Yohana 10 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Mudĩĩmi namuuza

¹ “Tai-taaii namuĩĩla, nasika ukũingĩĩlaa pamulango wa mpongolo wa nkolo ĩpa wapũũtĩle pĩngĩ, unuasio ingĩ mũii kangĩ muleegelania.

² Nukũingĩlĩlaa pamulango ingĩ umudĩĩmi wa nkolo.

³ uMulindĩĩla-mulango ukumũgyuĩlaa uyo, ninkolo zukumũigagiaa ululi luakue; ukuita inkolo zaakue kumiina maao nukukuzintongeela kunzi.

⁴ Pĩna wazipũnia tũlũ ĩzaakue ukuzitongeelaa, ninkolo zukumutiataa kunsooko zimanile ululi luakue.

⁵ uMugenda sika zukumutiataa, ĩpa zukumutalamaa kunsooko sika zulumanile ululi lwa mugenda.”

⁶ ũYesu nuaĩĩla ĩmpiani ĩĩ, ĩpa ĩaasio sika naalĩnga naalukuaĩĩla.

⁷ Iio ũYesu nuũga kangĩ, “Tai-taaii namuĩĩla, Ĩne neene numulango wa nkolo.

⁸ Tũlũ ensi naalĩ antongelĩĩle ingĩ iii nĩaleegelania ĩpa inkolo sika nazĩiigia.

⁹ Ine neene numulango; tũlũ wensi kanga wingĩlĩle pamuane ukigũnĩka; ukiingĩla nukwipũna, ukiligia udĩĩmo.

¹⁰ uMũii sika ukuuzaa isiitituũla wiie, waulage nukwioonona; ĩne nijile zitũle nuupanga, kangĩ zĩĩ nduo wingĩ dũũ.

¹¹ “Ĩne neene numudĩĩmi namuuza. uMudĩĩmi namuuza ukuupũnagiaa uumĩ waakue kunsooko ya nkolo.

¹² uMutiĩkia nasika mudĩĩmi ninkolo ĩsika zaakue, ukumuonaa ũyĩngi upolokile, ukuzilekaa inkolo, ukumankaa; nũyĩngi ukuziguĩlaa nukukuzishapatĩlia,

¹³ Kunsooko uyo mutiĩkia, sika ukukunkunalaa kunsooko ya nkolo.

¹⁴ Ĩne neene numudĩĩmi namuuza; ĩzaane nĩzimanile nĩzaane zimanile ĩne,

¹⁵ kĩna uTata numanile ĩne nineene numumanile uTata; nuuumĩ waane nuupũnilie kunsooko ya nkolo.

¹⁶ Ninkolo nzia nĩzitĩĩte nasika za mumpongolo ĩĩ; nindizo injĩpĩĩle nĩzileete, nululi luane zĩkakulũigia, nalĩkitũla dyale lĩmuĩ numudĩĩmi umuĩ.

¹⁷ “Luulo gua uTata undoilue kunsooko nuupũnilie uuumi waane, koona nuusole kangĩ.

¹⁸ Ukutilĩ nukundeegelagiaa, ĩpa ĩne nuupũnilie uneene. Ntĩĩte usũũmi wa kuupũnua; ntĩĩte usũũmi wa kuusola kangĩ. Ilyangĩĩlio ĩlĩ alĩ naanũnkuĩle kwa kĩTata waane.”

¹⁹ Nautũla ukamatuki muAyahũdi kunsooko ya nkaani izi.

²⁰ ĩĨĩa naaũga, “munalĩsĩĩmuĩ, kangĩ wasalile, nĩkĩ mukumutegeela.”

²¹ ĩĨĩa naaũga “iNkaani izi sika za munalĩsĩĩmuĩ. ĩLĩsĩĩmuĩ lishũũmane kwilaĩlia ĩmiiso maapokũ.”

