Yakobo 2 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Muna ijĩpĩĩle kukuatendela ĩagolĩ nĩatũka

¹ Anũna aane, mulekitũla nuuloeelania, pĩna mutĩĩte uusuĩĩli wa kĩShekulu wĩĩtu Yesu Kilisito mukola ukulu.

² Kuitĩ kanga muntu wingĩle mũshũnagogi liani nujialile iinanzala ya zahabũ nĩmajialo namaaza; kangĩ wingĩle umutũka nujialile ĩntiila na nkulukulu,

³ niniiinie mukumulaaa unuaiso nujialile ĩmajialo namaaza nukukumuĩĩla, “Kyalansa ue ĩpa pĩna iiza,” nukukumuĩĩla ũmutuka, “Imika ĩpa, katia ĩmika paluandi luane;”

⁴ mbii, sika mutendile kawĩkĩline niinie kuniinie, namutũla alamuli namutĩĩte ĩmasĩĩgo namabĩĩ?

⁵ Ntegeelĩ, anũna aane aloogua, uNzua sika aluasaaguĩlene ĩatũka a unkũmbigyulu atũle agolĩ muusuĩĩli, kangĩ asaali a utemi naalualagĩĩle ĩaasio naamuloilue?

⁶ Ĩpa inie mumuleegĩĩlie ikyulio umutũka. Sika agolĩne naakumudemelaa inie nukukumukuesa ntongela ya malindĩ?

⁷ ĩAasio sika aao naakulĩtukĩlane ĩliina naliiza namuĩĩtue ndĩlo?

⁸ Ĩpa gua, mwitenda iiza, kanga mulĩkendegeele ilyagĩĩlio lya kĩtemi, kĩna yandĩkue, “Muloogue umunakaa waako kĩna ĩnkolo yaako.”

⁹ Ĩpa kanga mualoeelie ĩantu, mukutendaa mulandu nukwilamulua nuUlagĩĩlio zĩ atimuli.

¹⁰ Kuitĩ wensi nukukendegeelaa uUlagĩĩlio tũlũ, nukukĩkũmpia mulukaani lumuĩ, wamatimulĩlaa ĩmalagĩĩlio mensi.

¹¹ Kuitĩ uzo naaluũgile, “Ulekigololia,” muene aluũgile, “Ulekiulaga.” Ĩpa gua, kanga wĩĩ sikugoluĩlie ĩpa uulagile, waaza mutimuli wa ulagĩĩlio.

¹² Tambulĩ nukwitenda iio zĩ antu naijililamulua kuulagĩĩlio wa ukolelua.

¹³ Kuitĩ uulamuli ugila kakĩnishungu mumuakue nasikukulagĩĩlaa ĩkĩnishungu; ĩkĩnishungu kyukuudulaa uulamuli.

Mpola za usuĩĩli nuutendi

¹⁴ Nsaĩlo kĩ anũna aane, wensi kanga waũge utĩĩte uusuĩĩli, ninduyo mugila kautendi? Uusuĩĩli waasio usũũmile kukumugũnane?

¹⁵ Kanga munũna katia mugũli wĩĩ kĩpuĩ nukwikeepeelua nĩkya kulĩa sunga kulutondo lumuĩ,

¹⁶ nuwensi mumuani wamuĩĩle, “Lenda nĩmatiliga, woote umooto nukukikyuta,” ĩpa wasiite kumupeela namusilĩlue kumuĩlĩ, nsaĩloo kĩ?

¹⁷ Iio nuusuĩĩli, kanga ĩugila kautendi, ingĩ ukiu.

¹⁸ Ĩpa wensi nukiũga, “Ue utĩĩte usuĩĩli, ĩne ntĩĩte utendi.” Ndagĩĩla uusuĩĩli waako pĩna kutilĩ kautendi waako, nineene nĩkakukulagĩĩla uusuĩĩli waane kuutendi waane.

¹⁹ Ue usuĩlĩĩle kĩna uNzua ingĩ umuĩ, utendile iiza; sunga ĩmasĩĩmuĩ ndayo masuĩlĩĩle nukũkĩkĩma.

²⁰ Ĩpa ue muntu wa lukeemo, usiilene kwimana ya kĩna uusuĩĩli pĩna ugila kautendi ingĩ nakanda?

²¹ uIbulahimu, tata wĩĩtu, sika alĩ mualĩĩliguene ĩkulukuuluu kuutendi, pĩna alumupũnilie uĨsakĩ umuana waakue paasio paupolelio?

²² Waona kĩna uusuĩĩli alĩ witenda umulĩmo palumuĩ nuutendi waakue, nuusuĩĩli naukondeeleka kuutendi.

²³ Paapo uwandĩkua nautimĩĩligua nauũgile; “uIbũlahimu numusuĩĩla uNzua, naialĩĩligua ĩkulukuuluu kumuakue;” kangĩ nduyo alĩ muĩtue musuamuua wa kĩNzua.

²⁴ Mwaona kĩna umuntu ukualĩĩlagiguaa ĩkulukuulu kuutendi waakue, sika kuusuĩĩli udũũ.

²⁵ Iio-iioo nuLahabũ umugololia sika nualĩĩliguane ĩkulukuuluu kuutendi pĩna nuasũgamĩĩlia ĩatumua, nuapũnia kunzi kunzĩla yĩngĩ?

²⁶ Kuitĩ kĩna io umuĩlĩ pĩna kutilĩ kamuau ingĩ mukiu; iio-iioo gua, nuusuĩĩli pĩna ugila kautendi ingĩ ukiu.