Utendi 9 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Kwigũnĩka kwa kĩSauli

¹ Ĩpa uSauli alĩ kĩlĩ ukĩkuuza kukuoopokia nukwishĩĩga kukuaulaga ĩamanigua a kĩShekulu; numuagaana umupolia namukulu,

² nukunga wapeegua imbalua za kuendela kuDamesiko nanandĩkue kumasũnagogi, koona pĩna wamuona wensi nwa nzĩla ĩĩ, ĩagoosia nĩasungu, waatũnge waatuale kũYerusalemũ.

³ Ĩpa pĩna alulonguĩe alĩ wasũgamĩlaa kuDamesiko; kumpũmpũkĩli weelu kwipũna kwigyulu naumumĩlĩka tũlũ pensi.

⁴ Nugua pansĩ, nũigia luli nalumuĩĩla, “Sauli Sauli, nĩkĩ winjagia.”

⁵ Nuũga, “Uue waani Shekulu.” Nduyo nuũga, “Ĩne neene Yesu nwinjagia ue.”

⁶ Ĩpa ĩĩmĩka, wingĩle mukaa nunduue ukiĩĩlua nalukũjĩpĩĩle kwitenda.

⁷ Nĩantu naalĩ ĩmumusĩnzo ensi ninduyo naĩĩma naakeleala, naiiigia ululi, ĩpa sika naamuona kamuntu.

⁸ uSauli nuuuka kwipũna pansĩ, nĩmiiso maakue pĩna namalaĩla sika nuona kakĩntu, naamũtyapa kumukono, naamutuala sunga kuDamesiko.

⁹ Nudĩĩla intondo zitatu sikuoonie, sikulĩĩle sunga kwikopa.

uSauli kuDamesiko

¹⁰ Alukoolĩ muDamesiko mumanigua umuĩ ĩliina liakue Anania. ũShekulu numuĩĩla mumaono, “Anania nushookeelia: Neene, Shekulu.”

¹¹ ũShekulu numuĩĩla, ĩĩmĩka, lenda kunzĩla nyukuĩtaguaa, “Ngolokũ, ukolie munumba ya kĩYuda umuntu nukuĩtaguaa Sauli nwa kuTaliso, kuitĩ laaa, wilompa;

¹² ninduyo wamuonaa muntu umuĩ ĩliina liakue Anania, nũingĩla nukukumuĩĩkĩla ĩmĩkono mumuakue koona waone kangĩ.”

¹³ Ĩpa uAnania nushookeelia, “Shekulu, nazigyũũlie impola za muntu nuasio kuantu iingĩ, ubĩĩ wingĩ nuatendĩĩle ĩeelu aako kũYelusalemũ;

¹⁴ sunga papa utĩĩte usũũmi naupũnile kuapolia naakulu waatũnge tũlũ ensi naakuĩtaa ĩliina liako.”

¹⁵ Ĩpa ũShekulu numuĩĩla, “Longola udũũ, kunsooko unuasio ingĩ kĩseme nakĩsaagulue kumuane walĩtuale ĩliina liane ntongela ya ndugu nazĩngĩ nĩatemi nĩaana a Ĩsilaeli.”

¹⁶ Kuitĩ nĩkakumulagĩĩla mingĩ namĩkakumũjĩpĩla kwiaagigua kunsooko ya liina liane.

¹⁷ uAnania nuenda nũingĩla munumba; numuĩĩkĩla ĩmĩkono, nuũga, “Munũna waane Sauli, Shekulu Yesu untumile, naazukũgyelelĩĩle kumuako munzĩla naazũjilĩlĩĩle, koona uone kangĩ, kangĩ wijulue nuMuau Muelu.”

¹⁸ Ĩkamuĩ intu naigua kwipũna mumiiso maakue zĩ makũlũkũmba, nuona nuĩmĩka, nubadĩĩzigua.

¹⁹ Nulĩa india, nuligia ingũlũ. Nuĩma ntondo nkeei palumuĩ nĩamanigua a kuDamesiko.

²⁰ Ĩkamuĩ nuĩ kumutanantia ũYesu mumasũnagogi kĩna muene Muana wa kĩNzua.

²¹ Tũlũ naalĩ igyũũlie naakũmia, naaũga, “Sika wayune nalukuaagagiaa ĩaasio naalĩ akuliĩtaa ĩliina ĩlĩ kũYelusalemũ? Nĩndĩĩpa azũjilĩĩle kuusiio wauwaauu waatũnge nukukuatuala kuapolia naakulu.”

²² Ĩpa uSauli nongeeleka kwitũla mukamatĩku, nuatundualia ĩAyahũdi naalĩ ikyalile muDamesiko, nwikamĩnkĩĩlia kĩna ũYesu ingĩ Kilisito.

