Utendi 7 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Utambuli wa kĩSitepano

¹ uMupolia namukulu nuũga, “ĩMpola izi yoine zĩĩlĩ.”

² uSitepano nuũga, “Agoosia anũna aane nĩatata aane, tegeelĩ. uNzua wa ukulu alumwigyelelĩĩle utata wĩĩtu uIbũlahimu pĩna alĩ kĩlĩ wĩĩlĩ kuMesopotamia, pĩna alĩ wikaalĩ kwishaamĩla kuHalani.

³ numuĩĩla, ‘Lega munsĩ yaako numuantu aako, wende kunsĩĩ nanĩkakukulagĩĩla.’

⁴ Paapo nulega munsĩĩ ya Akalidayo nwikyala kuHalani, nulega kuasio pĩna ũshee nukia, uNzua numusaamĩlia muna nsĩĩ ĩĩ namwikyalile inie ĩpaino.

⁵ Sika alumupĩĩle kausaali munu sunga uwa kuĩĩkĩla umugulu, ĩpa nuĩĩka ilyago kĩna ukakumupeela yĩĩ nsao yaakue nuwĩleli waakue naupolokile pĩna alĩ kĩlĩ mugila kamuana.

⁶ uNzua nuũga itĩ, ya kĩna uwĩleli waakue ukitũla ugenda munsĩĩ ya antu naĩngĩ nĩndĩo ĩkakuatenda ĩĩ asese aao nukuatendela naibĩĩ kumiaka magana maanĩĩ.

⁷ Nindugu niasio nĩkakuatenda ĩĩ asese, nĩkakualamula uneene, aluũgile uNzua; nĩpĩna ijilikĩla yaasio, ikilega; nĩndĩo ijile kĩntekela ĩne papaapa.

⁸ Numupeela ilyago lya walaami. uIbũlahimu numulela uIsaki, numualamia palutondo lwa munaana. uIsaki numulela uYakobo; uYakobo nualela iishekulu ĩĩtu naikyumi naabĩlĩ.

⁹ iIshekulu aasio naatũla nuwĩĩlũ kwa kĩYosepũ, naamugulia wende kuMĩsili; ĩpa uNzua nuĩ palumuĩ ninduyo,

¹⁰ numupũnia munzago zaakue zensi, numupeela ukende nĩmasala ntongela ya kĩPalao, umutemi wa Mĩsili; ninduyo numuĩĩka wĩĩ mutongeeli wa Mĩsili, kangĩ wa numba yaakue yensi.

¹¹ Nayĩĩ nzala munsĩĩ yensi nya Mĩsili nĩnya Kanaani, nuluago lukulu; ĩatata ĩĩtu naaulia india.

¹² Pĩna uYakobo nũigia ya kĩna kuMĩsili ukoolĩ upemba, nuatuma ĩatata ĩĩtu nkua ya muandio.

¹³ Pamusĩnzo wa kabĩlĩ paapo uYosepu nwĩkooola kuanũna aakue; nĩkĩnũna kya kĩYosepũ nakigyelela kwa kĩPalao.

¹⁴ uYosepu nuatuma antu numuĩta uYakobo ũshee nĩantu aakue, antu makumi mupũngatĩ naataano.

¹⁵ uYakobo nuenda kuMĩsili; nukiĩla kuuko, umuene nĩatata ĩĩtu;

¹⁶ naatualua kũShekemu naaĩĩkua mukĩbĩĩla kĩĩkio uIbũlahimu naalugulile kumpiia kuaana akĩHamoli kuasio kũShekemu.

¹⁷ “Ĩpa ityũngo lilyago liasio uNzua naalumulagĩĩle uIbũlahimu, pĩna nalĩsũgamĩĩla, ĩantu naĩongeela kwitũla iingĩ dũũ kuasio kuMĩsili,

¹⁸ sunga nuuuka umutemi wĩngĩ kuMĩsili nasika alumuĩzĩ uYosepu,

¹⁹ nuasio nulũjulĩlia uluuli luĩtu uusoso nukukuaagia ĩatata ĩĩtu, nwilagĩĩlia ipiana pitaague, pilekikula.

²⁰ Pityũngo liasio nulelua uMusa, nunduyo alĩ muuza pa kĩNzua, nwikyala munumba ya kishee mieli ĩtatu.