ũYesu wĩĩlĩ kũYelusalemũ kulutondo nalukulu lwa kumielia ĩNumba ya kĩNzua

²² Naluĩ lutondo nalukulu lwaa kumielia ĩNumba ya kĩNzua mũYelusalemũ, intondo za nĩmĩla pĩna yukuguaa.

²³ ũYesu nũiumba-umba muNumba ya kĩNzua mukĩanda kya kĩSolomoni.

²⁴ Paapo ĩAyahũdi naamupilimĩkĩĩlia, naamuĩĩla, “Sunga nzuakĩ ukikungualia inkolo zĩĩtu? Kanga ue ĩwĩKilisito kuĩĩle kualiĩ.”

²⁵ ũYesu nuashookeelia, “Alĩ namuĩĩlĩĩle, niniinie sika mwishuĩĩla. ĩMĩlĩmo nanĩkĩtumaa kuliina lya kĩTata waane, ĩĩo ĩnkuĩlĩĩle ĩne.

²⁶ Ĩpa inie sika musuĩlĩĩle kunsooko inie sika mukoolĩ munkolo zaane.

²⁷ iNkolo zaane zukũigagiaa ululi luane nineene nĩzimanile, ndizo zukuntiataa.

²⁸ Nineene nukuzipeelaa upanga wa kalĩ nakalĩ, sika zikilimĩĩla ĩkalĩ nakalĩ; ukutilĩ nukakuzikamantuula mumukono waane.

²⁹ uTata waane numpĩĩle ĩzaasio ingĩ mukulu kwikĩla tũlũ; ukutilĩ nusũũmile kukuzikamantuula mumukoono wa kĩTata.

³⁰ Ĩne nuTata kwĩumuĩ.”

ĩAyahũdi akumusuukĩla ũYesu

³¹ ĩAyahũdi naasoleela ĩmagũe kangĩ koona amutũle.

³² ũYesu nushookeelia, “Numulagĩlĩĩle mĩlĩmo mingĩ namĩĩza nĩpũnile kwa kĩTata. Mumĩlĩmo ĩĩ, nuĩmbĩ namwintũlĩla ĩmagũe?”

³³ ĩAyahũdi naamushookeelia, “Kunsooko ya utendi nauuza sika kukukutũla ĩmagũe, ĩpa kunsooko ya utukĩli, kuitĩ ue nwĩmuntu ukĩtenda wĩNzua.”

³⁴ ũYesu nuashookeelia, “Sika yandĩkuene muUlagĩĩlio waani, ĩne mbũgile, Inie muanzua?

³⁵ Kanga alĩĩ uĩĩtile anzua ĩaasio naalĩ aagaanue nulukaani lwa kĩNzua (nuwandĩkua sika usũũmile kwioononua),

³⁶ ĩne uTata naalunzelilie, nuntuma muna unkũmbigyulu, inie mwiũgaaii kĩna natuka, kunsooko aza mbũgile, Ĩne nĩMuanawa kĩNzua?

³⁷ Kanga ĩsika nukuĩtendaa ĩmĩlĩmo ya kĩTata waane, mulekinshuĩĩla.

³⁸ Kanga ĩnukuĩtendaa, anga musitinshuĩĩla ĩne noo, muĩsuĩĩle ĩmĩlĩmo, koona mumane nukwilĩnga kĩna uTata umoolĩ mumuane nineene moolĩ mwa kĩTata.”

³⁹ Paapo naadũũma kukumuguĩla kangĩ; nulega mumĩkono yaao.

⁴⁰ Nuenda kangĩ kwityumbĩ liYolidani, paapo pĩna uYohana alukoolĩ ĩmbele nũbadĩĩzia; nwikyala kuuko.

⁴¹ Iingĩ naamuagaana, naaũga, “uYohana sikaalutendile kĩlĩngasĩĩlio kakĩmuĩ, ĩpa zensi naalutambuĩle uYohana mumpola za kĩuyu alĩ za tai.”

⁴² Iingĩ naasuĩĩla mumuakue kuasio.