²³ Pĩna nazikĩla ntondo ningĩ, ĩAyahũdi naalonga kialo kya kukumuulaga,

²⁴ ĩpa ĩkialo kiao kya kĩmpisĩ-mpisĩ nakigyelela kwa kĩSauli. Naamukũsĩla pamamĩlango ma kaa utiku nĩmunsĩ amuulage,

²⁵ ĩpa ĩamanigua aakue naamusola muutiku naamuĩĩkĩla mwityooto, naamũikĩlia mũgyelele.

uSauli kũYelusalemũ nuku Taliso

²⁶ uSauli pĩna nupika kũYelusalemũ, nugema kwikamantana nĩamanigua, nĩndĩo tũlũ alĩ amoopookile, sika naasuĩĩla kĩna uyo ingĩ mumanigua.

²⁷ Ĩpa uBalinaba numusola, numutuala kuatumua, nuaganuĩla kĩna alumuoonie ũShekulu munzĩla, naalĩ wĩtambulĩĩle ninduyo, kangĩ kĩna alutanantilie kuukamatĩku kuliina lya kĩYesu kuDamesiko.

²⁸ Ninduyo alĩ ĩensi nĩndĩo mũYelusalemũ nũingĩla nukwipũna.

²⁹ Nutanantia kuliina lya kĩShekulu, naĩtambuĩla nukukĩkunguma nĩAyahũdi a kĩGiliki, ĩpa ĩaasio alĩ idũũma ĩnzĩla ya kumuulaga.

³⁰ Pĩna ĩanũna naiigia impola izi, naamutindĩkĩĩlia sunga kuKaisalia, naamutuala wende kuTaliso.

³¹ Iio gua, muUyahũdi wensi nĩGalĩlaya nĩSamalia, ikyanisa naliĩ nĩmatiliga, nalĩzengua, nalĩongeela, naliilongoleka muooa wa kĩShekulu nipyumbulio lya kĩMuau Muelu.

Ukamania wa kĩPetelo kuLida

³² uPetelo, pĩna alĩ wipilima uko ninduuko, nwĩaagaana naeelu naalĩ akikyalaa kuLida.

³³ Numuona muntu umuĩ kuasio, ĩliina liakue Enea, naalĩ wagonile muulĩlĩ ĩmiaka munaana kunsooko alĩ wakiile gyandi.

³⁴ uPetelo numuĩĩla, “Enea, ũYesu Kilisito ukukukamia. Uuka, wĩaalĩlie uue.” Ĩkamuĩ nuuuka.

³⁵ Nĩantu tũlũ naalĩ akikyalaa muLida nĩSaloni naamuona, naamupĩlukĩĩla ũShekulu.

Dolikasi

³⁶ Numumanigua umuĩ alĩ wĩĩlĩ kũYopa, ĩliina liakue Tabita, ĩndogolelio yaakue Dolikasi katia mpala. Alĩmũjulue nuutendi nauuza, niipeelo iingĩ naalukuipũnagiaa.

³⁷ Pantondo zaasio nuluala, nukia; sunga pĩna naakondia kukumoogia, naamuĩĩka kwityando lya kukiania ityembe.

³⁸ Nukunsooko ĩkaa ya Lida alĩ yĩpiipĩ niYopa, ĩamanigua naiigia kĩna uPetelo wĩĩlĩ kuuko, naatuma antu abĩlĩ kumuakue amupeepie walekitinia kwiiiza kuasio.

³⁹ uPetelo nuuka naĩtiata nĩndĩo. Pĩna nupika naamutuala kwityando lya kukiania ityembe, ĩakiĩlua tũlũ naĩĩmĩka piipĩ ninduyo nailĩla nukukumulagĩĩla mĩnkũmbĩ nintiila naalukuzitũmaa uDolikasi pĩna alĩ kĩlĩ yĩensi nĩndĩo.

⁴⁰ uPetelo nuapũnia tũlũ kunzi, nutũngama nulompa; paapo nuupĩlukĩĩla umuimba, nuũga, “Tabita, uuka!” Ninduyo nulaĩlia ĩmiiso maakue; pĩna numuona uPetelo, nuuuka nwikyalansa.

⁴¹ Numuamba umukono numuĩmĩkia; pĩna nuĩĩta ĩeelu nĩakiĩlua numuĩĩka mupanga ntongela yaao.

⁴² iMpola izi nazikũmuuka mukaa yensi niYopa, ĩantu iingĩ naasuĩĩla mwa kĩShekulu.

⁴³ uPetelo nuĩma mũYopa intondo ningĩ kwa kĩSimoni, muzĩpia-ndĩlĩ.