²¹ Pĩna nutaagua, una Palao numusola, numukulia nuĩ muana waakue.

²² uMusa numanigua ĩmasala makĩMĩsili, nuĩ mukamatĩku munkaani nuutendi.

²³ ĩMiaka yaakue pĩna nĩgela zĩ makumi manĩĩ, nusĩĩga munkolo yaakue wende kwilaaa ĩanũna aakue, ĩaana a Ĩsilaeli.

²⁴ Numuona umuĩ witendelua ibĩĩ, numugidĩla numumalĩlia unuasio naalĩ muonelua, numukuangĩĩla uMumĩsili. (

²⁵ Alũsĩĩgile kĩna ĩanũna aakue ikilĩnga kĩna uNzua ukuapeela ugũnua kumukono waakue ĩpa sika alĩ alĩngile.)

²⁶ uLutondo lwa kabĩlĩ nuaagaana ĩleeile, nukunga waakamantanie, nuũga, Agoosia inie, inie mukĩnũna, nĩkĩ mukĩtendela naibĩĩ itĩ.

²⁷ Ĩpa unuasio naalĩ ukumutendela naibĩĩ umunakaa muua, numuguma nuũga, Waani naalukuĩĩkile ue wĩĩ mukulu kangĩ wĩĩ mulamuli wĩĩtu.

²⁸ Usiilene umbulage nineene kĩna azumuulagile uMumĩsili igyulo.

²⁹ uMusa numanka kunsooko ya lukaani luasio, nutũla mugenda kunsĩĩ ya Midiani, nulela aana abĩlĩ kuuko.”

³⁰ “Pĩna nĩkĩla ĩmiaka makumi manĩĩ uMalaĩka wa kĩShekulu numũgyeleela mumbugi-melemele ya nkonko ya Sinai mukatũnkũ nakaakĩĩle umooto.

³¹ uMusa pĩna nuuona, nukulĩlua kwiona yaasio, nĩpĩna nusũgamĩĩla walaae kĩĩsa, ululi lwa kĩShekulu nalumuagaana,

³² Ĩne neene Nzua wa atata aako, Nzua wa kĩĨbũlahimu nunwa kĩĨsakĩ nunwa kĩYakobo. uMusa nũikĩkĩma, sika nugimia kwilaa.

³³ ũShekulu numuĩĩla, ‘Jiula ilaatu mumĩgulu yaako, kuitĩ ĩpa pĩna wĩĩmĩkile ingĩ nsĩĩ nanzelu.

³⁴ Kwiona, nauonile uwaagi wa antu aane naĩĩlĩ kuMĩsili; nigyulagiaa uwĩsũsũmi waao, nineene niikile nĩakomole. Ĩpaino nzuu, nikakukutuma kuMĩsili.’

³⁵ “uMusa uuzo naalĩ amusiitile, naiũga, ‘Waani naalĩ wakuĩĩkaa wĩĩ mukulu, kangĩ wĩĩ mulamuli, uyo-uuyoo uNzua numutuma watũle mukulu, kangĩ mukomoli kumukono wa kĩmalaĩka naalumũgyelĩĩle mukakĩtũnkũ.’

³⁶ uUyo aluapũnilie pĩna alutendile ĩmakula niilĩngasĩĩlio munsĩĩ ya Mĩsili nĩpananza iShamũ numumbugi-melemele kumiaka makumi manĩĩ.

³⁷ Uuyo Musa naalĩ waaĩĩlĩĩle ĩaana a Ĩsilaeli, uNzua ukakumunansulĩlia munakĩdagu muanũna aani, kĩna alunansuĩle ĩne.

³⁸ Uuyo alĩ wĩĩlĩ mumulundo mumbugi-melemele palumuĩ numalaĩka naalĩ ĩkĩtambuĩlaa pankonko ya Sinai, kangĩ nĩatata ĩĩtu; uuyo alĩ waanũnkuĩle inkaani za upanga wakupeele nindiishie.

³⁹ ĩAtata ĩĩtu naasiita kukumugomba ĩpa naamuguma kulĩ, numunkolo zaao naashooka kuMĩsili.”

⁴⁰ “Naamuĩĩla uAloni, ‘Kuzĩpĩĩlie anzua naĩkakukutongeela; kuiti uMusa naalukupũnilie kuMĩsili, sika kumanile nakyamuagaanaa.’

