Yakobo 3 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Kukulugilia ululĩmĩ

¹ Anũna aane, iingĩ mumiani alekitũla amania, kuitĩ mumanile ya kĩna ishie nakwĩamania kukiligia ulamulua ukulu nangũlũ.

² Kuitĩ ishie tũlũ kukĩkũmpagiaa. Wensi nasika wĩkũmpilie muutambuli waakue, uyo ingĩ muntu wa kapanga, nusũũmile kuugilia numuĩlĩ wensi gaa kĩna zĩ kũgyuatio.

³ Laaĩ, kukumaĩĩkĩlaa ĩmaguatio mumĩlomo ya mpalasi koona zukugombie ishie, itĩ kukuĩpĩlula ĩmiĩlĩ yaao yensi.

⁴ Laaĩ, sunga ĩmapango kanga mĩĩ makulu noo, makugendagiguaa nĩnzega nankulu, makupĩlulaguaa nĩkamankĩlio kaniinio tũlũ kwensi kĩna usiiile kwienda unuasio nwigendia.

⁵ Iio-iioo nululĩmĩ ndulo ingĩ katũmpĩ kaniino, ĩo lukĩkeemaa wĩkeemi naukulu. Laaĩ kĩna umooto namuniino naukusonsaa uuwĩĩ naukulu zigi-zigi!

⁶ Nululĩmĩ ndulo luene mooto; luene unkũmbigyulu wa uleki. Mumatũmpĩ mĩĩtu ma muĩlĩ, ululĩmĩ luene lukudobagiaa umuĩlĩ tũlũ wensi, kangĩ lukuishonsa tũlũ naalĩ iumbue, ndulo lukuakĩlagiguaa numooto wa Gehena

⁷ Kuitĩ munduuli tũlũ zensi ĩza nimu, nĩza noni, nĩnazĩkĩkuesaa, nĩza munanza, tũlũ-tũũlũũ zukudĩĩmaguaa, ndizo zakondile kwidĩĩmua nĩantu.

⁸ Ĩpa ululĩmĩ kutilĩ nusũũmile kukuludĩĩma, luene ubĩĩ nasika ukulũkupaa, wijuile uulogi naukola ukiu.

⁹ Kuluasio nakumukulĩlĩa ũShekulu kangĩ Tata, sunga kuluasio nakuazũmĩla ĩantu naalĩ aumbue kumpiani ya kĩNzua.

¹⁰ Mumulomo wazuuzu ukupũnaa ukembetua nuuzũmua. Anũna aane, sika ijĩpĩĩle kwitũla itĩ.

¹¹ Mbii, ĩkoolĩne ĩnjiĩlio nyukupũnagiaa ĩmaazĩ na maaza, nĩmaazĩ namakalĩ kuluuzĩ lumuĩ?

¹² Anũna aane, umukuu usũũmulene kwipĩa izeituuni, katia umuzabiibu kwipĩa inkuu? Iio-iioo nĩnjiĩlio sika ĩsũũmile kwipũnia ĩmaazĩ ma kĩlenge nĩmaazĩ namaaza.

Ulĩngi wa ulongo nuulĩngi wa tai

¹³ Waani munamasala, numulĩngi pakatĩ yaani? Nwalagĩĩle uutendi waakue mulugendo naluuza nuupolo wa masala.

¹⁴ Ĩpa malĩĩ mutĩĩte wĩĩlũ naukalĩ nuuleei munkolo zaani, muleke kĩkũmazukia, kangĩ mulekitambula ulongo mumpola za tai.

¹⁵ ĩMasala aya sika maasio namiikile kwipũna kukiania, ĩpa ma muna nsĩĩ, kangĩ ma kĩuntu nĩma kĩShetani.

¹⁶ Kuitĩ ĩpaasio pĩna ukoolĩ uwĩĩlu nuuleei, paapo wĩĩlĩ umuzũgo nuutendi wensi naubĩĩ.

¹⁷ Ĩpa ĩmasala namapũnile kukiania, kumuandio ingĩ meelu, kangĩ ingĩ ma matiliga, ma upolo, mĩlĩganĩlĩĩlie kwitegeela inkaani za antu, mijuile kĩnishungu ninkali nanziiza, magila kankankani sunga unamampĩlu.

¹⁸ Nĩnkali nya kulukuuluu yukupandĩlaguaa mumatiliga nĩaasio naakuleetaa ĩmatiliga.