ndĩlo alĩ lyũlũ, nigyũe alĩ yĩĩkue mumulango waakue.

³⁹ ũYesu nuũga; “Lĩleegiĩ igyũe.” uMalita, umugũlĩ waakue naalukiile, numuĩĩla, “Shekulu, ĩpa wanũnkaa, kunsooko nantende lutondo lwa kanĩĩ.”

⁴⁰ ũYesu numuĩĩla, “Sika aza nukuĩĩlĩĩlene, kanga usuĩĩle ukakuuona uukulu wa kĩNzua?”

⁴¹ Naalĩleegia igyũe. ũYesu nulangamĩla, nuũga, “Tata, nakusongelagiaa kunsooko wanzigagiaa.

⁴² Nineene manile kĩna ukunzigagiaa intondo tũlũ ĩpa kunsooko ya mulundo naupilimĩkĩlĩĩlĩe ntambuĩle, koona asuĩĩle kĩna uue aluntumile.”

⁴³ Pĩna nutambula izi nwĩtunta ululi, “Lazalo pũna, nzuu kunu.”

⁴⁴ Nupũna naalukiile, mutũngue ntiila ĩmĩgulu nĩmĩkono, nuusiu waakue utũngue katiila. ũYesu nuaĩĩla, “Mutũngulĩ, mulekĩ walongole.”

⁴⁵ Iingĩ muAyahũdi naalĩ ijile kwa kĩMalia nukukuziona naaluzitendile ũYesu naasuĩĩla mumuakue.

⁴⁶ ĩĨĩa mumiao naenda kuApalisayo naaaĩĩla naaluzitendile ũYesu.

ĩApolia naakulu ikomia ĩkialo kukumuulaga ũYesu

⁴⁷ Iio, ĩapolia naakulu nĩApalisayo naaĩĩka ilindĩ, naaũga, “Kutendeeii? Kunsooko umuntu uyu witenda ilĩngasĩĩlio iingĩ.

⁴⁸ Kanga kumuleke yoi, tũlũ ensi ikishuĩĩla mumuakue nĩAlumĩ ikiiza, ĩkakukuleegelia ĩnsĩĩ nĩndugu yĩĩtu.”

⁴⁹ Umuĩ waao, uKayafa naalĩ mupolia namukulu umuaka nuasio, nuaĩĩla, “Inie sika mumanile kalukaani,

⁵⁰ sunga sika musĩĩgile kĩna yumũjĩpĩĩle inie muntu umuĩ wakie kunsooko ya antu, ĩndugu yensi ĩlekilimĩĩla.”

⁵¹ Sika alĩ wĩtambulĩĩle umuene, ĩpa kunsooko alĩ mupolia namukulu umuaka nuasio, nupũnia unakĩdagu kĩna ũYesu ukikia kunsooko ya ndugu;

⁵² kangĩ sika kunsooko ya ndugu ĩĩo udũũ, ĩpa waailingĩĩle ĩaana a kĩNzua naalĩ asapatĩĩle, atũle umuĩ.

⁵³ Kwipũna luulo lutondo naakomia ĩkialo amuulage.

⁵⁴ Paapo ũYesu nupela kwiumba tenge-tenge muAyahũdi; iio nulega kuasio nuenda luandĩ piipĩ nĩmbuga kukaa nyukuĩtaguaa Epũlaimu; nwikyala kuuko palumuĩ nĩamanigua aakue.

⁵⁵ nĩPasaka ya Ayahũdi alĩ yĩpiipĩ; iingĩ naanankĩla kwipũna nandĩ zensi kwienda kũYelusalemũ koonna ĩeelie pĩna ĩPasaka alĩ ikaalĩ.

⁵⁶ Paapo naaa kumulaa-laaa ũYesu, naĩkĩtambuĩla eene kueene naĩĩmĩkile muNumba ya kĩNzua, “Musĩĩgileeii? Sika wijilene kulutondo nalukulu?”

⁵⁷ ĩApolia naakulu nĩApalisayo alĩ apũnilie lyagĩĩlio, tũlũ wensi kanga wamane pĩna wĩĩlĩ waleete impola, koona amuguĩle.