⁴¹ Naamĩzĩpia ndaama pantondo zaasio, naaleeta nĩmapolia kunzegamĩla, naalumbia mumĩlĩmo ya mĩkono yaano.

⁴² uNzua nualeka alĩtekele iyũmbĩ ligyulu, kĩna yandĩkue mukĩtabũ kya anakĩdagu, Mbii! Alĩ mumpũnĩĩlie neenene ing'ombe nĩ mapolia miaka makumi manĩĩ mumbugi-melemele, inie namwa numba ya Ĩsilaeli.

⁴³ Inie namusola ihyeema lya Moloki Nĩnsonda ya kĩnzua Lepani, ĩAnzegamĩla naalĩ muazĩpilie mwĩtekele; Nineene nĩkakumusaamia muende kulĩ kwikĩla nĩBabeli.

⁴⁴ ĩAtata ĩĩtu alĩ atĩĩte ihyeema lya mumbugimelemele, iio kĩna uzo naalutambuĩle kwa kĩMusa walĩzĩpie iio-iioo kumpiani niasio naalumĩoonie.

⁴⁵ ĩAtata ĩĩtu muwĩalĩli naalingĩlia palumuĩ nũYosua muutemi wa ndugu zaasio uNzua naaluziingilie ntongela ya atata ĩĩtu, sunga kuntondo za kĩDaudi,

⁴⁶ naaluligilie uukende ntongela ya kĩNzua, ninduyo nulompa wamuligĩlie uNzua wa kĩYakobo wikyaalĩ.

⁴⁷ Ĩpa uSolomoni muene alumuzengĩĩlie ĩnumba.”

⁴⁸ “Ĩpa nukoolĩ kukiania sikukikyalaa munumba nanzengue kumĩkono, kĩna iio nuũgile umunakĩdagu,

⁴⁹ ‘iGyulu ingĩ tyengu liane lya kĩtemi Nĩnsĩĩ uĩĩko wa mĩgulu yaane; Numba kĩ namukinjengela, uũgile ũShekulu?

⁵⁰ Kamuĩ luandĩ kĩ pausũũpĩlio waane. Sika mukono waanene nuzĩpilie yensi?’

⁵¹ “Inie namwa nkingo nankakũ, namutĩĩte inkolo nĩakutuĩ nasika aalamigue, upiupii mukĩkuaa nuMuau Muelu; kĩna ĩatata aani naalĩ atendile, niniinie iio mukutendaa.

⁵² uMunakĩdagu nuĩmbi ĩatata aani nasika alĩ amuagilie. Sunga naaaulaga ĩaasio naalĩ atanantilie ĩkalĩ impola za kuuza kumuakue uMukola Kulukuuluu; wayuuyu ĩpaino namwamusakilie nukukumuulaga;

⁵³ inie naalĩ muwaanũnkuĩle uUlagĩĩlio kuulagĩĩligua wa amalaĩka, sika namuukendegeela.”

uSitepano wiulagua

⁵⁴ Pĩna naiigia inkaani izi, naatakĩkia, naamukelelia ĩmiino,

⁵⁵ ĩpa uyo numũjulue nuMuau Muelu nulangamĩla kwigyulu, nuuona ukulu wa kĩNzua, nũYesu wĩĩmĩkile pamukono wa kĩgoosia wa kĩNzua.

⁵⁶ Nuũga, “Laaĩ naona igyulu lyakũnukuka, nuMuana-muntu wĩĩmĩkile pamukono wa kĩgoosia wa kĩNzua.”

⁵⁷ Naakulia ilyanga kyulu, naalĩmba ĩakutuĩ aao, naamupũũtĩla tũlũ ensi kwishĩĩgo lĩmuĩ.

⁵⁸ Naamuguma kwipũna mukaa naamutũlanga namagũe; nĩakuĩli naziĩĩka intiila zaao pamĩgulu ya musumba umuĩ naalĩ ukuĩtaguaa Sauli.

⁵⁹ Naamutũlanga namagũe uSitepano, ninduyo nwilompa, nuĩga, “Shekulu Yesu, aanũnkula ĩnkolo yaane.”

⁶⁰ Nutũngama nwĩtunta ululi, “Shekulu, uleke kukuaalĩĩlia uutimu uu. Pĩna nutambula izi nugona.”